រាជធានីភ្នំពេញ ៖ វិទ្យាស្ថានបារាំងប្រចាំកម្ពុជា នឹងបង្ហាញទស្សនីយភាពរបាំសហសម័យស្ត្រី ដែលជារបាំទទួលស្គាល់ជាផ្លូវការមុនគេនៅកម្ពុជា នាថ្ងៃសុក្រទី២៥ ខែវិច្ឆិកា ឆ្នាំ២០១៦ វេលាម៉ោង៦ និង៣០ នាទីល្ងាច
រាជធានីភ្នំពេញ ៖ វិទ្យាស្ថានបារាំងប្រចាំកម្ពុជា នឹងបង្ហាញទស្សនីយភាពរបាំសហសម័យស្ត្រី ដែលជារបាំទទួលស្គាល់ជាផ្លូវការមុនគេនៅកម្ពុជា នាថ្ងៃសុក្រទី២៥ ខែវិច្ឆិកា ឆ្នាំ២០១៦ វេលាម៉ោង៦ និង៣០ នាទីល្ងាចនៅរោងភាពយន្តវិទ្យាស្ថានបារាំង ។
យោងតាមសេចក្តីប្រកាសព័ត៌មានរបស់ វិទ្យាស្ថានបារាំងឲ្យដឹងថា សិល្បករថ្មីនៃកម្ពុជា (NCA) គឺជាក្រុមរបាំស្ត្រីមួយរបស់ក្រុមហ៊ុនរបាំមហោស្រព (Dance Theatre Company) ដែលមានមូលដ្ឋាននៅខេត្តសៀមរាប ។ ក្នុង ពេល ថ្មីៗនេះក្រុមសិល្បករថ្មីនៃកម្ពុជាត្រូវបានទទួលស្គាល់ជាផ្លូវការដោយនាយកដ្ឋានសិល្បៈនិងវប្បធម៌ ជាក្រុមរបាំសហសម័យដំបូងនៅប្រទេសកម្ពុជា ។ ពួកនាងគឺជាអ្នកផ្តួចផ្តើមនៅក្នុងវិធីសាស្ត្រសិល្បៈមួយដោយបញ្ចូលរបាំប្រពៃណីអប្សរា និងឥទ្ធិពលនៃសម័យទំនើប ។ ក្រុមនេះក៏តំណាងឱ្យការតស៊ូប្រយុទ្ធប្រឆាំងនឹងវិសមភាពសង្គមដោយលើកកម្ពស់ស្វយ័តភាពរបស់ស្ត្រីតាមរយៈរបាំ ។
តម្លៃសំបុត្រចូលទស្សនា១០ដុល្លារ (តម្លៃសំបុត្រធម្មតា) និង ៥ដុល្លារ (អាយុក្រោម ១៨ឆ្នាំ / និស្សិត) ។ សំបុត្រមានលក់នៅកន្លែងផ្ដល់ព័ត៌មាន របស់វិទ្យាស្ថានបារាំង ។
របាំសហសម័យ គឺជារបាំមួយប្រភេទដែលមិនមានទម្រង់ច្បាស់លាស់ទេ ប៉ុន្តែស្ដែងចេញពីការរស់នៅរបស់មនុស្សបច្ចុប្បន្ន ហើយរបាំសហសម័យគឺជារបាំដែលត្រូវបានបង្កើតឡើងថ្មី ដោយយករបាំបរទេសមកបូកបញ្ចូលជាមួយនឹងរបាំខ្មែរ ។
វេទិកានោះបានធ្វើឡើងក្នុងគោលបំណង ដើម្បីលើកកម្ពស់ស្នាដៃរបាំសហសម័យដែលកំពុងលេចធ្លោនៅព្រះរាជាណាចក្រកម្ពុជា និងផ្ដល់ឱកាសដល់ក្រុមសិល្បករ-សិល្បការិនីបានសម្ដែងជូនទស្សនិកជន ក៏ដូចជាបង្កើនភាពស្និទ្ធស្នាលរវាងសិល្បករ-សិល្បការិនី និងទស្សនិកជនឱ្យបានកាន់តែខ្លាំងថែមទៀត ៕
ចែករំលែកព័តមាននេះ