ខេត្តបន្ទាយមានជ័យ ៖ នៅវេលាម៉ោង៨និង២នាទីព្រឹក ថ្ងៃទី១៨ ខែវិច្ឆិកា ឆ្នាំ២០១៦ នេះ ឈ្មោះ ប៊ុន សុធី ភេទប្រុស អាយុ២៨ឆ្នាំ ជាបុគ្គលិកផ្នែកគណនេយ្យបម្រើការងារនៅក្នុងកាស៊ីណូ ហ្គ្រានដាយមិនស៊ីធី ក្រុងប៉ោយប៉ែត
ខេត្តបន្ទាយមានជ័យ ៖ នៅវេលាម៉ោង៨និង២នាទីព្រឹក ថ្ងៃទី១៨ ខែវិច្ឆិកា ឆ្នាំ២០១៦ នេះ ឈ្មោះ ប៊ុន សុធី ភេទប្រុស អាយុ២៨ឆ្នាំ ជាបុគ្គលិកផ្នែកគណនេយ្យបម្រើការងារនៅក្នុងកាស៊ីណូ ហ្គ្រានដាយមិនស៊ីធី ក្រុងប៉ោយប៉ែត និងជាប្រធានសហជីពកម្មករត្រូវ ខាងក្រុមហ៊ុនសហការជាមួយសមត្ថកិច្ចប៉ូលិសសន្តិសុខក្រសួងមហាផ្ទៃ បានឃាត់ខ្លួនចោទប្រកាន់ចំនួន២ករណីយកទៅសួនាំ។
ការឃាត់ខ្លួនលោក ប៊ុន សុធី មានក្រុមកម្មករ និងអង្គការសង្គមស៊ីវិល រួមទាំងអ្នកសារព៌ត័មាន បាននាំគ្នាឈរត្រៀបត្រារង់ចាំមើលថា តើបុគ្គលរូបនេះ ត្រូវបានគេដោះលែងឲ្យមានសេរីភាពវិញ ឬយ៉ាងណា?
សូមបញ្ជាក់ លោក ប៊ុន សុធី ត្រូវបានខាងក្រុមហ៊ុន និងសមត្ថកិច្ចឃាត់ខ្លួនសួនាំ រហូតដល់វេលាម៉ោង១១និង៣នាទីថ្ងៃត្រង់ ថ្ងៃដដែល ទើបត្រូវបានគេដោះលែងឲ្យមានសេរីភាពវិញ ។
លោក ប៊ុន សុធី បានប្រាប់អ្នកសារព័ត៌មានឲ្យដឹងថា រូបលោកត្រូវបានខាងក្រុមហ៊ុនកាស៊ីណូហ្គ្រានដាយមិនស៊ីធី ឃាត់ខ្លួនចំនួន២ដងរួចមកហើយ រួមទាំងលើកនេះផងដែរ។ ដោយលើកទី១ កាលពីវេលាម៉ោង៤និង៥០នាទីល្ងាច ថ្ងៃទី១៥ ខែវិច្ឆិកា កន្លងមកនេះ គេបានឃាត់ខ្លួនលោកទាំងបំពាន និងផ្លូវច្បាប់ ដោយពុំមានមន្ត្រីនគរបាលយុត្តិធម៌ចូលរួមឡើយ គឺពួកគេឃាត់ខ្លួនលោកយកទៅសួនាំអស់រយៈពេលជាង១ម៉ោង រហូតដល់៦និង៣០នាទីល្ងាចថ្ងៃដដែល ទើបដោះលែងមកវិញ ។
លោក ប៊ុន សុធី បានបញ្ជាក់ប្រាប់ថា ការឃាត់ខ្លួនរូបលោកលើកទី២ នេះ លោកយល់ថា ជារឿងត្រឹមត្រូវតាមច្បាប់ ដោយមានមន្ត្រីនគរបាលយុត្តិធម៌សន្តិសុខក្រសួងមហាផ្ទៃចូលរួមចំនួន២រូប និងបានសួរនាំចោទប្រកាន់រូបលោកចំនួន២ករណី គឺករណីទី១ ចោទរូបលោកពីបទពាក់ព័ន្ធចែកចាយគ្រឿងញៀនខុសច្បាប់, ករណីទី២ ចោទរូបលោកពីបទឃុបឃិតគ្នាជាមួយភ្ញៀវកឹបកេង យកទ្រព្យសម្បត្តិរបស់ក្រុមហ៊ុន ។
លោក ប៊ុន សុធី បានបញ្ជាក់បន្ថែមថា ក្រោយពេលសមត្ថកិច្ចចោទប្រកាន់ និងបានឆែកកាមេរ៉ាសុវត្ថិភាពមើលរួចរាល់ហើយ រកមិនឃើញនូវកំហុសឆ្គងរបស់លោកដែលជាមនុស្សស្អាតស្អំ មិនបានប្រព្រឹត្តល្មើសអ្វីខុសទៅនិងផ្លូវច្បាប់នោះ ទើបត្រូវបានពួកគេ បង្ខំឲ្យរូបលោកធ្វើកិច្ចសន្យាលាយល័ក្ខជាអក្សរ ផ្តិតមេដៃ ទុក្ខភស្តុតាងតែម្តងថា បើថ្ងៃក្រោយរូបលោកប្រព្រឹត្តល្មើសច្បាប់នោះ និងចាត់ការតាមនីតិវិធីច្បាប់ ។ បន្ទាប់មកទើបបានគេដោះលែងឲ្យរូបលោកមានសិទ្ធិសេរីភាពវិញតែម្តង ។
ពាក់ព័ន្ធនឹងករណីទាំងអស់ខាងលើអ្នកសារព៌ត័មានមិនអាចសុំការបំភ្លឺពីតំណាងក្រុមហ៊ុនកាស៊ីណូហ្គ្រានដាយមិនស៊ីធី ប៉ោយប៉ែតបានទេ នៅរសៀលថ្ងៃទី១៨ ខែវិច្ឆិកា នេះ។
ជាចុងក្រោយលោក ប៊ុន សុធី ជាប្រធានសហជីពកម្មករ បានអំពាវនាវដល់ស្ថាប័ន អង្គការ សង្គមស៊ីវិល ក៏ដូចជាប្រមុខថ្នាក់ដឹកនាំដែលតែងយកចិត្តទុកដាក់ការពារដល់សិទ្ធិសេរីភាពកម្មករ ជួយចាត់វិធានការដល់ក្រុមហ៊ុន វិនិយោគទន់ ដែលជាជនបរទេសទាំងអស់រស់នៅលើទឹកដីនៃព្រះរាជាណាចក្រកម្ពុជា ឲ្យចេះគោរពច្បាប់ឲ្យបានត្រឹមត្រូវផង កុំធ្វើអ្វីតាមតែទំនើងចិត្តបែបនេះតទៅទៀត ៕
ចែករំលែកព័តមាននេះ