ប្តីសារភាពពីមូលហេតុជះទឹកអាស៊ីតដាក់ប្រពន្ធ
ខេត្តកំពង់ចាម ៖ បន្ទាប់ពីស្ត្រីម្នាក់ត្រូវបានគេលបជះទឹកអាស៊ីតកាលពីវេលាម៉ោងប្រហែល៥ទៀបភ្លឺ ថ្ងៃទី១ ខែធ្នូ ឆ្នាំ២០១៦ នៅភូមិទី១០ ឃុំព្រែកតានង់ ស្រុកកោះសូទិន …
ខេត្តកំពង់ចាម ៖ បន្ទាប់ពីស្ត្រីម្នាក់ត្រូវបានគេលបជះទឹកអាស៊ីតកាលពីវេលាម៉ោងប្រហែល៥ទៀបភ្លឺ ថ្ងៃទី១ ខែធ្នូ ឆ្នាំ២០១៦ នៅភូមិទី១០ ឃុំព្រែកតានង់ ស្រុកកោះសូទិន សមត្ថកិច្ចបានធ្វើការស្រាវជ្រាវយ៉ាងល្អិតល្អន់រហូតកំណត់មុខសញ្ញា និងចាប់ខ្លួនជនសង្ស័យជាប្តីដែលជាអ្នកជះទឹកអាស៊ីតដាក់ប្រពន្ធខ្លួនឯងបានកាលពីរសៀលថ្ងៃដដែល ។
គួររម្លឹកថា ត្រឡប់ពីបត់ជើងវិញ ស្រាប់តែស្រែកទ្រហោយំ
នគរបាលស្រុកកោះសូទិនបានឲ្យដឹងថា បុរសជាប្តីដែលត្រូវបានចាប់ខ្លួនឈ្មោះ សេង ប៊ុនណាត អាយុ៤១ឆ្នាំ ចំណែកប្រពន្ធរងគ្រោះឈ្មោះ នង់ សុខឡេង អាយុ៣៩ឆ្នាំ រស់នៅភូមិទី១០ ឃុំព្រែកតានង់ ស្រុកកោះសូទិន ។ ប្តីប្រពន្ធនេះមានកូន២នាក់ ប្រុសម្នាក់ ស្រីម្នាក់ កូនច្បងមានអាយុ១៨ឆ្នាំហើយ ។
នគរបាលស្រុកកោះសូទិនបានឲ្យដឹងទៀតថា ក្រោយពីបានជះទឹកអាស៊ីតដាក់ប្រពន្ធហើយ ជនសង្ស័យជាប្តីបានប្រើល្បិចរត់មកជួយប្រពន្ធ ដឹកទៅយកសង្គ្រោះនៅមន្ទីរពេទ្យបង្អែកស្រុកស្រីសន្ធរ តែល្បិចនេះត្រូវបានសមត្ថកិច្ចស្រាវជ្រាវដឹង ហើយចាប់ខ្លួនតែម្តង ។
នៅចំពោះមុខសមត្ថកិច្ច ជនសង្ស័យជាប្តីបានឲ្យដឹងថា គាត់និងប្រពន្ធ ព្រមទាំងកូន២នាក់បាននាំគ្នាចេញទៅរស់នៅក្រុងបានលុង ខេត្តរតនគិរី ប្រកបរបរជាងតោនរថយន្ត ។ កាលពីអំឡុងខែតុលា ឆ្នាំ២០១៦ ខ្លួនបានឲ្យប្រពន្ធខ្ចីលុយប្អូនថ្លៃ៣០០ដុល្លារដើម្បីដាក់ហ៊ុនរកស៊ីទិញឈើពីប្រជាពលរដ្ឋជាមួយមិត្តភក្តិ ។ ៣-៤ថ្ងៃក្រោយមកមិនឃើញមានឈើប្រពន្ធរបស់ខ្លួនក៏បានទារលុយវិញ តែខ្លួន(ប្តី)ប្រាប់ថា ចាំ២-៣ថ្ងៃទៀត ខ្លួននឹងទៅទារលុយយកមកវិញ ។ ពេលដល់ថ្ងៃកំណត់ទារមិនបាន ប្រពន្ធខឹងចោទប្រកាន់ថា ខ្លួនយកលុយឲ្យស្រី ហើយក៏រករឿងសុំលែងនៅសាលាក្រុងបានលុង ខេត្តរតនគិរី រួចប្រពន្ធគាត់ក៏បានចាកចេញមករស់នៅស្រុកកំណើតវិញនៅកោះសូទិន ។
ជនសង្ស័យជាប្តីបានសារភាពថា មុនពេលកើតហេតុ១សប្តាហ៍គាត់(ប្តី)បានត្រឡប់មកផ្ទះសុំរួមរស់ជាមួយប្រពន្ធដូចដើមវិញ តែប្រពន្ធមិនព្រមឡើយ ដោយឲ្យខ្លួនដេកក្រោមផ្ទះ រីឯប្រពន្ធដេកនៅលើផ្ទះ ហើយផ្តាច់ការរួមសង្វាសជាប្តីប្រពន្ធ ធ្វើឲ្យខ្លួនខឹងយ៉ាងខ្លាំងក៏បានទៅទិញទឹកអាស៊ីតពីផ្សារមកទុកសម្រាប់ចាក់លើប្រពន្ធឲ្យខូចមុខមាត់ដើម្បីកុំឲ្យគេស្រឡាញ់ តែដោយអាណិតប្រពន្ធ និងកូន ខ្លួនមិនដាច់ចិត្តចាក់ទឹកអាស៊ីតដាក់ប្រពន្ធឡើយ ក៏លាក់ទុកក្នុងដបប្រេងម៉ាស៊ីន ។
ជនសង្ស័យជាប្តីសារភាពបន្តទៀតថា លុះនៅយប់ថ្ងៃទី៣០ ខែវិច្ឆិកា ឆ្នាំ២០១៦ ខ្លួនបានឮប្រពន្ធមិត្តភក្ដិរស់នៅក្បែរគ្នាបានទូរស័ព្ទមកគំរាមប្រពន្ធខ្លួនថា ឲ្យឈប់ឲ្យទាក់ទងប្តីគេទៀត ធ្វើឲ្យគេខឹងប្រពន្ធកាន់តែខ្លាំង ។ លុះវេលាទៀបភ្លឺពេលប្រពន្ធដើរទៅបត់ជើងនៅបន្ទប់ទឹកចំហៀងផ្ទះនោះ គាត់បានពួនសំងំនៅកៀនបង្គន់ ដោយមិនឱ្យប្រពន្ធដឹងឡើយ ពេលប្រពន្ធដើរចេញវិញបានប្រហែល៣ម៉ែត្រ ខ្លួនក៏បានយកទឹកអាស៊ីតដែលលាយជាមួយទឹកពាក់កណ្តាលមកជះលើស្រោចលើប្រពន្ធតែម្តង ៕
ចែករំលែកព័តមាននេះ