សហរដ្ឋអាមេរិក ៖ កាលពីខែតុលា ឱនភាពពាណិជ្ជកម្មរបស់សហរដ្ឋអាមេរិកបានកើនឡើងខ្ពស់ក្នុងរយៈពេល១ទៅ១ឆ្នាំកន្លះកន្លងមក ខណៈការនាំចេញសណ្តែកសៀង និងផលិតផលដទៃធ្លាក់ចុះ ដែលផ្តល់សញ្ញាថា ពាណិជ្ជកម្មក្នុងត្រីមាសទី៤ នឹងទាញទម្លាក់ការលូតលាស់នៃសេដ្ឋកិច្ចជាតិ ។
ក្រសួងពាណិជ្ជកម្មអាមេរិកបាននិយាយកាលពីថ្ងៃអង្គារថា ចន្លោះពាណិជ្ជកម្មបានកើនឡើង១៧,៨% មកស្មើនឹង៤២,៦ប៊ីលានដុល្លារ ។ នេះជាការកើនឡើងច្រើនជាងគេតាំងពីខែមីនា ឆ្នាំ២០១៥មក ។
សេដ្ឋវិទូព្យាករណ៍ថា ចន្លោះពាណិជ្ជកម្មនឹងកើន៤១,៨ប៊ីលានដុល្លារក្នុងខែតុលា ។ បើដកអត្រាអតិផរណាចេញ ឱនភាពកើនដល់៦០,៣ប៊ីលានដុល្លារ ខណៈខែកញ្ញា ស្មើតែ៥៤,២ប៊ីលានដុល្លារប៉ុណ្ណោះ ។
ចំណែកកំណើនការនាំចេញកាលពីត្រីមាសមុន មួយផ្នែកធំដោយសារការនាំចេញសណ្តែកសៀងកើនឡើង បន្ទាប់ពីប្រទេសអាហ្សង់ទីន និងប្រេស៊ីលប្រមូលផលមិនសូវបាន។ ប៉ុន្តែការកើនឡើងនៃការបូមប្រេងនិងឧស្ម័ន ត្រូវបានគេគិតថា នឹងធ្វើឲ្យការលូតលាស់សេដ្ឋកិច្ចក្នុងត្រីមាសនេះកើនឡើង ។
មួយផ្នែកដែលធ្វើឲ្យការនាំចេញធ្លាក់ចុះ គឺមកពីការកើនឡើងនៃតម្លៃប្រាក់ដុល្លារក្នុងខែមិថុនា ឆ្នាំ២០១៤ និងខែមករា ឆ្នាំ២០១៦។ តម្លៃប្រាក់ដុល្លារនៅតែបន្តកើនឡើង បន្ទាប់ពីលោក Donald Trump បានទទួលជ័យជម្នះកាលពីថ្ងៃទី៨ វិច្ឆិកា កន្លងមក ហើយការនាំចេញអាចនឹងជួបប្រទះការលំបាកនៅដើមឆ្នាំ២០១៧ ផងដែរ ។
ការនាំចូលផលិតផល និងសេវាកម្មបានកើនឡើង១,៣% មកស្មើ២២៩ប៊ីលានដុល្លារក្នុងខែតុលា ដែលជាកម្រិតខ្ពស់បំផុតតាំងពីខែសីហា ឆ្នាំ២០១៥មក ។ រីឯការនាំចូលប្រេងឥន្ធនៈមានកម្រិតខ្ពស់ជាងគេក្នុងឆ្នាំនេះ ដែលបង្ហាញពីការកើនឡើងនៃតម្លៃប្រេងឆៅ ។
ការនាំចូលពីប្រទេសចិនបានកើនឡើង៤,២% ។ ទោះជាការនាំចេញបាននាំមុខការនាំចូលយ៉ាងឆ្ងាយក្តី ប៉ុន្តែឱនភាពពាណិជ្ជកម្មរវាងសហរដ្ឋអាមេរិក និងប្រទេសចិន បានធ្លាក់ចុះ៤,២% មកស្មើ៣១,១ប៊ីលានដុល្លារក្នុងខែ តុលា ៕
ចែករំលែកព័តមាននេះ