ខេត្តបាត់ដំបង ៖ ថ្លែងនៅក្នុងពិធីសំណេះសំណាល និងសួរសុខទុក្ខសមាជិកសមាគមអតីតយុទ្ធជនកម្ពុជា នៅស្រុកបវេល កាលពីថ្ងៃទី០១ ធ្នូ លោកហ៊ុន ម៉ាណែត អគ្គលេខាធិការរងគណៈអចិន្ត្រៃយ៍នៃគណៈកម្មាធិការកណ្តាលសមាគមអតីតយុទ្ធជនកម្ពុជាបានបញ្ជាក់ថា សន្តិភាពគឺមានតម្លៃណាស់ ដូច្នេះការស្វែងយល់ពីតម្លៃសន្តិភាព គឺស្វែងយល់ពីការខិតខំរបស់អ្នកស្វែងរកសន្តិភាពគឺអតីតយុទ្ធជន ដែលបានលះបងសាច់ស្រស់ ឈាមស្រស់ ក្នុងការស្វែងរកសន្តិភាពជូនប្រជាជន ហើយនេះជាគុណបំណាច់របស់អតីតយុទ្ធជន និងជាមោទនភាព សម្រាប់មនុស្សគ្រប់គ្នា។
លោកហ៊ុន ម៉ាណែត ថ្លែងបញ្ជាក់ថា ដោយសារតែគុណបំណាច់ដ៏ធំធេងរបស់អតីតយុទ្ធជននោះហើយ ទើបជានិច្ចកាល សម្តេច ហ៊ុន សែន នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា មិនបោះបង់អតីតយុទ្ធជននោះទេគឺបានខិតខំយកចិត្តទុកដាក់ដោះស្រាយនូវតម្រូវការផ្សេងៗ ដើម្បីលើកស្ទួយជីវភាពរស់នៅ និងលើកតម្កើងកិត្តិយសអតីតយុទ្ធជន តាមរយៈគោលនយោបាយរាជរដ្ឋាភិបាលនិងយន្តការប្រកបដោយប្រសិទ្ធភាព ។
លោក ហ៊ុន ម៉ាណែត ថ្លែងថា គោលនយោបាយរបសរាជរដ្ឋាភិបាលកម្ពុជាគឺ លើកម្ពស់ជីវភាពមន្ត្រីរាជការស៊ីវិល កងកម្លាំងប្រដាប់អាវុធ អតីតយុទ្ធជន តាមរយៈការតម្លើងប្រាក់បៀវត្ស ការផ្តល់ទីជម្រក ការផ្តល់ដីសម្បទានដល់អតីតយុទ្ធជនដែលមានជីវភាពលំបាក និងអត្ថប្រយោជន៍ផ្សេងៗទៀត ។ តំណាងអោយប្រជាជនទាំងអស់លោក ហ៊ុន ម៉ាណែត ក៏បានថ្លែងនូវការដឹងគុណ និងគុណូបការៈនូវការលះបង់របស់អតីតយុទ្ធជនក្នុងការបំពេញភារកិច្ចស្វែងរកសន្តិភាពជូនប្រជាជន។
ចែករំលែកព័តមាននេះ