ខេត្តកណ្ដាល ៖ សិស្សវិទ្យាល័យសម្តេចតេជោ ហ៊ុន សែន ត្រើយស្លា ស្ថិតនៅឃុំត្រើយស្លា ស្រុកស្អាង រាប់រយនាក់ កាលពីព្រឹកថ្ងៃទី២ ខែធ្នូនេះ បានផ្ទុះការតវ៉ាមិនព្រមចូលរៀន ហើយនាំគ្នាលើកបដានៅខាងមុខសាលា ដើម្បីស្នើសុំឲ្យលោកនាយយកសាលា ឈប់កៀបសង្កត់សិស្សឲ្យបង់លុយផ្សេងៗ។ តាមរបាយការណ៍របស់នគរបាលបានឱ្យដឹងថានៅវេលាម៉ោង៧ និង៣០នាទព្រឹក ថ្ងៃទី២ ខែធ្នូនេះ មានសិស្សវិទ្យាល័យហ៊ុនសែនត្រើយស្លា ប្រហែល១៥០នាក់ ស្រី ៤០នាក់ បានប្រមូលផ្តុំគ្នាធ្វើការតវ៉ាចំពោះសាលាដែលមានភាពមិនប្រក្រតីមួយចំនួន ដោយបានដាក់សំណូមពរដល់សាលាដូចខាងក្រោម ៖
១- សុំមិនបង់ប្រាក់ឲ្យទៅសាលា ក្នុងមួយខែ៥០០រៀល សម្រាប់ម៉ោងកីឡា។
២- សុំឲ្យអនុវត្តបទបញ្ជាផ្ទៃក្នុង ចំពោះសិស្សដែលធ្វើខុស តែកុំយកប្រាក់។
៣- សុំការចែកសៀវភៅពុម្ពឲ្យសិស្សខ្ចី តែកុំយកប្រាក់ម្នាក់ ២៥០០រៀល។
៤- ពេលដាក់ពាក្យចូលរៀន កុំឲ្យយកប្រាក់ម្នាក់ ២៥០០រៀល ព្រោះខាងសាលាយករាល់ឆ្នាំ។
៥- សុំឲ្យសិស្សដែលប្រឡងឆមាសធ្លាក់ ត្រូវតែឲ្យធ្លាក់ កុំយកប្រាក់ឲ្យជាប់វិញ ព្រោះកន្លងមកមានរឿងនេះកើតឡើង។
ការតវ៉ានេះ ភាគច្រើនសិស្សដែលជាកូនប្រជាពលរដ្ឋមានជីវភាពក្រីក្រ មានការខ្វះខាតប្រាក់កាក់ សម្រាប់បង់ឱ្យទៅសាលាតាមការកំណត់។ ជុំវិញកាតតវ៉ានេះ លោក សុខ ពៅ នាយយកវិទ្យាល័យ ត្រើយស្លា បានប្រាប់ឱ្យដឹងថា បញ្ហាសិស្សតវ៉ានេះ លោកបានដោះស្រាយចប់ហើយ ហើយសិស្សបានចូលរៀនវិញដែរ ដោយលោកបានដោះស្រាយតាមសំណូមពរសិស្សគ្រប់ចំណុច។
លោកបានទួលស្គាល់ថា លោកបានរៀបចំតភ្លើង អគ្គីសនី ចូលក្នុងសាលា និងថ្នាក់រៀន ដាក់កង្ហា អស់ប្រាក់ច្រើន ដូចនេះលោកបានរៃពីសិស្ស ហើយមានសិស្សខ្លះ ក៏មិនបានបង់ដែរ ជាពិសេសសិស្សដែលធ្វើការតវ៉ានេះតែម្តងជាកូនប្រជាពលរដ្ឋក្រីក្រ។ លោកនាយកបន្តថា បញ្ហាសិស្សតវ៉ានេះ ខាងការិយាល័យអប់រំស្រុកស្អាង ក៏បានមកចូលរួម ធ្វើការដោះស្រាយជាមួយសិស្សបានចប់ ហើយសិស្សក៏បានចូលរៀនវិញដែរ៕
ចែករំលែកព័តមាននេះ