រាជធានីភ្នំពេញ ៖ អង្គជំនុំជម្រះតុលាការកំពូលនៃអង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) ប្រកាសសាលដីកាស្ថាពរលើបណ្តឹងសាទុក្ខក្នុងសំណុំរឿង០០២/០១ ប្រឆាំងនឹងជនជាប់ចោទ នួន ជា និងខៀវ សំផន នៅថ្ងៃទី២៣ ខែវិច្ឆិកា ឆ្នាំ២០១៦ វេលាម៉ោង ៩ ព្រឹក នៅសាលសវនាការរបស់ អ.វ.ត.ក ។ លោក នេត្រ ភក្ត្រា មន្ត្រីនាំពាក្យនៃសាលាក្តីខ្មែរក្រហម បានថ្លែងថា ជាថ្ងៃប្រវត្តិសាស្ត្រថ្មីមួយទៀតរបស់សាលាក្តីខ្មែរក្រហម ។ លោកបានចាត់ទុកថា ជាសមិទ្ធផលប្រវត្តិសាស្ត្រថ្មីមួយទៀតរបស់សាលាក្តីខ្មែរក្រហម ក៏ដូចជារបស់មនុស្សជាតិទាំងមូល នៅក្នុងដំណើរការស្វែងរកការពិត និងយុត្តិធម៌នៅកម្ពុជារយៈពេលជាង៣៧ឆ្នាំ ក្រោយការដួលរលំទៅនៃរបបខ្មែរក្រហមនៅកម្ពុជា ។
លោក នេត្រ ភក្ត្រា បានថ្លែងថា នៅថ្ងៃប្រកាសសាលដីកាស្ថាពរនេះ សាធារណជន មន្ត្រីរាជរដ្ឋាភិបាល មន្ត្រីអង្គការសហប្រជាជាតិ មន្ត្រីអង្គទូត និងជនរងគ្រោះជិត១.០០០នាក់នឹងចូលរួមស្តាប់ការប្រកាសសាលដីកាជា ប្រវត្តិសាស្ត្រនេះ។ ជាមួយគ្នានេះដែរ ស្ថានីយវិទ្យុ និងទូរទស្សន៍បាយ័ន នឹងផ្សាយផ្ទាល់ពីព្រឹត្តិការណ៍ដ៏មានសារៈសំខាន់នេះ ហើយស្ថានីយវិទ្យុ និងទូរទស្សន៍មួយចំនួនទៀតនឹងធ្វើការផ្សាយបន្តផ្ទាល់ផងដែរ។ លោកបន្តថា ការប្រកាសសាលដីកាស្ថាពរក្នុងសំណុំរឿង០០២/០១ នៅថ្ងៃទី២៣ ខែវិច្ឆិកា នឹងបង្ហាញថាតើជនជាប់ចោទ នួន ជា និងខៀវ សំផន ដែលត្រូវបានអង្គជំនុំជម្រះសាលាដំបូងរកឃើញថាមានពិរុទ្ធភាព និងសម្រេចផ្តន្ទាទោសដាក់ពន្ធនាគារអស់មួយជីវិត តើនឹងមានការសម្រេចបែបណាពីអង្គជំនុំជម្រះតុលាការកំពូល បន្ទាប់ពីបានស្តាប់ទឡ្ហីករណ៍ អង្គច្បាប់ និងបានស្តាប់ភ័ស្តុតាងថ្មីៗ
មួយចំនួនរួចមក ។ សាលដីកាដែលនឹងប្រកាសនេះគឺជាសាលដីកាស្ថាពរ បិទផ្លូវតវ៉ា ។
សូមរំឭកថា សំណុំរឿង០០២/០១ គឺជាការជំនុំជម្រះលើកទីមួយនៃការជំនុំជម្រះយ៉ាងតិចពីរប្រឆាំងនឹង ខៀវ សំផន អតីតប្រមុខរដ្ឋនៃរបបកម្ពុជាប្រជាធិបតេយ្យ និង នួន ជា អតីតអនុលេខាបក្សកុម្មុយនីស្តកម្ពុជា។ បទចោទនៅក្នុងសំណុំរឿង០០២/០១ គឺផ្តោតលើបទឧក្រិដ្ឋប្រឆាំងនឹងមនុស្សជាតិ ដែលបានប្រព្រឹត្តនៅក្នុងអំឡុងពេលជម្លៀសនៅទីក្រុងភ្នំពេញក្នុងខែមេសា ឆ្នាំ១៩៧៥ និងការផ្លាស់ទីដោយបង្ខំបន្តបន្ទាប់ពីតំបន់ដទៃទៀត រួមទាំងការកាប់សម្លាប់អតីតមន្ត្រីរដ្ឋការសម័យ លន់ នល់នៅទួលពោធិ៍ជ្រៃ ក្នុងខេត្តពោធិ៍សាត់ ។ នៅថ្ងៃទី៧ ខែសីហា ឆ្នាំ២០១៤ អង្គជំនុំជម្រះសាលាដំបូងរកឃើញថា ជនជាប់ចោទមានពិរុទ្ធភាពពីបទឧក្រិដ្ឋប្រឆាំងនឹងមនុស្សជាតិ និងបានសម្រេចផ្តន្ទាទោសដាក់ពន្ធនាគារជនជាប់ចោទទាំងពីរនាក់អស់មួយជីវិត ។
នួន ជា និង ខៀវ សំផន បានធ្វើបណ្តឹងសាទុក្ខប្រឆាំងនឹងសាលក្រមរបស់អង្គជំនុំជម្រះសាលាដំបូង ដោយម្នាក់ៗបានលើកទឡ្ហីករណ៍បណ្តឹងសាទុក្ខរៀងៗខ្លួនចំនួន២២៣ និង១៤៨ ។
សហព្រះរាជអាជ្ញា ក៏បានដាក់បណ្តឹងសាទុក្ខដោយកម្រិតត្រឹមតែការស្វែងរកដំណោះស្រាយទាក់ទងនឹងភាពអាចអនុវត្តបាននូវទម្រង់ពង្រីកបន្ថែមនៃសហឧក្រិដ្ឋកម្មរួម ដែលហៅថា «សហឧក្រិដ្ឋកម្មរួមទម្រង់ទី III” (JCE III) នៅចំពោះមុខ អ.វ.ត.ក ៕
ចែករំលែកព័តមាននេះ