ខេត្តកំពត ៖ គិតត្រឹមវេលាម៉ោង០១ និង១៥នាទីរសៀលថ្ងៃទី១៥ វិច្ឆិកា នេះ សាកសពជនរងគ្រោះទាំង៤នាក់ដែលស្លា.ប់ក្នុងហេតុការណ៍ទូកទេសចរណ៍ដឹកភ្ញៀវមើលអំពិលអំពែកបានគឿងជាមួយខ្សាច់ បណ្តាលឱ្យផ្អៀងរហូតធ្វើឱ្យភ្ញៀវលោតចូលទឹកនោះ ត្រូវបានរកឃើញអស់ហើយ ។
ខេត្តកំពត ៖ គិតត្រឹមវេលាម៉ោង០១ និង១៥នាទីរសៀលថ្ងៃទី១៥ វិច្ឆិកា នេះ សាកសពជនរងគ្រោះទាំង៤នាក់ ដែលស្លាប់ក្នុងហេតុការណ៍ទូកទេសចរណ៍ដឹកភ្ញៀវមើលអំពិលអំពែកបានគឿងជាមួយខ្សាច់ បណ្តាលឱ្យផ្អៀងរហូតធ្វើឱ្យភ្ញៀវលោតចូលទឹកនោះ ត្រូវបានរកឃើញអស់ហើយ ។
គួររំលឹកថា ឧបទ្ទវហេតុលិចទូកដឹកភ្ញៀវទេសចរមួយគ្រឿងនេះ កើតឡើងកាលពីវេលាម៉ោង០៩ និង១០នាទីយប់ថ្ងៃទី១៤ វិច្ឆិកា នៅចំណុចខាងត្បូងស្ពានព្រែកកំពង់បាយ ស្ថិតក្នុងភូមិទ្វីខាងជើង សង្កាត់អណ្តូងខ្មែរ ក្រុងកំពត ។
តាមប្រភពព័ត៌មានពីសមត្ថកិច្ចបានឲ្យដឹងដោយមិនច្បាស់លាស់ថា មនុស្សដែលជិះលើទូកទេសចរពេលយប់ដែលលិចនេះ គឺអ្នកបើកបរនៅលើទូកនេះ ពុំបានដឹងច្បាស់ទេ គ្រាន់តែប៉ាន់ប្រមាណថា មនុស្សជិះលើទូកមិនលើសពី៨០នាក់ឡើយ ។ ភ្ញៀវទេសចរដែលជិះទូកកម្សាន្តពេលរាត្រីកើតហេតុនេះ សុទ្ឋតែជាភ្ញៀវជាតិ (ភ្ញៀវខ្មែរទាំងអស់) មានក្មេងមានចាស់ ។
លោក ស៊ឹម វុទ្ឋា អភិបាលរងខេត្ត បានប្រាប់អ្នកយកព័ត៌មានថា ទូកនេះបើតាមម្ចាស់វា និងអ្នកបំរើការងារក្នុងទូកបានឱ្យដឹងថា គ្រោះថ្នាក់ដែលកើតឡើងនេះ គឺនៅពេលត្រឡប់មកពីមើលសត្វអំពិលអំពែកវិញ ដោយទូកបើកបុកនឹងដីខ្សាច់ធ្វើឱ្យទូកផ្អៀង ហើយពេលនោះអ្នកជិះនៅក្នុងទូកបានឃើញទូកបែកបាត ទឹកហូរចូលទូកក៍មានការច្រួលច្របល់ ធ្វើឲ្យទូកកាន់តែផ្អៀងខ្លាំង ហើយក៏លិចតែម្តង ។
ប្រភពដដែលបន្តថា នៅពេលទូកផ្អៀងហើយទឹកកំពុងហូរចូល មនុស្សនៅក្នុងទូកមួយចំនួនធំ ស្រវ៉ាឡើងមកលើដំបូលទូក ។ ពេលនោះសមត្ថកិច្ចកងទព័ជើងទឹក ដែលដឹកនាំបញ្ជាដោយលោកឧត្តមសេនីយ៍ សៅ សុផល បានបញ្ជាទូកនិងអូប័រទៅជួយសង្គ្រោះ ក្នុងពេលជាមួយនោះ កំលាំងនគរបាលការពារបទល្មើសលើផ្ទៃសមុទ្រ រួមនឹងទូកប្រជានេសាទផងដែរ បានជួយស្រង់អ្នកជិះលើទូកទាំងអស់ ។
