ពោតផ្ដល់នូវអត្ថប្រយោជន៍ចំពោះសុខភាពជាច្រើន ដោយសារតែវត្តមាននៃសារធាតុចិញ្ចឹមដែលមានគុណភាព ។ ក្រៅពីបន្ថែមរសជាតិដ៏ឆ្ងាញ់ដល់អាហាររបស់អ្នក វាក៏សម្បូរសារធាតុគីមីរុក្ខជាតិផងដែរ ហើយវាផ្តល់នូវការការពារប្រឆាំងនឹងជំងឺរ៉ាំរ៉ៃមួយចំនួន។ អត្ថប្រយោជន៍សុខភាពដែលទទួលបានមកពីការស្រាវជ្រាវផ្លែពោតមានដូចខាងក្រោម ។
ប្រភពកាឡូរីជាច្រើនប្រភេទ ៖ ពោតគឺជាអាហារសម្បូរទៅដោយជាតិកាឡូរី ។ បរិមាណកាឡូរីរបស់ពោតគឺ 342កាឡូរីក្នុង100ក្រាម ដែលខ្ពស់បំផុតសម្រាប់អាហារបែបគ្រាប់ធញ្ញជាតិ ។ វាគឺជាមូលហេតុដែលពោតត្រូវបានគេទទួលទានដើម្បីឱ្យមានការឡើងទម្ងន់យ៉ាងឆាប់រហ័ស និងមានការរីកលូតលាស់លឿន បរិមាណកាឡូរីក្នុងកម្រិតខ្ពស់ ធ្វើឱ្យវាមានសារៈសំខាន់ណាស់សម្រាប់ការរស់រានមានជីវិតនៃមនុស្សទូទៅ ។
ការពារបេះដូងរបស់អ្នក៖ យោងតាមក្រុមអ្នកស្រាវជ្រាវ ប្រេងពោតត្រូវបានគេបង្ហាញថា មានឥទ្ធិពលប្រឆាំងនឹងការកើនឡើងជាតិខ្លាញ់នៅតាមសរសៃឈាម ដោយសារកូឡេស្តេរ៉ុល ដូច្នេះវាអាចកាត់បន្ថយហានិភ័យនៃជំងឺសរសៃឈាមបេះដូងបានច្រើន ។ ប្រេងពោត គឺជាវិធីល្អបំផុតដើម្បីបង្កើនសុខភាពបេះដូង ហើយពោតគឺជាការរួមបញ្ចូលគ្នាមួយដែលល្អប្រសើរបំផុតនៃអាស៊ីតខ្លាញ់ ។ វាអាចឲ្យអាស៊ីតខ្លាញ់អូមេហ្គា3បំផ្លាញកូឡេស្តេរ៉ុល«អាក្រក់» និងជំនួសពួកវាដោយកូឡេស្តេរ៉ុលល្អៗវិញ ។ វានឹងកាត់បន្ថយឱកាសនៃការកកឈាមក្នុងសរសៃអារទែ កាត់បន្ថយសម្ពាធឈាម និងបន្ថយការគាំងបេះដូង និងជំងឺដាច់សរសៃឈាមខួរក្បាល ។
ការពារជំងឺស្លេកស្លាំង៖ ពោតជួយការពារជំងឺខ្វះគោលិកាឈាមក្រហម ដែលបង្កឡើងដោយកង្វះវីតាមីន ។ ពោតមានកម្រិតជាតិដែកដ៏សំខាន់ ដែលជាសារធាតុរ៉ែដ៏ចាំបាច់ក្នុងការបង្កើតជាកោសិកាឈាមក្រហមថ្មី កង្វះជាតិដែក គឺជាមូលហេតុដ៏សំខាន់នៃជំងឺខ្វះគោលិកាឈាមក្រហមផងដែរ ។
បន្ថយកូឡេស្តេរ៉ុលអាក្រក់៖ យោងតាម Journal of Nutritional Biochemistry ការទទួលទានប្រេងសម្បកពោតជួយបន្ថយប្លាស្មាកូឡេស្តេរ៉ុល ដោយកាត់បន្ថយការស្រូបយកកូឡេស្តេរ៉ុលក្នុងរាងកាយ ។ ដូចបានរៀបរាប់ខាងលើ ការកាត់បន្ថយកូឡេស្តេរ៉ុលអាក្រក់នេះ មិនមែនមានន័យថា ក៏កាត់បន្ថយកូឡេស្តេរ៉ុលល្អ HDL នោះដែរទេ ។ កូឡេស្តេរ៉ុលល្អមានផលប្រយោជន៍ដល់រាងកាយជាច្រើន រួមបញ្ចូលទាំងកាត់បន្ថយជំងឺបេះដូង បង្ការការកកខ្លាញ់តាមសរសៃឈាម និងបំផ្លាញរ៉ាឌីកាល់សេរីនៅទូទាំងរាងកាយ ៕
ចែករំលែកព័តមាននេះ