Nokia បានបញ្ជាក់ថា ទូរស័ព្ទឆ្លាតវៃរបស់ខ្លួននឹងមានវត្តមានលើទីផ្សារនៅឆ្នាំក្រោយ ។ វាជាការសន្យាមួយដ៏ល្អសម្រាប់អតិថិជនរបស់ខ្លួន ដែលចង់ឲ្យមានវត្តមានទូរស័ព្ទNokia ជាថ្មីនៅក្នុងទីផ្សារទូរស័ព្ទ ។
ក្រុមហ៊ុន Nokia ត្រូវបានក្រុមហ៊ុនMicrosoft ទិញយកនៅឆ្នាំ២០១៤ ក្រោយមកម៉ូដែលទូរស័ព្ទថ្មីរបស់ខ្លួន ត្រូវជ្រកក្រោមយីហោ Lumia ប៉ុន្តែពេលនេះក្រុមហ៊ុន Microsoft បានសម្រេចចាកចេញផ្នែកពាណិជ្ជកម្មទូរស័ព្ទទាំងស្រុង ដោយប្រគល់ភារៈនេះឲ្យទៅក្រុមហ៊ុនNokia វិញ ដូច្នេះ Nokia នឹងត្រឡប់ចូលទីផ្សារជាថ្មី ។
ទូរស័ព្ទជំនាន់ថ្មីរបស់ក្រុមហ៊ុនត្រូវគេរំពឹងថា នឹងចេញមុខនៅត្រីមាសទីពីរ ឆ្នាំ២០១៧ ហើយក៏មានពាក្យចចាមអារ៉ាមថា ទូរស័ព្ទថ្មីនឹងត្រូវបង្ហាញនៅក្នុងកិច្ចប្រជុំទូរស័ព្ទពិភពលោកនាខែកុម្ភៈខាងមុខ ។
លោក Rajeev Suri នាយកប្រតិបត្តិក្រុមហ៊ុន Nokia បាននិយាយថា តាមគំរោងគឺត្រូវថ្លែងសុន្ទរកថា នៅក្នុងកិច្ចប្រជុំនោះ ហើយក្រុមហ៊ុនក៏មានស្តង់លក់ផលិតផលដែរ។ អ្នកតំណាងក្រុមហ៊ុន Nokia បាននិយាយថា ឆ្នាំក្រោយ ម៉ាក Nokia នឹងមានវត្តមានជាថ្មីលើទូរស័ព្ទឆ្លាតវៃ ។
ក្រុមហ៊ុន Microsoft បានដាក់កំណត់ឲ្យក្រុមហ៊ុន Nokia ចេញពីការផលិតទូរស័ព្ទជាមួយនឹងឈ្មោះរបស់ខ្លួនរហូតដល់ឆ្នាំ២០១៥ដែលក្រុមហ៊ុន Nokia និយាយថា ខ្លួនពិចារណាឡើងវិញពីវត្តមាន Nokia នៅក្នុងទីផ្សារវិញប្រសិនបើ ឬនៅពេលណាដែលបាន ស្វែងរកដៃគូលំដាប់ថ្នាក់ពិភពលោកបានដើម្បីចាត់ចែងការផលិត ការលក់ ទីផ្សារ និងមានការគាំទ្រពីអតិថិជន ។
ក្រុមហ៊ុន Nokia បានចាប់ដៃគូជាមួយក្រុមហ៊ុនហ្វាំងឡង់មួយឈ្មោះ HMD ដែលទទួលបន្ទុកផលិតទូរស័ព្ទម៉ូដែលថ្មីរបស់ក្រុមហ៊ុន ហើយក៏បានចុះហត្ថលេខាព្រមព្រៀងកាលពីខែ ឧសភា ដោយឲ្យក្រុមហ៊ុន HMD ទទួលបានសិទ្ធិផ្តាច់មុខលើម៉ាក Nokia ។
ក្រុមហ៊ុនបង្កើតថ្មីនោះនឹងត្រូវចំណាយប្រាក់ប្រហែលជាង៥៣១លានដុល្លារអាមេរិកសម្រាប់ផ្នែកទីផ្សារទូរស័ព្ទ ក្នុងរយៈពេល៣ឆ្នាំ ។ ក្រុមហ៊ុន Nokia ក៏បានព្រមព្រៀងថា HMD នឹងផលិត hardware សម្រាប់ Nokia ក្នុងរយៈពេល១០ឆ្នាំដែរ ។
មកដល់ពេលនេះមិនទាន់ដឹងឲ្យច្បាស់ពីទូរស័ព្ទម៉ូដែលថ្មីរបស់ Nokia ទេ ប៉ុន្តែទូរស័ព្ទថ្មីនោះទំនងនឹងដើរដោយប្រព័ន្ធ Google Android ។ គេហទំព័ររបស់ក្រុមហ៊ុន Nokia Power User បានអះអាងថា ទូរស័ព្ទទាន់សម័យពីរម៉ូដែលដែលដើរដោយប្រព័ន្ធប្រតិបត្តិការAndroid Nougat ចុងក្រោយគេកំពុងដំណើរការ ៕
ចែករំលែកព័តមាននេះ