រាជធានីភ្នំពេញ ៖ ប្រជាពលរដ្ឋប្រមាណជិត២០០គ្រួសាររស់នៅសង្កាត់ផ្សេងៗគ្នា ក្នុងខណ្ឌដង្កោ រាជធានីភ្នំពេញ ត្រូវបានជម្លៀសទៅកាន់ទីទួលសុវត្ថិភាព បន្ទាប់ពីទឹកជំនន់ដងស្ទឹងព្រែកត្នោត ដែលហូរធ្លាក់ពីខេត្តកំពង់ស្ពឺ បានវាយលុកតំបន់រស់នៅរបស់គាត់ ហើយ។ ទឹកជំនន់នេះ បានហូរច្រោះទំនប់ស្ទឹងព្រែកត្នោត ក្នុងខណ្ឌដង្កោ បណ្តាលឲ្យផ្លូវមួយខ្សែ ជាប់ទំនប់ស្ទឹងព្រែកត្នោត ស្ថិតនៅភូមិសិលា សង្កាត់ទៀន ត្រូវបានទឹកហូរកាត់ផ្តាច់ មិនអាចធ្វើចរាចរបានឡើយ ។
ក្នុងស្ថានភាពទឹកបែបនេះ គណៈបញ្ជាការឯកភាពរាជធានីភ្នំពេញ ក៏បានដឹកនាំក្រុមការងារ យកគ្រឿងចក្រចំនួន២គ្រឿង កាយបើកមុខទឹក និងទប់ទំនប់ ដើម្បីទប់ស្កាត់កុំឲ្យផ្លូវបាក់កាន់តែខ្លាំង ដើម្បីបញ្ចៀសទឹកកុំឲ្យហូរចូលភូមិ និងផ្ទះប្រជាពលរដ្ឋបន្តទៅទៀត ។ យោងតាមរបាយការណ៍ពីអាជ្ញាធរខណ្ឌដង្កោបានឲ្យដឹងថា ប្រជាពលរដ្ឋប្រមាណជាង១៧០គ្រួសារ ក្នុងសង្កាត់ទៀន សង្កាត់ស្ពានថ្ម គងណយ រលួស ព្រែកកំពឹស សាក់សំពៅ ដង្កោ ក្រាំងពង្រ និងសង្កាត់ព្រៃស ត្រូវបានជម្លៀសទៅកាន់ទីទួលសុវត្ថិភាព ។
របាយការណ៍ដដែល បានបញ្ជាក់ថា ស្ថានភាពទឹកហូរខ្លាំងបានធ្វើឲ្យផ្ទះប្រជាពលរដ្ឋទាំងនោះ កំពុងរងការប៉ះពាល់ខ្លាំង ដែលតម្រូវឲ្យមានការទំនុកបម្រុងសម្ភារចាំបាច់មួយចំនួនជាបន្ទាន់ ។ ក្នុងពេលចុះទៅពិនិត្យស្ថានភាពទឹកជំនន់នៅតាមបណ្តោយផ្លូវទំនប់សណ្តស្ទឹងព្រែកត្នោត នាព្រឹកថ្ងៃទី១៨ តុលា ២០១៦នេះ លោក ប៉ា សុជាតិវង្ស អភិបាលរាជធានីភ្នំពេញ បានជម្រុញឲ្យអាជ្ញាធរពាក់ពន្ធ័រៀបចំប្រព័ន្ធការពារ និងកាយទំនប់មួយចំនួន ដើម្បីសង្គ្រោះលំនៅឋាន និងដំណាំកសិកម្មរបស់ប្រជាពលរដ្ឋ ។
លោក ប៉ា សុជាតិវង្ស បានបញ្ជាក់ថា ស្ថានភាពជំនន់បែបនេះយើងមិនអាចទប់ស្កាត់បាននោះទេ ប៉ុន្តែបញ្ហាដែលត្រូវគិតគូរ គឺសុវត្ថិភាពរបស់ប្រជាពលរដ្ឋ ។ អាជ្ញាធរត្រូវដោះស្រាយជូនភ្លាមៗចំពោះគ្រួសារពលរដ្ឋណាដែលជួបការលំបាកខ្លាំង ដោយផ្តល់ឲ្យពួកគាត់នូវចំណីអាហារដូចជា អង្ករ មី ទឹកត្រី ទឹកស៊ីអ៊ីវ និងតង់សម្រាប់ធ្វើជម្រកស្នាក់នៅបណ្តោះអាសន្ន ។ លោក ប៉ា សុជាតិវង្ស បានអំពាវនាវឲ្យប្រជាពលរដ្ឋមានការប្រុងប្រយ័ត្នសុវត្ថិភាព ដោយស្ថានភាពទឹកជំនន់នេះនៅតែបន្តការគម្រាមកំហែងទៀតនោះ ហើយអាជ្ញាធរ ត្រូវណែនាំប្រជាពលរដ្ឋដែលរស់នៅតាមមាត់ស្ទឹងព្រែកត្នោត ត្រូវយកចិត្តទុកដាក់ខ្ពស់ពីសុវត្ថិភាព និងព្រទ្យសម្បត្តិរបស់ពួកគាត់ផងដែរ។
លោក នុត ពុធដារ៉ា អភិបាលខណ្ឌដង្កោ បានឲ្យដឹងថា បើទោះបីស្ថានភាពទឹកនៅតំបន់នោះ មិនទាន់ធ្ងន់ធ្ងរនៅឡើយ ប៉ុន្តែក្រុមការងារកំពុងបន្តយ៉ាងមមាញឹក ក្នុងការទប់ទឹក ជាពិសេសត្រៀមចាំជួយប្រជាពលរដ្ឋគ្រប់ពេលវេលាតែម្តង ។ ចំណែកមន្ទីរធនធានទឹក រាជធានីភ្នំពេញ បានឲ្យដឹងថា ជំនន់ស្ទឹងព្រែកត្នោត អាចបន្តគម្រាមកំហែង ភូមិឋាន និងដំណាំរបស់អ្នកស្រុក ដែលរស់នៅតាមបណ្តោយស្ទឹង ហើយតំបន់ដែលរងការគម្រាមកំហែង គឺក្នុងភូមិសាស្ត្រមួយចំនួននៃខេត្តកំពង់ស្ពឺ ខេត្តកណ្តាល និងរាជធានីភ្នំពេញ ៕
ចែករំលែកព័តមាននេះ