ខេត្តសៀមរាប ៖ ក្រុមប្រតិភូ អ៊ូស៊ូណូមីញ៉ា រ៉ូតារីក្លឹប ពីប្រទេសជប៉ុន បានប្រគល់រថយន្ដពន្លត់អគ្គិភ័យ ធនមធ្យម ដែលនាំចូលពីប្រទេសជប៉ុនចំនួន ៤គ្រឿង ដើម្បីប្រគល់ជូន កងវិស្វកម្មសម្ដេចតេជោ ហ៊ុន សែន ប្រចាំខេត្តសៀមរាប សម្រាប់ទុកប្រើប្រាស់ ក្នុងការជួយពន្លត់ និងសង្គ្រោះពេលមានអគ្គិភ័យ កើតឡើង នៅខេត្តសៀមរាប។ ហើយរថយន្ដប្រភេទនេះ ក៏អាចមានលទ្ធភាព ក្នុងការបូមទឹកស្រោចស្រព ផលដំណាំកសិកម្ម បានផងដែរ ពិសេសដូចជា នៅពេលមានភាពរាំងស្ងួត ខ្វះទឹកស្រោចស្រពស្រូវស្រែ ជាដើមនោះ។
ពិធីប្រគល់ និងទទួលនេះ បានធ្វើឡើង នារាត្រីថ្ងៃទី០១ ខែធ្នូ ឆ្នាំ២០១៦នេះ នៅសណ្ឋាគារ ស៊ីធីអង្គរ ក្រុងសៀមរាប ក្រោមអធិបតីភាព អ្នកឧកញ៉ា សៀង ណាំ អ្នកតំណាងរាស្ត្រ មណ្ឌលសៀមរាប និងលោកជំទាវ និងប្រតិភូ អ៊ូស៊ូណូមីញ៉ា រ៉ូតារីក្លឹប ពីប្រទេសជប៉ុន ដែលដឹកនាំដោយ លោកព្រឹទ្ធាចារ្យ យ៉ាណូតេស៊ូរ៉ូ (YANO TETSURO) និងជាអតីត អនុរដ្ឋមន្ត្រី ក្រសួងការបរទេសជប៉ុន ព្រះតេជគុណ ស៊ីកាដា មីណេអូ (Ven. TSUKADA MUYNEO) នៃព្រះវិហារស្យូហ្វ៊ូគូយិ ជប៉ុន និងវត្តមានតំណាង ជាន់ខ្ពស់ស្ថានទូតជប៉ុន ប្រចាំព្រះរាជាណាចក្រកម្ពុជា និងដោយមានវត្តមាន ចូលរួមពីកម្លាំងសមត្ថកិច្ច កងកម្លាំង នៃក្រុមវិស្វកម្ម សម្ដេចតេជោ ហ៊ុន សែន ប្រចាំខេត្តសៀមរាប អាជ្ញាធរដែនដី លោកគ្រូ អ្នកគ្រូ ផងដែរ។
ក្នុងពិធីសម្ពោធ អាគារសិក្សានោះ អ្នកឧកញ៉ា សៀង ណាំ បានថ្លែងអំណរគុណ យ៉ាងជ្រាលជ្រៅបំផុត ជូនចំពោះគណៈប្រតិភូ អ៊ូស៊ូណូមីញ៉ា រ៉ូតារីក្លឹប ពីប្រទេសជប៉ុន ក៏ដូចជា រដ្ឋាភិបាលជប៉ុន ដែលបានតាមរយៈ ស្ថានទូតជប៉ុន ប្រចាំព្រះរាជាណាចក្រកម្ពុជា ដែលបានផ្ដល់ជូន រថយន្ដពន្លត់ អគ្គីភ័យ ចំនួន ៤គ្រឿងនេះ ជូនដល់កងវិស្វកម្ម របស់សម្តេចតេជោ ហ៊ុន សែន ប្រចាំខេត្តសៀមរាប នៅពេលនេះ។
លោកបានលើកឡើងបន្តទៀតថា រថយន្ដពន្លត់អគ្គីភ័យទាំងនេះ សម្រាប់ប្រើប្រាស់ ក្នុងការជួយពន្លត់ និងសង្គ្រោះ ពេលមានអគ្គិភ័យកើតឡើងជាយថាហេតុណាមួយ នៅខេត្តសៀមរាប ហើយរថយន្ដប្រភេទនេះ ក៏អាចមានលទ្ធភាព ក្នុងការបូមទឹក ស្រោចស្រព ផលដំណាំ កសិកម្ម របស់ប្រជាកសិករ បានផងដែរ ពិសេសនៅពេល មានភាពរាំងស្ងួត ខ្វះទឹក ស្រោចស្រពស្រូវស្រែ ចម្ការ ជាដើមនោះ៕
ចែករំលែកព័តមាននេះ