ខេត្តសៀមរាប ៖ នៅដងស្ទឹងប្រវត្តិសាស្ត្រខេត្តសៀមរាប នារសៀលថ្ងៃទី១៣ ខែវិច្ឆិកា ឆ្នាំ២០១៦ មានធ្វើការប្រកួតប្រណាំងទូក ដើម្បីអបអរសាទរព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលប្រព្រឹត្តទៅក្រោមអធិបតីភាពលោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្ត លោកបណ្ឌិត នូ ផល្លា ប្រធានក្រុមប្រឹក្សាខេត្ត ដោយមានការអញ្ជើញចូលរួមពីសំណាក់លោក លោកឧកញ៉ា លោកជំទាវ អ្នកតំណាងរាស្ត្រ គណៈអភិបាលខេត្ត សមាជិកក្រុមប្រឹក្សាខេត្ត មេបញ្ជាការកងកម្លាំងប្រដាប់អាវុធ និងវត្តមានចូលរួមរបស់ ឯកឧត្តម លោកជំទាវ ជាប្រធានក្រុមប្រឹក្សាខេត្ត គណៈអភិបាលខេត្តឧត្តរមានជ័យ ខេត្តបន្ទាយមានជ័យ ខេត្តព្រះវិហារ ខេត្តកំពង់ធំ ព្រមទាំងថ្នាក់ដឹកនាំមន្ទីរ មន្ត្រីរាជការ អាជ្ញាធរក្រុង ស្រុក អង្គការសង្គមស៊ីវិល ភ្ញៀវជាតិ អន្តរជាតិ និងប្រជាពលរដ្ឋ ចូលរួមទស្សនាកម្សាន្តយ៉ាងច្រើនកុះករផងដែរ ។
តាមសេចក្តីរាយការណ៍របស់លោក នួន គ្រឹះស្នា អនុប្រធានគណៈកម្មការបច្ចេកទេស បានឲ្យដឹងថា ក្នុងឆ្នាំ២០១៦នេះ ការប្រណាំងទូក.ង មានទូកចូលរួមចំនួន៣១ទូក មានទូកនារី៦ទូក ដែលមានចំណុះ២២នាក់ ហើយមានកីឡាករ កីឡាការិនី សរុប ៨៣៧នាក់ នារី១៦២នាក់ តាមប្រភេទទូកខ្នាតអន្តរជាតិ ដែលបានកំណត់ដោយគណៈកម្មាធិការជាតិកីឡាអូឡាំពិក ដើម្បីសម្រាប់ប្រកួតជាលក្ខណៈជាតិ-អន្តរាជាតិ ។ ក្នុងពិធីប្រណាំងទូក.ងនេះ ក៏មានទូកមកពីខេត្តឧត្តរមានជ័យបានចូលរួមផងដែរ ព្រមទាំងការប្រកួតប្រណាំងក្រឡោ ដែលជាសម្បត្តិវប្បធម៌ប្រពៃណីខ្មែរយើងនៅខេត្តសៀមរាប ។
មានប្រសាសន៍បើកការប្រកួតប្រណាំងទូក.ងនាឱកាសនោះ លោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្ត ក៏បានលើកឡើងថា ជារៀងរាល់ឆ្នាំនៅថ្ងៃ១៤-១៥កើត ខែកត្តិក នៅលើទីដីប្រវត្តិសាស្ត្រខេត្តសៀមរាប បានរៀបចំព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ ដែលប្រព្រឹត្តទៅក្នុងលក្ខខណ្ឌ សន្តិសុខ សណ្តាប់ធ្នាប់ និងសុវត្ថិភាព សង្គមល្អប្រសើរ ដែលកត្តាចម្បងនេះបាននឹងកំពុងក្លាយជាគោលដៅរបស់ភ្ញៀវទេសចរលើពិភពលោកចូលមកទស្សនាកម្សាន្តកាន់តែច្រើនឡើងៗ ។ លើសពីនេះទៀត ការរៀបចំព្រឹត្តិការណ៍វប្បធម៌នេះ ក៏ជាការឧទ្ទិសដល់អតីតកាលអធិរាជនៃណាចក្រខ្មែរ ក្រោមព្រះរាជកិច្ចដឹកនាំរបស់ព្រះបាទសម្តេចជ័យវរ័ន្មទី៧ ព្រះមហាវីរក្សត្រជំនាន់នោះ ដែលព្រះអង្គទ្រង់បានដឹកនាំកងទ័ពជើងទឹកដ៏ក្លាហានប្រកបដោយវីរភាពអង់អាច និងពោរពេញដោយសមត្ថភាពប្រយុទ្ធ បានរំដោះជាតិមាតុភូមិចេញផុតពីការឈ្លានពានរបស់បច្ចាមិត្ត ហើយសម្រេចបាននូវការបង្រួបបង្រួមជាតិ និងកសាងសង្គមជាតិឲ្យរីកចម្រើនថ្កុំថ្កើងរហូតដល់ក្លាយជាអច្ឆរិយប្រទេសដ៏កំពូលនាសម័យនោះ ។
