យោងតាមទីភ្នាក់ងារព័ត៌មានរុស្ស៊ី SPUTNIK ថាយានអវកាសកាហ្គោរុស្ស៊ីដែលបញ្ជូនទៅផ្គត់ផ្គង់សម្ភារដល់ស្ថានីយអវកាសអន្តរជាតិ ISS បានផ្ទុះឆេះពេលកំពុងហោះហើរ៦នាទីក្រោយការបាញ់បង្ហោះកាលពីថ្ងៃទី១ ធ្នូ ចេញពីមជ្ឈមណ្ឌលបៃកូនួរ ។
តាមTWITTER ទីភ្នាក់ងារអវកាសរុស្ស៊ី ROSKOSMOS ថ្លែងថា ដោយសារសភាពការណ៍មិនប្រក្រតី យើងបាត់បង់យានអវកាសផ្គត់ផ្គង់PROGRESSក្នុងកម្ពស់១៩០គ.ម ពីលើតំបន់ពុំមានមនុស្សរស់នៅនិងភ្នំនៅសាធារណរដ្ឋរុស្ស៊ីទូវ៉ា ។ បំណែកយានភាគច្រើនត្រូវឆេះក្នុងបរិយាកាសតែទោះបីយ៉ាងណាតាមវីដេអូមួយបំណែកទាំងឡាយរបស់យាននោះត្រូវបានរកឃើញនៅសាធារណរដ្ឋទូវ៉ាតំបន់ស៊ីបេរី ។
យានPROGRESS ដែលផ្ទុកស្បៀងនិងរបស់របរផ្សេងៗទម្ងន់២តោនកន្លះសម្រាប់ផ្គត់ផ្គង់ដល់ស្ថានីយ ISS ត្រូវបានបាញ់បញ្ជូននាវេលាម៉ោង១៤និង៥១នាទីម៉ោងសាកល ចេញពីប្រទេសកាហ្សាក់ស្ថាន ក៏បុ៉ន្តែរាល់ការទាក់ទងរបស់យានជាមួយបណ្តាអ្នកត្រួតពិនិត្យការហោះហើរបានបាត់ ក្រោយពីមានភ្លើងឆេះនៅជាន់ទី៣នៃកាំជ្រួចបញ្ជូន ។ មូលហេតុនៃគ្រោះថ្នាក់នោះដែលកើតមានក្នុងកម្ពស់១៩០គ.មនៅពុំទាន់កំណត់ដឹងនៅឡើយ ។
ទោះបីយ៉ាងណា សមាជិកទាំង៦រូបនៃក្រុមប្រចាំការនៅស្ថានីយ ISS ដែលហោះហើរតាមតារាវិថីកម្ពស់ប្រមាណជា៤០០គ.មពីផែនដីពុំមានគ្រោះថ្នាក់ឡើយព្រោះពួកគេមានស្បៀងនិងរបស់ប្រើប្រាស់ចាំបាច់អាចប្រើបានច្រើនខែ ។
នេះជាលើកទី៤ហើយរយៈពេល២ឆ្នាំដែលការបញ្ជូនយានផ្គត់ផ្គង់ស្ថានីយ ISS ត្រូវបរាជ័យរួចជាបរាជ័យលើកទី២របស់យានPROGRESS ។
ក្រុមហ៊ុនឯកជនអាមេរិក SPACEX ជាក្រុមហ៊ុនមួយក្នុងចំណោមក្រុមហ៊ុនអាមេរិកដែលរ៉ាប់រងការផ្គត់ផ្គង់ដល់ស្ថានីយ ISS បានបាត់បង់កាំជ្រួចមួយកាលពីថ្ងៃទី១ កញ្ញា នៅជើងទម្របាញ់បង្ហោះ CAP CANAVERAL ។ បេសកកម្មផ្គត់ផ្គង់នាពេលខាងមុខរបស់ SPACEX គ្រោងធ្វើនាខែមករាខាងមុខ តែទីភ្នាក់ងារអវកាសជប៉ុនក៏ត្រូវបញ្ជូនយានអវកាសមួយទៅកាន់ ISS ដែរនាថ្ងៃទី៩ ធ្នូ ៕
ចែករំលែកព័តមាននេះ