រាជធានីភ្នំពេញ ៖ លោក ហូ សិទ្ធិគុណ ប្រធានសហព័ន្ធកីឡាយានយន្តកម្ពុជា បានមានប្រសាសន៍ឱ្យដឹងក្នុងសន្និសីទសារព័ត៌មានមួយ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី៣០ វិច្ឆិកា
រាជធានីភ្នំពេញ ៖ លោក ហូ សិទ្ធិគុណ ប្រធានសហព័ន្ធកីឡាយានយន្តកម្ពុជា បានមានប្រសាសន៍ឱ្យដឹងក្នុងសន្និសីទសារព័ត៌មានមួយ នៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី៣០ វិច្ឆិកា កន្លងមកនេះថា នៅថ្ងៃទី២១ មករា ឆ្នាំ២០១៧ សហព័ន្ធកីឡាយានយន្តកម្ពុជា នឹងរៀបចំព្រឹត្តិការណ៍ប្រកួតប្រចាំឆ្នាំដ៏ធំមួយ នៅទីលានអាកាសយានដ្ឋានបាត់ដំបង ខេត្តបាត់ដំបង ។
លោកបានឱ្យដឹងទៀតថា ព្រឹត្តិការណ៍ប្រកួតបែបនេះ គឺមិនធ្លាប់មានពីមុនមកឡើយ ។ ការប្រកួតនេះ មានទាំងរថយន្ត ទោចក្រយានយន្ត និងមានការហោះហើរនូវយន្តហោះប្រភេទតូចជាច្រើនគ្រឿង ព្រមទាំងមានលោតឆត្រយោងទៀតផង ។ ការប្រកួតនេះ គឺបើកទូលាយដល់អ្នកមានបំណងចង់មកចុះឈ្មោះចូលរួមប្រកួត គ្រាន់តែតម្រូវឱ្យបង់ប្រាក់៣០ដុល្លារអាមេរិកក្នុង១នាក់ ។ ចំណែកថវិកាដែលទទួលបានពីការរៀបចំព្រឹត្តិការណ៍នេះ មួយចំនួននឹងយកទៅជួយជនក្រីក្រ និងអ្នកខ្វះទីពឹង ។
លោក ហូ សិទ្ធិគុណ បញ្ជាក់ថា ព្រឹត្តិការណ៍កីឡាប្រណាំងយានយន្តដែលធ្វើឡើងជារៀងរាល់ឆ្នាំនេះធ្វើឡើងក្នុងគោលបំណងរួមចំណែកលើកកម្ពស់ការអប់រំសុវត្ថិភាពចរាចរណ៍ជាសំខាន់ ។ ការប្រកួតនេះទៀត ថ្វីដ្បិតសហព័ន្ធទើបតែប្រកាសជាផ្លូវការក្នុងពេលនេះក៏លោកសង្ឃឹមថា នឹងទទួលបានជោគជ័យ១០០% និងមានអ្នកមកចុះឈ្មោះចូលរួមប្រកួតច្រើន នេះបើយោងទៅលើបទពិសោធន៍ដែលសហព័ន្ធកីឡាយានយន្តធ្លាប់រៀបចំធ្វើអស់រយៈពេលជាច្រើនឆ្នាំកន្លងមក ។
ចំពោះមូលហេតុដែលលោកជ្រើសរើសយកទីលានអាកាសយានដ្ឋានបាត់ដំបងធ្វើជាទីលានប្រកួត ព្រោះទីនោះគឺជាខេត្តសេដ្ឋកិច្ចធំលំដាប់ទី២ បន្ទាប់ពីរាជធានីភ្នំពេញ ។ ម្យ៉ាងវិញទៀត នៅទីនោះមានទីលានធំទូលាយ មិនប៉ះពាល់ដល់សុវត្ថិភាពចរាចរណ៍ឡើយ ហើយអ្នកគាំទ្រអាចចូលរួមទស្សនាដោយសេរី ៕
ចែករំលែកព័តមាននេះ