រាជធានីភ្នំពេញ ៖ ប្រទេសកម្ពុជាទទួលធ្វើជាម្ចាស់ផ្ទះរៀបចំការប្រកួតកីឡាចំបាប់ជ្រើសរើសជើងឯកអាស៊ីអាគ្នេយ៍ឆ្នាំ២០១៦ ដែលមាន៦ប្រទេសចូលរួម ។ ការប្រកួតត្រូវបានរៀបចំធ្វើឡើងជាផ្លូវការកាលពីថ្ងៃទី៥ ធ្នូ កន្លងមកនេះនៅពហុកីឡដ្ឋានជាតិអូឡាំពិកក្រោមអធិបតីភាពលោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា លោក ខេស៊ី បាណេត អនុប្រធានសហព័ន្ធកីឡាចំបាប់កម្ពុជា និងលោក Kitiponsh Suchantabutr ប្រធានសហព័ន្ធកីឡាចំបាប់អាស៊ីអាគ្នេយ៍ ។
លោក ខេស៊ី បាណេត បានមានប្រសាសន៍ឱ្យដឹងថា ក្នុងចំណោមបណ្ដាប្រទេសទាំង៦ដែលបានចូលរួមប្រកួតនាពេលនេះ កម្ពុជាជាម្ចាស់ផ្ទះ មានប្រតិភូកីឡាចូលរួមសរុបចំនួន២៥នាក់ ឡាវ៩នាក់ ម៉ាឡេស៊ី៥នាក់ សិង្ហបុរី៣នាក់ ថៃ១៥នាក់ និងវៀតណាម២១នាក់ ។ ការប្រកួតនេះគ្រោងបញ្ចប់នៅថ្ងៃទី៨ ធ្នូ ។
លោក ខេស៊ី បាណេត មានប្រសាសន៍បន្តថា គោលបំណងសំខាន់ដែលកម្ពុជាទទួលធ្វើជាម្ចាស់ផ្ទះរៀបចំការប្រកួតនៅក្នុងពេលនេះ គឺដើម្បីស្វែងរកបទពិសោធន៍ពីបណ្ដាប្រទេសជិតខាងឱ្យបានច្រើនសម្រាប់ការប្រកួតកីឡាស៊ីហ្គេមដែលកម្ពុជាទទួលធ្វើជាម្ចាស់ផ្ទះជាលើកដំបូងនៅឆ្នាំ២០២៣ខាងមុខ ។ លោកថា ក្នុងចំណោមបណ្ដាប្រទេសទាំង៥ដែលមកចូលរួមប្រកួតនាពេលនេះ លោកព្រួយបារម្ភជាងគេគឺប្រទេសថៃនិងវៀតណាម ដែលសុទ្ធតែជាជើងខ្លាំង ថែមទាំងបញ្ជូនប្រតិភូកីឡារបស់ខ្លួនមកចូលរួមប្រកួតច្រើនទៀតផង ។
លោក អ៊ុក សិទ្ធិជាតិ តំណាងឱ្យក្រសួងអប់រំ យុវជន និងកីឡា បានមានប្រសាសន៍សំដែងនូវការគាំទ្រយ៉ាងកក់ក្ដៅចំពោះប្រតិភូកីឡាទាំងអស់ដែលបានមកចូលរួមប្រកួតនៅក្នុងពេលនេះ ។ លោកថា រាជរដ្ឋាភិបាលកម្ពុជាបានសម្រេចចិត្តទទួលធ្វើជាម្ចាស់ផ្ទះរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ហើយក្រសួងអប់រំ យុវជន និងកីឡា បានដាក់ចេញនូវយុទ្ធសាស្ត្រពង្រឹង គាំទ្រដល់សហព័ន្ធកីឡាជាតិ ក្នុងការរៀបចំធ្វើជាម្ចាស់ផ្ទះការប្រកួតកីឡាជើងឯកថ្នាក់តំបន់ដើម្បីរៀនសូត្រ និងទទួលបានបទពិសោធន៍ក្នុងការរៀបចំការប្រកួតជាលក្ខណៈអន្តរជាតិ និងឈានទៅរៀបចំការប្រកួតកីឡាស៊ីហ្គេមនាពេលខាងមុខ ។ ការប្រកួតកីឡាមិនត្រឹមតែប្រកួតប្រជែងដើម្បីមេដាយប៉ុណ្ណោះនោះទេ វាថែមទាំងនាំមកនូវមិត្តភាព សាមគ្គីភាព សហប្រតិបត្តិការ និងសុខដុមនីយកម្មនៅក្នុងតំបន់ទៀតផង ។ ក្នុងនាមជាម្ចាស់ផ្ទះរៀបចំការប្រកួត លោកសំណូមពរដល់គណៈកម្មការបច្ចេកទេសរៀបចំការប្រកួត ត្រូវផ្ដោតការយកចិត្តទុកដាក់អនុវត្តឱ្យបានត្រឹមត្រូវទៅតាមគោលការណ៍និយាមបច្ចេកទេស ដែលកំណត់ដោយសហព័ន្ធកីឡាជាតិ និងអន្តរជាតិ ដើម្បីធានាដឹកនាំការប្រកួតប្រកបដោយយុត្តិធម៌ស្របតាមគោលការណ៍ Fair Play ឆ្ពោះទៅរកឱ្យឃើញនូវកីឡាករកីឡាការិនីឆ្នើមពិតប្រាកដ៕
ចែករំលែកព័តមាននេះ