ក្បួនរថយន្តយីឌុបជាង១០គ្រឿង ផ្ទុកឈើពេញដឹកជញ្ជូនដូចហែកឋិន
ខេត្តមណ្ឌលគិរី ៖ ក្រុមអ្នកដំណើរ និងអ្នកកាសែតមានការងឿងឆ្ងល់យ៉ាងខ្លាំង ខណៈនៅព្រឹកថ្ងៃទី០២ ខែធ្នូ ឆ្នាំ២០១៦នេះ ក្បួនរថយន្តខ្នាតយក្ស (ប្រភេទយីឌុប) ជាង១០គ្រឿង
ខេត្តមណ្ឌលគិរី ៖ ក្រុមអ្នកដំណើរ និងអ្នកកាសែតមានការងឿងឆ្ងល់យ៉ាងខ្លាំង ខណៈនៅព្រឹកថ្ងៃទី០២ ខែធ្នូ ឆ្នាំ២០១៦នេះ ក្បួនរថយន្តខ្នាតយក្ស (ប្រភេទយីឌុប) ជាង១០គ្រឿង មានផ្ទុកឈើពេញព្រៀប បានឈប់បន្តកន្ទុយគ្នា បង្កការកកស្ទះចរាចរណ៍ នៅតាមផ្លូវលំមួយខ្សែ កែងផ្លូវជាតិលេខ៧៦ ចំណុចឃ្លាំងការ៉េ៩ ស្ថិតក្នុងភូមិគ្រញូងសែនជ័យ ឃុំ២ធ្នូ ស្រុកស្នួល ខេត្តក្រចេះ។ សេចក្តីរាយការណ៍ពីចំណុចខាងលើបានឲ្យដឹងថា ក្បួនរថយន្តយីឌុបទាំងនោះមានចំនួន១៦គ្រឿង ផ្ទុកឈើពេញក្នុងទ្រុងទាំងអស់ ថែមទាំងមានគ្របតង់យ៉ាងជិតស្អាតផងដែរ។
រថយន្តទាំងនោះ ត្រូវបានគេលើកឡើងថា មានទិសដៅចេញពីក្រុមហ៊ុនដីសម្បទានសេដ្ឋកិច្ចមួយឈ្មោះ ប៊ិញហ្វឿក ស្ថិតក្នុងភូមិស្រែខ្ទុម ឃុំស្រែព្រះ ស្រុកកែវសីមា ខេត្តមណ្ឌលគិរី និងបានបើកសំដៅមកផ្លូវជាតិលេខ៧៦ បម្រុងឆ្ពោះទៅច្រកអន្តរជាតិត្រពាំងស្រែ ឬច្រកវ៉ាលឺ ស្ថិតក្នុងទឹកដីនៃស្រុកស្នួលខេត្តក្រចេះ ដើម្បីទម្លាក់ចូលរោងចក្រធ្វើសិប្បកម្ម។ នៅវេលាម៉ោងប្រមាណជា១០ព្រឹកថ្ងៃដដែល គេក៏បានឃើញបុរសវ័យកណ្តាលម្នាក់ជិះរថយន្តVIGOពណ៌ខ្មៅ មួយគ្រឿង ប្រគល់ក្រដាស់ឲ្យក្រុមរថយន្តទាំងនោះ។
នៅពេលនោះហើយ ទើបគេដឹងថា ជាច្បាប់PCដែលមន្ត្រីជំនាញ ចេញឲ្យរថយន្តទាំងនោះដឹកជញ្ជួនឈើចេញពីក្រុមហ៊ុនខាងលើ។ មិនមានប្រភពណាច្បាស់លាស់ដែលអាចបញ្ជាក់អំពីបរិមាណឈើដែលរថយន្តទាំងនោះកំពុងតែដឹកជញ្ជួននោះឡើយ។ ប៉ុន្តែប្រភពផ្លូវការមួយបានបង្ហើបថា រថយន្តចំនួន១៦គ្រឿងខាងលើ ជាកម្មសិទ្ធរបស់ឧកញ៉ា អ៊ឹង ស៊ីតាតវិរៈ ហៅឧកញ៉ាល័ក្ខ ដែលដេញថ្លៃបានពីគណៈកម្មការថ្នាក់ជាតិបង្ក្រាបបទល្មើសព្រៃឈើ នូវចំនួនឈើរាប់ពាន់ម៉ឺនម៉ែតគូបដែលស្តុកក្នុងក្រុមហ៊ុនមួយចំនួនក្នុងខេត្តមណ្ឌលគិរី កាលពីជាង១០ខែមុន តែទើបដេញថ្លៃបាន និងធ្វើការដឹកជញ្ជួនចេញ។
ឈើដែលកំពុងដឹកជញ្ជួនចេញ ឆ្ពោះទៅច្រកអន្តរជាតិត្រពាំងស្រែនេះផងដែរ មានការអះអាងថា មួយចំនួនតិចគឺរក្សាទុកក្នុងរោងចក្រកែច្នៃ ប៉ុន្តែមួយផ្នែកធំនោះ គឺគេជញ្ជួនចេញទៅប្រទេសវៀតណាម លក់ឲ្យទៅថៅកែយួនឈ្មោះយាយជី។ ពាក់ព័ន្ធនឹងការដឹកជញ្ជួន និងច្បាប់ខាងលើ មេការរបស់ឧកញ៉ាល័ក្ខ ឈ្មោះហឿន អ្នកកាសែតមិនអាចសុំការ បញ្ជាក់ណាមួយពីលោកបាននោះទេ នៅព្រឹកថ្ងៃទី០២ខែធ្នូនេះ។ ជាមួយគ្នានោះលោក វង្ស សុកសេរី នាយខណ្ឌរដ្ឋបាលព្រៃឈើមណ្ឌលគិរី ឲ្យដឹងថា ឈើដែលគេកំពុងដឹកជញ្ជួននោះ ជាឈើស្របច្បាប់ដែលគេបានដេញថ្លៃពីគណៈកម្មការថ្នាក់ជាតិ ចំណែករថយន្តឈប់ចតនោះ គ្រាន់តែគេឈប់រងចាំយកក្រដាស់ច្បាប់PC តែប៉ុណ្ណោះ។
ដោយមានការងឿងឆ្ងល់ប្រជាពលរដ្ឋបានលើកជាសំណួរថា តើច្បាប់ដែលជំនាញចេញឲ្យរថយន្តដឹកឈើនោះ ហេតុអ្វីមិនប្រគល់ឲ្យពេលវាស់វែងក្នុងក្រុមហ៊ុន ចាំបាច់អ្វីលើកដាក់ ដឹករួច ទើបកាន់PCរត់តាមរថយន្តដឹកឈើបែបនោះទៅវិញ។ នៅមិនទាន់ទទូលបានការអះអាងអំពីការពាក់ព័ន្ធ និងការដេញថ្លៃឈើ តើមានបរិមាណប៉ុន្មានម៉ែតគូប ប្រើពេលដឹកជញ្ជួនរយៈពេលប៉ុន្មានថ្ងៃ ពីសំណាក់មន្ត្រីជំនាញនៅឡើយទេ៕
ចែករំលែកព័តមាននេះ