លោកបណ្ឌិត ឃឹម ប៊ុនសុង បានបន្តទៀតថា ម្យ៉ាងវិញទៀត យើងទាំងអស់គ្នាប្រាកដជាយល់ដឹងហើយថា ព្រះរាជពិធីបុណ្យនេះគឺជាបុណ្យប្រពៃណីជាតិដ៏ធំ ពាក់ព័ន្ធនឹងជំនឿយ៉ាងជ្រាលជ្រៅក្នុងមនោសញ្ចេតនារបស់យើង ដែលបុព្វបុរសខែ្មរបានប្រារព្វធ្វើតាំងពីយូរយាណាស់មកហើយ ដើម្បីជាការំលឹកដឹងគុណដល់ព្រះគង្គារដែលហូរនាំដីល្បាប់ដ៏មានជីជាតិសម្រាប់ប្រជាកសិករយើងបង្កបង្កើនផល ហើយក៏ជារំលឹកដឹងគុណដល់ព្រះបរមគ្រូដែលយកកំណើតជាសត្វទន្សាយព្រះពោធិសត្វ ហើយឧទ្ទិសថ្វាយខ្លួនដើម្បីសម្រេចនូវព្រះសម្មាសម្ពោធិញ្ញាណ ។ ជាមួយគ្នានេះដែរ ព្រះរាជពិធីបុណ្យបណ្តែតប្រទីប គឺជាការឧទ្ទិសដល់អារុក្ខ អារក្ស អ្នកតា បារមីថែរក្សាទឹកដី ដើម្បីសុំសេចក្តីសុខក្សេមក្សាន្តដល់កូនចៅដែលរស់នៅឲ្យទទួលបានសុខសុភមង្គលចម្រើនរុងរឿង និងដើម្បីព្យាករណ៍អាកាសធាតុសម្រាប់បង្កបង្កើនផលនៅឆ្នាំបន្ទាប់ផងដែរ ។
លោក ឃឹម ប៊ុនសុង ក៏លើកឡើងផងដែរថា ក្នុងរយៈពេលកន្លងមក រដ្ឋបាលខេត្ត-ក្រុងបានយកចិត្តទុកដាក់ខ្ពស់បំផុតក្នុងការរៀបចំកែលម្អសោភ័ណភាព និងប្រមូលផ្តុំធនធានក្នុងការរៀបចំកែសម្រួល ជួសជុល ស្ថាបនាហេដ្ឋារចនាសម្ព័ន្ធក្នុងក្រុង គួបផ្សំជាមួយនឹងការជួយជ្រោមជ្រែងពីរាជរដ្ឋាភិបាល ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ ផ្នែកឯកជន និងបណ្តាខេត្ត-ក្រុងជាសម្ព័ន្ធមេត្រីភាព ដើម្បីរៀបចំផែនការមេអភិវឌ្ឍន៍ទីក្រុងសៀមរាបឲ្យបានសមស្របទៅនឹងស្ថានភាពភូមិសាស្ត្រ ធម្មជាតិបៃតង ។ ក្នុងន័យនេះយើងក៏មានមោទនភាព ដោយក្រុងសៀមរាបយើងទទួលបាននូវកិត្តិនាមដ៏ល្បីខ្ទរខ្ទារនៅលើពិភពលោក ក្លាយជាគោលដៅរបស់ភ្ញៀវទេសចរលើពិភពលោកចូលមកទស្សនាកម្សាន្ត ។
ជាចុងក្រោយ លោកបណ្ឌិតក៏បានធ្វើការផ្តាំផ្ញើដល់ជនរួមជាតិទាំងអស់ដែលចូលរួមក្នុងព្រះរាជពិធីបុណ្យអុំទូកនេះ សូមចូលរួមថែរក្សានូវអនាម័យ បរិស្ថាន ក្នុងការលើកស្ទួយវប្បធម៌ សោភ័ណភាពក្រុងប្រវត្តិសាស្ត្រអង្គរ ព្រមទាំងរក្សាការពារនូវទ្រព្យសម្បត្តិផ្ទាល់ខ្លួន សំខាន់កុមារតូចៗនៅក្នុងពិធីបុណ្យផងដែរ ៕
ចែករំលែកព័តមាននេះ