ក្រោយពីការស៊ើបសួរអ្នកដែលស្រង់រួចពីក្នុងទឹក បានផ្ដល់ព័ត៌មានថា នៅមានបាត់មនុស្ស៤នាក់ ។ ពេលនោះកំលាំងសមត្ថកិច្ចចាប់ផ្តើមស្វែងរក ដំបូងប្រទះឃើញសពស្ត្រីចំណាស់ម្នាក់ឈ្មោះ ផាន់ យីវ អាយុ៧២ឆ្នាំ ត្រូវជាម្តាយក្មេករបស់មន្ត្រីនគរបាលឈ្មោះ សាន យ៉េត តែនៅបាត់ប្រពន្ឋនិងកូនប្រុសអាយុ៩ឆ្នាំម្នាក់ទៀត រួមនឹងស្ត្រីចំណាស់ម្នាក់ទៀត ជាភ្ញៀវមកពីរាជធានីភ្នំពេញ។
កម្លាំងសមត្ថកិច្ចដែលល្បាតក្នុងព្រែក នៅតែបន្តរុករកសពរហូតដល់ម៉ោង២និង២៥នាទីរំលងអធ្រាត្រទើបសម្រាក ដោយសារយប់ងងឹតមិនអាចបំភ្លឺរកឃើញនោះទេ ។ លុះព្រឹកឡើង កងកំលាំងជើងទឹកទាំងពីរផ្នែក បានបន្តរាវរកសាកសពជនរងគ្រោះដែលបាត់បន្តទៀត ។
នៅម៉ោង៩និង១៥នាទីព្រឹកថ្ងៃទី១៥ វិច្ឆិកា សមត្ថកិច្ចបានជួលអ្នកមុជទឹក ទៅមុជរកក្នុងទូក ក៏បានប្រទះឃើញសពស្ត្រីចំណាស់ម្នាក់ឈ្មោះសុខ សុខុម អាយុ៦២ឆ្នាំ មានទីលំនៅភូមិ២ សង្កាត់ស្រះចក ខណ្ឌដូនពេញ រាជធានីភ្នំពេញ ។ នៅវេលាម៉ោង១២និង១៥នាទីថ្ងៃដដែលនេះ ត្រូវបានគេប្រទះឃើញសាកសពស្ត្រីឈ្មាះលឹម អាន អាយុ៤៧ឆ្នាំ ជាប្រពន្ឋរបស់មន្ត្រីនគរបាល ដែលអណ្តែតនៅក្បែរឆ្នេរព្រែកខាងកើត កន្លែងអូសទូកដែលលិចនោះ ។ ហើយរហូតមកដល់ម៉ោង១និង១៥នាទីរសៀល សាកសពក្មេងប្រុស អាយុ៩ឆ្នាំ ជាកូនមន្ត្រីនគរបាល ក៏ត្រូវបានរកឃើញដែរ ។
សាកសពជនរងគ្រោះទាំង៤នាក់ ត្រូវបានសមត្ថកិច្ចប្រគល់ឲ្យក្រុមគ្រួសារបញ្ជូនទៅរៀបចំធ្វើបុណ្យតាមប្រពៃណីយ ។ លោក ស៊ឹម វុទ្ឋា អភិបាលរងខេត្តឲ្យដឹងទៀតថាៈ ដោយមានហេតុការអាក្រក់គួឱ្យសង្វេក កើតឡើងជុំវិញបញ្ហាលិចទូកដឹកភ្ញៀវនេះ លោក ចាន់ ចេស្តា អភិបាលខេត្ត បានចេញសេចក្តីជូនដំណឹងមួយ ដល់ក្រុមអ្នកធ្វើអាជីវកម្មទូកដឹកភ្ញៀវទេសចរទាំងអស់នៅក្នុងខេត្ត សុំឲ្យផ្អាកមួយរយៈសិន រង់ចាំការរៀបចំរបស់គណៈកម្មការក្រុមការងារសាលាខេត្ត ឲ្យមានការពិនិត្យលើលក្ខណៈបច្ចេកទេស និងរៀបចំឲ្យបានត្រឹមត្រូវ ទើបអាចធ្វើអាជីវកម្មបន្តទៀតបាន ។
ចែករំលែកព័តមាននេះ