តាមធម្មតា ការយំគឺជាទង្វើដែលមានទំនាក់ទំនងជាមួយនឹងអារម្មណ៍អវិជ្ជមានណាមួយយា៉ងពិតប្រាកដ។ ប៉ុន្តែតើអ្នកជឿទេថា ការយំមានអត្ថប្រយោជន៍មួយចំនួនចំពោះសុខភាពនោះ? នៅពេលយំ យើងតែងមានអារម្មណ៍សោកសៅខ្លាំងរហូតធ្លាក់ទឹកចិត្ត ឬភ័យខ្លាច ។ ការពិត នៅពេលដែលអ្នកយំដោយសារការរភើប សប្បាយរីករាយមានអត្ថប្រយោជន៍តិចជាងអ្នកយំដោយសារបញ្ហាផ្លូវចិត្ត ។
ទឹកភ្នែកដែលផលិតចេញដោយសារកត្ដាផ្លូវចិត្តមានសមាសភាពគីមីផ្សេងគ្នា និងមិនដូចទឹកភ្នែកដែលបង្កឡើងដោយសារការឆ្លងមេរោគ ឬកត្តាផ្សេងទៀតនោះទេ ។ ដូច្នេះសូមក្រឡេកមើលអត្ថប្រយោជន៍នៃការយំនៅក្នុងអត្ថបទខាងក្រោម ៖
១-បន្ថយភាពតានតឹង ៖ ការស្រាវជ្រាវវិទ្យាសាស្ត្រជាច្រើនបានណែនាំថា ការយំអាចជួយធ្វើឲ្យផ្លូវកាយ និងផ្លូវចិត្តរបស់យើងវិលទៅរកស្ថានភាពធម្មតាវិញ ដូច្នេះវាអាចជួយយើងឲ្យមានភាពធូរស្បើយពីភាពតានតឹង ។
២-បញ្ចេញជាតិពុលចេញពីរាងកាយ ៖ ការស្រាវជ្រាវមួយបានរកឃើញថា ក្នុងអំឡុងពេលមានការផលិតទឹកភ្នែកដែលបង្កឡើងដោយបញ្ហាអារម្មណ៍ ទឹកភ្នែកទាំងនោះមានជាតិពុលមួយចំនួនដែលអាចជាផលិតផលរបស់អ័រម៉ូនបង្កភាពតានតឹងក្នុងរាងកាយ ដូច្នេះការយំអាចបំបាត់ជាតិពុលចេញពីរាងកាយរបស់អ្នកបាន ។
៣-លាងសម្អាតភ្នែកដោយធម្មជាតិ ៖ ការស្រាវជ្រាវមួយបានរកឃើញថា ទឹកភ្នែកដែលបង្កឡើងដោយបញ្ហាផ្លូវចិត្ដ មានផ្ទុកអង់ហ្ស៊ីមមួយដែលមានឈ្មោះថា lysozyme។ វាមានលក្ខណៈសម្បត្តិប្រឆាំងបាក់តេរី ដូច្នេះធ្វើឲ្យទឹកភ្នែកជាភ្នាក់ងារលាងសម្អាតភ្នែកដោយធម្មជាតិ ។
៤-ព្យាបាលបញ្ហាភ្នែកស្ងួត ៖ នេះគឺជាអត្ថប្រយោជន៍មួយផ្សេងទៀតនៃការយំចំពោះសុខភាព ។ ទឹកភ្នែកជួយបន្ថែមភាពរអិលដល់ភ្នែករបស់អ្នកដោយធម្មជាតិ ហើយការយំអាចទប់ស្កាត់ការស្ងួតភ្នែកឡើងក្រហម និងភ្នែកដែលមានប្រតិកម្ម ។
៥-ធ្វើឲ្យអារម្មណ៍ល្អឡើងវិញ ៖ ការយំអាចជួយធ្វើឱ្យអ្នកមានអារម្មណ៍ថាធូរស្រាលជាងមុន និងធ្វើឲ្យអារម្មណ៍របស់អ្នកប្រសើរឡើងក្នុងកម្រិតជាក់លាក់មួយ ។ ទឹកភ្នែកជួយបង្កើនការផលិតអរម៉ូន endorphins ឬអ័រម៉ូនដែលធ្វើឲ្យអ្នកមានអារម្មណ៍ល្អនៅក្នុងខួរក្បាល ៕
ចែករំលែកព័តមាននេះ