រាជធានីភ្នំពេញ ៖ ព្រំ សំណាង មកពីក្លិបកងទ័ពពិសេសឆត្រយោង៩១១ និងសុខ ទូចមកពីក្លិបដែនសមុទ្រមានរិទ្ធ នឹងត្រូវជួបប្រកួតជាមួយកីឡាករថៃជាលើកទី៤ ក្នុងព្រឹត្តិការណ៍ប្រដាល់ដណ្ដើមខ្សែក្រវាត់
រាជធានីភ្នំពេញ ៖ ព្រំ សំណាង មកពីក្លិបកងទ័ពពិសេសឆត្រយោង៩១១ និងសុខ ទូចមកពីក្លិបដែនសមុទ្រមានរិទ្ធ នឹងត្រូវជួបប្រកួតជាមួយកីឡាករថៃជាលើកទី៤ ក្នុងព្រឹត្តិការណ៍ប្រដាល់ដណ្ដើមខ្សែក្រវាត់គោជល់ប្រភេទទម្ងន់៧៥គីឡូក្រាម នៅលើសង្វៀនទូរទស្សន៍ភីអិនអិន ថ្ងៃអាទិត្យ ទី៤ ធ្នូ ។
ការប្រកួតនៅក្នុងសប្ដាហ៍នេះ ព្រំ សំណាងត្រូវជួបប្រកួតជាមួយកីឡាករថៃឈ្មោះ កាំឡាយផេត ខណៈ សុខ ទូច ត្រូវជួបប្រកួតជាមួយកីឡាករថៃឈ្មោះ ណាក់ រ៉បដាំ ។ ព្រំ សំណាង ប្រកួតបាន៣លើកឈ្នះទាំង៣លើកមាន៩ពិន្ទុ ប៉ុន្តែទោះជាយ៉ាងណា កីឡាកររូបនេះគ្មានសំណាងបានឡើងទៅប្រកួតនៅវគ្គបន្តទៀតទេ បើទោះជាលើកនេះទទួលបានលទ្ធផលបែបណាក៏ដោយ ។ នៅក្នុងពូលកម្ពុជាមានតែអ៊ុង វិរៈ ម្នាក់ប៉ុណ្ណោះដែលបានឡើងទៅប្រកួតនៅវគ្គបន្ត ព្រោះរូបមន្តប្រកួតរបស់សង្វៀនទូរទស្សន៍ភីអិនអិន ចម្រាញ់យកតែកីឡាករណាដែលមានពិន្ទុច្រើនជាងគេម្នាក់ប៉ុណ្ណោះ ដើម្បីឡើងទៅប្រកួតនៅវគ្គផ្ដាច់ព្រ័ត្រទាំងពូលកម្ពុជា និងពូលថៃ ។ ចំណែក កាំឡាយផេត ប្រកួតបាន៣លើកដូចគ្នាឈ្នះ២ ចាញ់១ មាន៧ពិន្ទុ ប៉ុន្តែនៅក្នុងពូលថៃមានតែឌីស៊ែល លេក ប៉ុណ្ណោះ ដែលកំពុងតែមានពិន្ទុនាំមុខគេ។
ចំណែកការប្រកួតរវាង សុខ ទូច និងកីឡាករថៃណាក់ រ៉បដាំ វិញ ធ្វើឡើងដើម្បីបង្គ្រប់កិច្ចដូចគ្នា ។ សម្រាប់គូនេះប្រកួតបាន៣លើកឈ្នះ១ ចាញ់២ មាន៥ពិន្ទុដូចគ្នា។ សុខ ទូច ប្រកួតលើកនេះប្រហែលជាពិបាកបន្តិចហើយ ព្រោះអីការប្រកួតទាំង៣លើកមកនេះ ត្រូវគូប្រកួតវាយឱ្យសន្លប់ចំនួន២លើករួចមកហើយ ។
រីឯគូប្រកួតមិត្តភាពនៅក្នុងសប្ដាហ៍នេះមានកីឡាករ អេ មេសាង មកពីក្លិបអេភូថងកីឡា ប្រកួតជាមួយកីឡាករខ្លើយ ណាង មកពីក្លិបតាព្រហ្មមានជ័យ ។ កីឡាករ សូត្រ ខេវិន មកពីក្លិបបក្សីស្លាបដែក ប្រកួតជាមួយកីឡាករ គង់ ហូវ មកពីក្លិបកងពលធំអន្តរាគមន៍លេខ២ និងគូចុងក្រោយកីឡាករផល សុភា មកពីក្លិបភារម្យគុនខ្មែរ ប្រកួតជាមួយកីឡាករ ជ័យ សុគា មកពីក្លិបកងទ័ពពិសេសឆត្រយោង៩១១ ៕
ចែករំលែកព័តមាននេះ