ប្រទេសឥណ្ឌូណេស៊ី ៖ ក្រសួងដឹកជញ្ជូនបាននិយាយថា អាកាសយានិកជនជាតិឥណ្ឌូណេស៊ីលើសពី៩០០នាក់ទៅទៀតដែលគ្មានការងារធ្វើក្នុងក្រុមហ៊ុនអាកាសចរណ៍ ហើយក្រសួងមានគម្រោងអនុម័តកាតព្វកិច្ចថ្មីៗដើម្បីធានាផ្តល់ការងារដល់ពួកគេក្នុងផ្នែកនេះ ។
លោក Budi Karya Sumadi រដ្ឋមន្ត្រីនៃក្រសួងខាងលើថ្លែងថា ៖ « វាជាបញ្ហាដ៏ធំមួយ ព្រោះមានអាកាសយានិកយ៉ាងតិចណាស់ក៏៩០០នាក់ដែរគ្មានការងារធ្វើ ។ នេះជាការងាររបស់ពួកយើងដើម្បីបង្កើតឱកាសដល់ពួកគេ » ។
លោក Budi បន្តថា ក្រសួងរបស់លោកនឹងតម្រូវឲ្យក្រុមហ៊ុនអាកាសចរណ៍ក្នុងស្រុកទទួលបុគ្គលិកជាអាកាសយានិកក្នុងស្រុក និងសន្យាថា ក្រុមហ៊ុននឹងជួយដល់ពួកគេដោយផ្តល់ការហ្វឹកហាត់បន្ថែមផងដែរ ។ ក្រុមហ៊ុនអាកាសចរណ៍ក្នុងស្រុក ត្រូវតែមានកាតព្វកិច្ចទទួលអាកាសយានិកឥណ្ឌូណេស៊ី ។
លើសពីនេះ ក្រសួងខាងលើនឹងតម្រូវឲ្យមានលក្ខខណ្ឌកាន់តែតឹងរឹុងសម្រាប់អាកាសយានិកបរទេស ដែលធ្វើការក្នុងក្រុមហ៊ុនអាកាសចរណ៍ក្នុងស្រុកទៀតផង ។
លោកបន្តថា ៖ « ពួកយើងនឹងអនុម័តលក្ខខណ្ឌមួយចំនួនសម្រាប់អាកាសយានិកបរទេស ដែលកំពុងធ្វើការនៅក្នុងប្រទេសឥណ្ឌូណេស៊ីផងដែរ » ៕
ចែករំលែកព័តមាននេះ