ចាស់ជរាគ្មានទីពឹង២០នាក់ទទួលអំណោយមនុស្សធម៌ពីសប្បុរសជនប្រទេសបារាំង
ខេត្តពោធិ៍សាត់ ៖ ចាស់ជរាគ្មានទីពឹង និងជនពិការចំនួន២០នាក់ ដែលក្រីក្រគ្មានទីពឹង ត្រូវបានសប្បុរសជនមកពីប្រទេសបារាំងធ្វើអំណោយជូនតាមរយៈលោកមេធាវី …
ខេត្តពោធិ៍សាត់ ៖ ចាស់ជរាគ្មានទីពឹង និងជនពិការចំនួន២០នាក់ ដែលក្រីក្រគ្មានទីពឹង ត្រូវបានសប្បុរសជនមកពីប្រទេសបារាំងធ្វើអំណោយជូនតាមរយៈលោកមេធាវី …
ខេត្តពោធិ៍សាត់ ៖ ចាស់ជរាគ្មានទីពឹង និងជនពិការចំនួន២០នាក់ ដែលក្រីក្រគ្មានទីពឹង ត្រូវបានសប្បុរសជនមកពីប្រទេសបារាំងធ្វើអំណោយជូនតាមរយៈលោកមេធាវី ថន បូរី កាលពីរសៀលថ្ងៃទី០១ ខែធ្នូ ឆ្នាំ២០១៦ ។
ពិធីនេះប្រារព្ធធ្វើនៅការិយាល័យរបស់លោកមេធាវីផ្ទាល់ដែលស្ថិតនៅក្នុងភូមិមាន់ចែ សង្កាត់ព្រៃញី ក្រុងពោធិ៍សាត់ដោយមានការចូលរួមពីសប្បុរសជនជាម្ចាស់អំណោយ និងតំណាងអភិបាលក្រុងពោធិ៍សាត់ផងដែរ ។
លោកមេធាវី ថន បូរី បានជំរាបជូនថា នៅពេលដែលលោកមកធ្វើការនៅខេត្តពោធិ៍សាត់ជិត១០ឆ្នាំមកនេះ លោកមានការចាប់អារម្មណ៍ដោយក្ដីអាណិតអាសូរចំពោះជនចាស់ជរា ជនពិការគ្មានទីពឹង និងអ្នកផ្ទុកមេរោគអេដស៍ ដែលរស់នៅតាមមាត់ប្រឡាយ និងតាមសំយ៉ាបផ្ទះអ្នកដទៃ ។ លោកតែងតែចែករំលែកនូវអ្វីដែលលោកមាន ដូចជាអង្ករ គ្រឿងឧបភោគបរិភោគ សម្លៀកបំពាក់ និងថវិកាជាដើម ដើម្បីជួយដល់ពួកគាត់ ទោះបីតិចតួចក៏ដោយ ប៉ុន្តែវាជាមនោសញ្ចេតនារបស់លោកដែលមើលឃើញការលំបាកជាក់ស្ដែង ។ ក្រោយមកលោកបានទំនាក់ទំនងជាមួយលោក ប៊ុយរ៉េស ដូម៉ូនិច និងលោកស្រី សួន សាវី ដែលរស់នៅប្រទេសបារាំងធ្វើជាប្រធានមូលនិធិនៅទីនោះ ដើម្បីប្រមូលថវិកាយកមកជួយដល់ជនក្រីក្រ គ្មានទីពឹង នៅក្នុងប្រទេសកម្ពុជាយើង ។ រយៈពេលជិត១០ឆ្នាំនេះលោក ប៊ុយរ៉េស ដូម៉ូនិច និងលោកស្រី សួន សាវី ប្រមូលបានថវិកាពីប្រជាជននៅប្រទេសបារាំង ហើយបានយកមកទិញអង្ករ គ្រឿងឧបភោកបរិភោគ និងសម្ភារប្រើប្រាស់ចែកជូនដល់ប្រជាពលរដ្ឋក្រីក្រនៅក្នុងប្រទេសកម្ពុជាយើងគ្រប់ខេត្តក្រុងជារៀងរាល់ឆ្នាំ ។
ជាក់ស្ដែងថ្ងៃនេះលោកបានធ្វើជាអំណោយជូនដល់ចាស់ជរា និងជនពិការគ្មានទីពឹងចំនួន២០នាក់ទៀត ដែលបានជ្រើសរើសមកពី៧សង្កាត់ក្នុងក្រុងពោធិ៍សាត់ ។ អំណោយទាំងនេះបានផ្ដល់ជូនម្នាក់ៗទទួលបានអង្ករ៤០គីឡូក្រាម, មី១កេស, ទឹកត្រី៦ដប, ទឹកស៊ីអ៊ីវ៦ដប, ត្រីខ១០កំប៉ុង, អំបិលកន្លះគីឡូក្រាម, ប៊ីចេងកន្លះគីឡូក្រាម, ស្ករស១គីឡូក្រាម, សាប៊ូម្ស៉ៅកន្លះគីឡូក្រាម, ប្រេងក្រឡា១ប្រអប់, ក្រមា១ និងថវិការ២០០០០រៀល ។
លោក ប៊ុយរ៉េស ដូម៉ូនិច ជនជាតិបារាំង ដែលមានភរិយាជាជនជាតិខ្មែរ បាននិយាយថា គាត់នឹងខិតខំរៃអង្គាសថវិកាពីប្រជាជននៅប្រទេសបារាំង ដើម្បីយកមកជួយដល់ជនពិការ ចាស់ជរា គ្មានទីពឹង និងអ្នកផ្ទុកមេរោគអេដស៍បន្តទៀតដើម្បីចូលរួមចែករំលែកជាមួយកាកបាទក្រហម និងរាជរដ្ឋាភិបាលកម្ពុជា ៕
ចែករំលែកព័តមាននេះ