«គីយ៉ូមីស៊ូដេរ៉ា» «Kiyomizu Dera» ឬវត្ត «ទឹកថ្លា» ជាទីតាំងទេសចរណ៍បេតិកភណ្ឌពិភពលោកដ៏ពេញនិយម ស្ថិតនៅក្រុងក្យូតូនឹងជួសជុលនាពេលខាងមុខ ។
វត្ត «ទឹកថ្លា» នឹងបិទមិនឱ្យចូលទស្សនាផ្នែកខ្លះពីខែមករា ឆ្នាំ២០១៧ តទៅដើម្បីជួសជុលទ្រង់ទ្រាយធំក្នុងអំឡុងពេល៤០០ឆ្នាំ ហើយនឹងកំណត់ឱ្យរួចរាល់នៅឆ្នាំ២០២០ ។ ក្នុងអំឡុងពេលនៃការជួសជុលនេះ អ្នកទេសចរអាចចូលគោរពបូជាព្រះពុទ្ធរូបនៅក្នុងព្រះវិហារបាន និងផ្នែកសាសនានៅដំណើរការជាធម្មតា ប៉ុន្តែមិនអាចមើលឃើញវិហារដែលសាងសង់ពីឈើរាប់រយឆ្នាំនោះទេ ។
វត្តនឹងបង្កើតច្រករបៀងពិសេសពីតួវិហារអាចមើលឃើញសម្រស់ក្រុងក្យូតូ ប៉ុន្តែក្រើនរំលឹកថា ខ្សែរបៀងនេះអាចណែនណាន់តាន់តាប់ ព្រោះមានអ្នកទេសចរទៅទស្សនាច្រើនជាង៥,៥លាននាក់ក្នុងមួយឆ្នាំ។វត្ត «គីយ៉ូមីស៊ូដេរ៉ា» ឬវត្ត «ទឹកថ្លា» សាងសង់នៅចុងសតវត្សទី៨ នៅលើភ្នំ ដ៏ស្រស់ស្អាតរបស់ក្រុងក្យូតូ ហើយព្រះវិហារវត្តសាងសង់ពីឈើ ធ្លាប់ត្រូវភ្លើងឆេះ និងសាងសង់ថ្មីនៅឆ្នាំ១៦៣៣ ។
គណៈកម្មការវត្តបញ្ជាក់ថា នឹងចាប់ផ្តើមបិទនៅខែមករា និងក្នុងខែមេសា តួវិហារនឹងត្រូវការបិទបាំងទាំងស្រុង ដោយប្តូរដំបូល និងលាបពណ៌ថ្មីទាំងអស់ ។ ការជួសជុលលើកនេះលាតសន្ធឹងលើក្រឡាផ្ទៃរបស់វត្តស្ទើរតែទាំងអស់ខណៈពេលមុននេះវត្តបានជួសជុលមួយផ្នែក ដែលខូចខាតពីព្យុះនៅឆ្នាំ១៩៥០ និងជួសជុលតិចតួចបន្ថែមទៀតនៅចន្លោះឆ្នាំ១៩៦៤ដល់១៩៦៧ ៕
ចែករំលែកព័តមាននេះ