ជួយទ្រទង់ដោយពួកយុទ្ធជនអីុរ៉ង់ ហេសប៊ុលឡាហ៍លីបង់និងពួកជីវពលស៊ីអីុតអីុរ៉ាក់ កងទ័ពស៊ីរីនាថ្ងៃទី៧ ធ្នូ ដណ្តើមត្រួតត្រាតំបន់ទីក្រុងអាឡែបចាស់ដែលរហូតមកទល់ពេលនេះកាន់កាប់ដោយពួកឧទ្ទាម ។
តាំងពីចាប់ផ្តើមការវាយលុកពីថ្ងៃទី១៥ វិច្ឆិកា ជាមួយការជួយទ្រទ្រង់ខាងអាកាសរបស់រុស្ស៊ី កងទ័ពស៊ីរីដណ្តើមយកបានជាង៣ភាគ៤នៃបណ្តាសង្កាត់ក្រុងអាឡែបភាគខាងកើតជាទីតាំងរបស់ពួកឧទ្ទាម ។ ការវាយដណ្តើមយកតំបន់នោះទាំងមូលអាចរាប់ថ្ងៃ ។ ប្រមុខពួកបះបោរស្លាប់បន្តបន្ទាប់គ្នា ។ គ្រាន់តែថ្ងៃទី៦ ធ្នូ តែមួយគត់ សង្កាត់៥ត្រូវពួកឧទ្ទាមបោះបង់ចោលដែលអាចឱ្យកងទ័ពស៊ីរីពុះបំបែកតំបន់ក្រុងអាឡែបភាគខាងកើតជា២ ។ ពួកឧទ្ទាមពេលនេះប្រមូលផ្តុំគ្នានៅផ្នែកខាងត្បូងនៃក្រុងអាឡែបភាគខាងកើតជាឱកាសឱ្យកងទ័ពក្រុងដាម៉ាស់បង្កើនសង្គ្រាមធ្វើឱ្យពួកប្រឆាំងនៅសល់ប្រមាណជា១០០០នាក់គ្របដណ្តប់ដោយពួកអ៊ិស្លាមនិយមកាន់តែខ្សោះកម្លាំង ។
ថ្ងៃទី៧ ធ្នូ ពួកឧទ្ទាមមួយចំនួនអំពាវនាវឱ្យមានបទឈប់បាញ់គ្នាភ្លាមៗ៥ថ្ងៃដើម្បីអាចជម្លៀសជនស៊ីវិលទៅកាន់តំបន់មួយទៀតកាន់កាប់ដោយពួកបះបោរនៅភាគខាងជើងស៊ីរី។ រដ្ឋាភិបាលស៊ីរីបានបដិសេធសំណើបែបនេះបើដរាបណាពួកភេរវករពុំព្រមចាកចេញពីតំបន់នោះទេ ។
នៅក្រុងអាឡែបភាគខាងកើតមនុស្សយ៉ាងតិច១៥នាក់ស្លាប់ហើយនៅក្រុងអាឡែបភាគខាងលិចកាន់កាប់ដោយរដ្ឋាភិបាល កុមារ៣នាក់ ព្រមទាំងមនុស្សពេញវ័យ៨នាក់ស្លាប់ ដោយការបាញ់ផ្លោងរបស់ពួកឧទ្ទាម ។ ចំណែកវរសេនីយ៍ឯករុស្ស៊ីម្នាក់ដែលរងរបួសធ្ងន់ដោយការបាញ់ផ្លោងរបស់ពួកឧទ្ទាមក្រោយមកបានស្លាប់ ។ រួចគិលានុប្បដ្ឋាយិការុស្ស៊ី២នាក់ដែលបម្រើការតាមពេទ្យចល័តនៅក្រុងអាឡែបក៏ត្រូវស្លាប់ដោយគ្រាប់ផ្លោងពួកឧទ្ទាមដែរ ៕
ចែករំលែកព័តមាននេះ