AFP បានផ្សាយដោយយោងតាមស៊ីនហួរបស់ចិនថា ចិនបានបញ្ជូនមនុស្សទៅប្រតិបត្តិការលើលំហអវកាសកាលពីថ្ងៃទី១៧ តុលា ២០១៦ ក្នុងដំណើរឆ្ពោះទៅសាងសង់ស្ថានីយអវកាសរបស់ខ្លួន ។ លោកជីន ហៃប៉េង និងលោកឈិន តុង ជាអ្នកអវកាសធ្វើដំណើរតាមយាន «Shenzhou-11» ដែលបង្ហោះចេញពីមជ្ឈមណ្ឌលបញ្ជូនផ្កាយរណប «ជីវឈួន» លើវាលខ្សាច់កូប៊ី ។
អ្នកអវកាសទាំង២នាក់នោះនឹងធ្វើដំណើរទៅដល់ទីតាំង Tiangong-2 ក្នុងរយៈពេល២ថ្ងៃ និងស្ថិតនៅទីនោះ៣០ថ្ងៃទៀត ទើបវិលត្រឡប់មកផែនដីវិញ ។ លោក Jin អាយុ៥០ឆ្នាំ ធ្លាប់ទៅប្រតិបត្តិការនៅលើលំហអវកាសចំនួន២លើកមកហើយ និងធ្វើជាអ្នកបញ្ជានៅបន្ទប់សាកល្បងលើលំហអវកាសដែលបើកកាលពីខែកញ្ញាកន្លងមក ។ ពួកគេទាំង២នាក់នឹងសាកល្បងជួសជុលឧបករណ៍នៅក្នុងរង្វង់គោចរ ។
របាយការណ៍បញ្ជាក់ថា ចិនបានចំណាយប្រាក់ជាច្រើនពាន់លានដុល្លារទៅលើគម្រោងការអវកាស ក្នុងមហិច្ឆតាដើរឱ្យទាន់សហរដ្ឋអាមេរិក និងអឺរ៉ុប រួមទាំងបានប្រកាសកាលពីខែមេសា២០១៦ថា មានទិសដៅនឹងបង្ហោះយានអវកាសឡើងទៅគោចរ ចុះចត និងស្រាវជ្រាវលើភពព្រះអង្គារនៅឆ្នាំ២០២០ ។
ក្រៅពីនេះចិនមានទិសដៅសង់ស្ថានីយអវកាសរបស់ខ្លួន ដោយមានមនុស្សប្រចាំការនៅឆ្នាំ២០២២ ហើយបញ្ជូនមនុស្សរបស់ខ្លួនទៅជាន់លើភពព្រះចន្ទឱ្យបាន ៕
ចែករំលែកព័តមាននេះ