ខណៈនេះ ពលរដ្ឋកំពុងបិទផ្លូវជាតិលេខ៦
រាជធានីភ្នំពេញ ៖ ខណៈពេលនេះ ប្រជាពលរដ្ឋប្រមាណជាង១០គ្រួសាររស់នៅភូមិព្រែកលៀប សង្កាត់ព្រែកលៀប ខណ្ឌជ្រោយចង្វារបាននាំគ្នាបិទផ្លូវជាតិលេខ៦ …
រាជធានីភ្នំពេញ ៖ ខណៈពេលនេះ ប្រជាពលរដ្ឋប្រមាណជាង១០គ្រួសាររស់នៅភូមិព្រែកលៀប សង្កាត់ព្រែកលៀប ខណ្ឌជ្រោយចង្វារបាននាំគ្នាបិទផ្លូវជាតិលេខ៦ ដើម្បីប្រឆាំងជាមួយសមត្ថកិច្ចចម្រុះដែលចុះទៅអនុវត្តសាលដីកា កាលពីវេលាម៉ោង៩ និង៣០នាទីព្រឹក ថ្ងៃទី២៣ ខែវិច្ឆិកា ឆ្នាំ២០១៦ ។
ប្រភពព័ត៌មានពីប្រជាពលរដ្ឋបានឲ្យដឹងថា ការបិទផ្លូវជាតិលេខ៦នេះគឺធ្វើឡើងប្រឆាំងនឹងសមត្ថកិច្ចចម្រុះដែលចុះមកអនុវត្តសាលដីលេខ ១៦៣៣ គ ចុះថ្ងៃទី១៣ ខែកញ្ញា ឆ្នាំ២០១៦ ដែលសម្រេចប្រគល់ដីទំហំ ២,៥០ម៉ែត្រគុណ៥២ម៉ែត្រ ទៅឲ្យឈ្មោះ មាស ឆុន និងភរិយា អ្នកស្រី លីន ថាវី ដើម្បីកាន់កាប់ជាកម្មសិទ្ធិ ។ ប្រភពបានអះអាងថា ដីទំហំនេះពីដើមឡើយជាដីដែលពួកគាត់ធ្វើដំណើរជាយូរមកហើយ ។
ទោះបីជាយ៉ាងណាក៏ដោយ លោកចៅសង្កាត់ព្រែកលៀបបានឲ្យដឹងថា ដីទំហំនេះជាដីរបស់ឈ្មោះ មាស ឆុន ជាមន្ត្រីយោធា និងជាថៅកែហាង បឹងសំរោង ដែលបានបាក់ស្រុតកាលពីលើកមុន ដែលបានអនុញ្ញាតឲ្យប្រជាពលរដ្ឋធ្វើដំណើរឆ្លងកាត់ជាយូរណាស់មកហើយ តែក្រោយមកពេលសង្កាត់ធ្វើផ្លូវថ្មីឲ្យធ្វើដំណើរ ប្រជាពលរដ្ឋក៏នាំគ្នាធ្វើដំណើរតាមផ្លូវថ្មីដោយបោះបង់ផ្លូវចាស់ដែលជាដីកម្មសិទ្ធិរបស់លោក មាស ឆុន ។
លោកចៅសង្កាត់បន្តថា ក្រោយមកលោក មាស ឆុន បានស្នើទៅតុលាការដើម្បីសុំកាន់កាប់ដីរបស់ខ្លួនវិញ ព្រោះប្រជាពលរដ្ឋមានផ្លូវធ្វើដំណើរហើយ ទើបតុលាការសម្រេចចេញសាលដីកាសម្រេចឲ្យឲ្យកាន់កាប់ស្របច្បាប់វិញ ។
សូមបញ្ជាក់ថា ការបិទផ្លូវនេះធ្វើឡើងប្រមាណជាជិត១០នាទីប៉ុណ្ណោះ បន្ទាប់ពីអាជ្ញាធរសង្កាត់ និងអាជ្ញាធរមានសមត្ថកិច្ច បានធ្វើការសម្របសម្រួលជាមួយប្រជាពលរដ្ឋ ដោយពន្យល់ប្រជាពលរដ្ឋថា ការបិទផ្លូវនេះគឺខុសច្បាប់ ម្យ៉ាងវិញទៀតធ្វើឲ្យប៉ះពាល់ដល់ការធ្វើដំណើរឆ្លងកាត់របស់ប្រជាពលរដ្ឋទៀតផង ៕
ចែករំលែកព័តមាននេះ