រាជធានីភ្នំពេញ ៖ សេចក្តីរាយការណ៍បន្តឱ្យដឹងថា គិតត្រឹមម៉ោង១០ព្រឹកថ្ងៃទី០៩ វិច្ឆិកា នេះ កម្លាំងនគរបាលបានចុះព័ទ្ធផ្ទះមួយកន្លែងមានលេខ៤៦H ស្ថិតនៅទល់មុខអកាសយានដ្ឋានអន្តរជាតិភ្នំពេញ ដោយឃាត់ខ្លួនបុរសជនជាតិ២នាក់ នាំទៅសាកសួរ ។
គួររំលឹកថា នៅព្រឹកថ្ងៃទី០៩ វិច្ឆិកា ២០១៦ នេះ កម្លាំងនគរបាលខណ្ឌពោធិ៍សែនជ័យជាច្រើននាក់ បាននិងកំពុងធ្វើការឡោមព័ទ្ធសារជាថ្មី ដែលសង្ស័យថា ចោរប្លន់ជនជាតិចិនកំពុងសំងំលាក់ខ្លួននៅទីនោះ ស្ថិតត្រង់ចំណុចភូមិព្រៃទា សង្កាត់ចោមចៅ ជិតព្រំ ប្រទល់ភូមិត្រពាំងជ្រៃ និងភូមិក្បាលដំរី សង្កាត់កាកាប រាជធានីភ្នំពេញ ។
កន្លងមក កម្លាំងចម្រុះបានសម្រេចដកថយមកវិញទាំងស្រុង បន្ទាប់ពីប្រើ (drone) រុករកព័ទ្ធចាប់ចោរជនជាតិចិនមិនបាននោះ ស្ថិតត្រង់ចំណុចដីឡូត៍មួយកន្លែង ដែលសង្ស័យចោរជនជាតិកំពុងលាក់ខ្លួន ក្នុងសំណង់វីឡាសង់ទុកចោលនៅទីនោះ នៅជិតវង្វង់មូលចោមចៅ ក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ដោយកម្លាំងចម្រុះជាច្រើនរូប ដោយម្នាក់ៗមានពាក់អាវក្រោះផងដែរ ។
ចោរជនជាតិចិនម្នាក់ បានភ្ជង់កាំភ្លើងប្លន់យកកាបូបលុយពីជនជាតិចិនដូចគ្នា២នាក់ ហើយពេលរត់គេចចេញពីបណ្ណា គារស៊ីនហួរ ត្រូវជនរងគ្រោះ និងអ្នកជិតខាងនាំគ្នារត់ដេញតាម និងស្រែកថា «ចោរៗ»បង្កឲ្យមានការភ្ញាក់ផ្អើលយ៉ាងខ្លាំង ។
ពេលនោះអ្នកដែលមានលំនៅឋានតាមដងផ្លូវភ្ញាក់ផ្អើលនាំគ្នាអើតមើល ក៏ត្រូវចោរបាញ់សំដៅ១គ្រាប់ធ្វើឲ្យពួកគេភ័យ តែសំណាង ល្ អមិនត្រូវនរណាម្នាក់ទេ ។ ចោរព្យាយាមរត់គេចខ្លួនបន្តទៀត លុះទៅដល់ដីឡូមួយឃើញយោធា២នាក់ដែលជាអ្នកយាមផ្ទះវីឡាអើតមើល ក៏បាញ់ចំនួន២គ្រាប់បណ្ដាលឲ្យត្រូវម្នាក់ចំកណ្ដាលដើមទ្រូងរងរបួសធ្ងន់ និងស្លាប់ពាក់កណ្តាលផ្លូវពេលបញ្ជូនទៅសង្គ្រោះបន្ទាន់ ។ ចំណែកយោធាម្នាក់ទៀតរបួសដៃស្រាល ។
ហេតុការណ៍នោះកើតឡើងកាលពីវេលា ម៉ោង១ និង៥៥នាទីរសៀលថ្ងៃទី៦ វិច្ឆិកា នៅដីឡូមួយស្ថិតនៅក្បែររង្វង់មូលថ្នល់បំបែកចោមចៅ ក្នុងភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ ។ បុរសដែលស្លាប់នោះឈ្មោះយ៉េន រីណង់ អាយុ២៣ឆ្នាំ ជាមន្ត្រីយោធានៅកងពលតូចង៧០ មានទីលំនៅក្នុងភូមិសំរោង ឃុំបារាយណ៍ ស្រុកបារាយណ៍ ខេត្តកំពង់ធំ ។ ចំណែកអ្នករងរបួសឈ្មោះយី សុខហេង អាយុ២៦ឆ្នាំ ជាយោធានៅអង្គភាពជាមួយគ្នា ។
ចែករំលែកព័តមាននេះ