ខេត្តបន្ទាយមានជ័យ ៖ គ្រូសារមួយរស់នៅភូមិ និងសង្កាត់ប៉ោយប៉ែត ដែលបុរសជាប្តីពិការភ្នែកទាំងសងខាង ប្រកបរបរជាអ្នកអង្គុយកូតទ្រសុំទាននៅច្រកទ្វារអន្តរជាតិប៉ោយប៉ែត ជួបហេតុការណ៍អកុសលត្រូវប្រពន្ធស្លាប់ចោល ខណៈទើបសម្រាលកូនស្រីបាន១០ថ្ងៃ ហើយអ្វីដែលគួរឲ្យសង្វេគនោះកូនប្រុសស្រីទាំង៥នាក់ត្រូវរស់ឆ្ងាយឪពុក ដោយកូនស្រីទើបស្គាល់ពន្លឺថ្ងៃអាចមានសំណាងព្រោះតាយាយម្ខាងយកទៅខេត្តព្រៃវែង ឯប្រុសស្រី៤នាក់ទៀតក្លាយជាអម្រែកកម្មធ្លាក់លើស្ត្រីចំណាស់មេម៉ាយអាយុ៧៩ឆ្នាំជាយាយខាងម្តាយ និងគ្មានមុខរបរយកទៅចិញ្ចឹមនៅឯខេត្តសៀមរាប។
គ្រួសារក្រីក្រដ៏អភ័ព្វខាងលើមានប្តីឈ្មោះ ឡូត ចាន់ណាអាយុ៣៧ឆ្នាំ ប្រពន្ធឈ្មោះ ជិន ឡេង អាយុ៤០ឆ្នាំ(ស្លាប់)។ គ្រួសារមួយនេះមានកូនប្រុសស្រីចំនួន៥នាក់ ដោយ៤នាក់ជាកូនប្តីមុន និងកូនដែលទើបកើតបាន១០ថ្ងៃជាកូនរបស់បុរសពិការភ្នែកទាំង២។ តាមឈ្មោះ ឡូត ចាន់ណា ប្រាប់ថា ប្រពន្ធរបស់គាត់បានស្លាប់ដោយជំងឺខ្សោយបេះដូងកាលពីវេលាម៉ោង១២យប់ ថ្ងៃទី០២ ខែវិច្ឆិកា ឆ្នាំ២០១៦ ក្រោយពេលសម្រាលបានកូនស្រីត្រឹមតែ១០ថ្ងៃប៉ុណ្ណោះ។
កូនស្រីទើបកើតដែលជាតំណក់ឈាមរបស់បុរសពិការភ្នែកទំនងជាមានសំណាងព្រោះត្រូវតាយាយខាងឪពុកមកទទួលយកទៅចិញ្ចឹមនៅភូមិឆ្អឹងពស់ ឃុំពានរោង ស្រុកស្វាយ អន្ទរខេត្តព្រៃវែង។ អនិច្ចាក្មេងប្រុសស្រី៤នាក់ទៀតជាកូនប្តីមុនរបស់សពក្លាយជាអម្រែកកម្មធ្លាក់លើស្ត្រីចំណាស់ឈ្មោះប្លោក ឡាត អាយុ៧៩ឆ្នាំ ជាយាយខាងម្តាយមកទទួលយកទៅចិញ្ចឹមនៅឯភូមិបត់ដង្កោ ឃុំសំរោង ស្រុកសូទ្រនិគម ខេត្តសៀមរាប ខណៈស្ត្រីចំណាស់នោះជាមេម៉ាយគ្មានមុខរបរ ព្រមទាំងគ្មានស្រែចម្ការធ្វើទៀតផង។
ស្ត្រីចំណាស់រូបនេះបង្ហូរទឹកភ្នែកនៅចិញ្ចើមផ្លូវជាតិ មុនពេលនាំចៅប្រុសស្រីឡើងរថចេញពីក្រុងប៉ោយប៉ែត ដោយរៀបរាប់ថា គាត់គ្មានមុខរបរទេនៅឯស្រុកភូមិ គាត់ដើរស៊ីឈ្នួលច្រូតស្រូវគេដើម្បីបានប្រាក់មកយកចៅ។ ពេលសាកសួរថាតើពេលយកចៅៗទៅដល់ស្រុកកំណើតបានអ្វីចិញ្ចឹម គាត់បានសម្រក់ទឹកភ្នែកហើយយកកន្សែងជូត និងនិយាយទាំងអួលដើមកថា សុំបាយអ្នកស្រុកពិតជាគូរខ្លោចផ្សារណាស់ហើយ គាត់ថាបច្ចុប្បន្នរស់នៅតែ២នាក់កូនស្រីក្រីក្របំផុត។
ផ្អែកលើការរៀបរាប់ខាងលើ និងប្រាប់ថាគ្មានប្រាក់ជិះរថយន្តត្រឡប់ទៅវិញភ្នាក់ងារកោះសន្តិភាពរួមជាមួយអ្នកស្រុកបានរួមគ្នាជូយជាថវិកាជូយដល់ស្ត្រីចំណាស់បានជិត១០ម៉ឺនរៀលដើម្បីជិះរថយន្ត។ សង្ឃឹមថាសប្បុរសជនក្នុង និងក្រៅប្រទេសនឹងជួយគ្រួសារខាងលើ ពិសេសក្មេងៗទាំង៤ឲ្យបានចូលរៀន និងមានអនាគតនឹងគេផង៕
ចែករំលែកព័តមាននេះ