ព្រះអង្គម្ចាស់រជ្ជទាយាទថៃមហាវ៉ាជីរ៉ាឡុងកន ទ្រង់យល់ស្របតាមសំណើរបស់ប្រធានសភាថៃឡើងគ្រងរាជបល្លង្ក ដូច្នេះទ្រង់ត្រូវប្រកាសជាផ្លូវការជាព្រះមហាក្សត្រថ្មីថៃក្រោមព្រះនាមព្រះរាមាទី១០ នា
ព្រះអង្គម្ចាស់រជ្ជទាយាទថៃមហាវ៉ាជីរ៉ាឡុងកន ទ្រង់យល់ស្របតាមសំណើរបស់ប្រធានសភាថៃឡើងគ្រងរាជបល្លង្ក ដូច្នេះទ្រង់ត្រូវប្រកាសជាផ្លូវការជាព្រះមហាក្សត្រថ្មីថៃក្រោមព្រះនាមព្រះរាមាទី១០ នាឱកាសពិធីមួយផ្សាយបន្តផ្ទាល់តាមទូរទស្សន៍កាលពីយប់ថ្ងៃទី១ ធ្នូ ។
ព្រះមហាក្សត្រថ្មីទ្រង់មហាវ៉ាជីរ៉ាឡុងកន មានបន្ទូលតាមទូរទស្សន៍ក្នុងពិធីនោះថា យោងតាមច្បាប់ព្រះបរមរាជវាំងនិងរដ្ឋធម្មនុញ្ញ ខ្ញុំព្រមទទួលយកសំណើឡើងគ្រងរាជក្លាយជាព្រះមហាក្សត្រដោយគោរពតាមព្រះរាជតម្រិះ របស់ព្រះមហាក្សត្រដែលសោយទិវង្គដើម្បីសុខុមាលភាពរបស់ប្រជាជនថៃទាំងមូល ។
បន្ទាប់ពីបន្ទូលនោះរបស់ព្រះមហាក្សត្រថ្មីនាយករដ្ឋមន្ត្រីថៃលោកប្រាយុទ្ធ ចាន់អូចា ថ្លែងសង្កថាមួយដោយប្រកាសជាផ្លូវការថា «ពេលនេះយើងមានព្រះមហាក្សត្រថ្មីហើយ»។ ព្រះនាមផ្លូវការរបស់ព្រះមហាក្សត្រវ៉ាជីរ៉ាឡុងកន គឺ«ព្រះករុណាមហាវ៉ាជីរ៉ាឡុងកន បូឌីនដ្រាដឺបាយ៉ាវ៉ារ៉ាងឃុន» ។ ពិធីផ្សាយបន្តផ្ទាល់តាមទូរទស្សន៍នោះបង្ហាញថាប្រធានសភាជាតិថៃលោក PORNPETCH WI CHIT CHOLCHAI នាយករដ្ឋមន្ត្រីលោកប្រាយុទ្ធចាន់អូចា ប្រធានតុលាការកំពូលលោក VEERAPOL TUNGSUWAN និងទីប្រឹក្សាព្រះមហាក្សត្រលោកព្រេមទីនស៊ូណាណុន ត្រូវបានទទួលធ្វើសវនាការដោយព្រះរជ្ជទាយាទនៅព្រះបរមរាជវាំងឌូសិត ក្រុងបាងកកនាថ្ងៃទី១ ធ្នូ វេលាម៉ោង១៩និង១៦នាទីម៉ោងក្នុងស្រុក ។ នាឱកាសសវនាការនោះលោក PORNPETCH បានទូលស្នើយាងព្រះអង្គម្ចាស់ ឡើងគ្រងរាជបល្លង្កជាផ្លូវការ ។
បន្ទាប់ពីទ្រង់ទទួលយកសំណើនោះព្រះអង្គម្ចាស់វ៉ាជីរ៉ាឡុងកន ក្លាយជាព្រះមហាក្សត្រ រាមាទី១០ ជាស្តេចទី១០នៃរជ្ជកាលចក្រី ដែលបង្កើតឡើងកាលពីឆ្នាំ១៧៨២ ។ ទ្រង់ឡើងគ្រងរាជបន្តពីព្រះបិតាព្រះមហាក្សត្រភូមីបុល អាឌុលយ៉ាដេត ដែលសោយព្រះទិវង្គតកាលពីថ្ងៃទី១៣ តុលា ក្នុងព្រះជន្ម៨៨ព្រះវស្សា ។
ការឡើងគ្រងរាជជាផ្លូវការរបស់ព្រះមហាក្សត្រថ្មីពុំអាចប្រព្រឹត្តទៅមុនពិធីបូជាព្រះសពរបស់ព្រះបិតាទ្រង់ឡើយ ។ ពិធីបូជាព្រះសពនោះនឹងធ្វើនាឆ្នាំខាងមុខនេះ ។ ទោះបីយ៉ាងណា នាយករដ្ឋមន្ត្រីថៃ លោកចាន់អូចា ប្រកាសថា ការគ្រងរាជរបស់ព្រះមហាក្សត្រថ្មី ចាប់ផ្តើមជាផ្លូវការតាំងពីថ្ងៃទី១៣ តុលា ២០១៦មក ។
ប្រសូតថ្ងៃទី២៨ កក្កដា ១៩៥២ នៅក្រុងបាងកកព្រះមហាក្សត្រវ៉ាជីរ៉ាឡុងកន មានព្រះជន្ម៦៤ព្រះវស្សាជាបុត្រទី២ក្នុងចំណោមបុត្រទាំង៤អង្គរបស់ព្រះមហាក្សត្រភូមីបុល អាឌុលយ៉ាដេត និងព្រះមហាក្សត្រីយានីស៊ីរីគិត។ ទ្រង់ជាបុត្រាមួយអង្គគត់ដែលនាឆ្នាំ១៩៧២ ពេលទ្រង់មានព្រះជន្ម២០ព្រះវស្សា ត្រូវបានព្រះបិតាជ្រើសតាំងជាព្រះរជ្ជទាយាទ។ ទ្រង់ចាប់ផ្តើមសិក្សាបឋមសិក្សាក្នុងឆ្នាំ១៩៥៦ ហើយបន្ទាប់មកទៅកាន់ប្រទេសអង់គ្លេស និងអូស្ត្រាលី ដើម្បីបន្តការសិក្សានៅទីនោះ មុនពេលទទួលការបណ្តុះបណ្តាលខាងយោធានៅប្រទេសអូទ្រីសរយៈពេលជាច្រើនឆ្នាំ ។ យោងតាមព្រះរាជជីវប្រវត្តិព្រះមហាក្សត្រថ្មីថៃជាអ្នកបើកឧទ្ធម្ភាគចក្រ និងយន្តហោះប្រដេញដែលមានទេពកោសល្យ ។ ទ្រង់កាន់តំណែងជាន់ខ្ពស់ជាច្រើនក្នុងកងទ័ពជើងគោក ជើងទឹក និងជើងអាកាសថៃ ៕
ចែករំលែកព័តមាននេះ