BBC ផ្សាយថា កម្មករអណ្តូងរ៉ែគជ់ នៅរដ្ឋ Kachin ភាគខាងជើងប្រទេសមីយ៉ាន់ម៉ា បានជីកឃើញដុំគជ់ដ៏ធំទម្ងន់១៧០តោន កម្ពស់៤,៣ម៉ែត្រ បណ្តោយ៥,៨ម៉ែត្រ ។ តម្លៃប៉ាន់ប្រមាណដំបូងនៃដុំគជ់នោះអាចខ្ពស់ដល់ទៅ១៧០លានដុល្លារឯណោះ។ នោះជាគជ់ប្រទះឃើញដោយកម្រនៅក្នុងអណ្តូងរ៉ែ ។
គជ់នោះស្ថិតនៅលំដាប់ទី២ បន្ទាប់ពីដុំគជ់ប្រទះឃើញកាលពីមុននៅមីយ៉ាន់ម៉ា មានទម្ងន់ដល់ទៅ២៦០តោនឯណោះហើយ បច្ចុប្បន្នត្រូវយកទៅឆ្លាក់ជាព្រះពុទ្ធរូបធំបំផុតនៅលើពិភពលោកដាក់តាំងនៅវត្ត «ព្រះគជ់» ក្រុងអានសាន់ ខេត្តលៀវនីង ប្រទេសចិន ។
ឧស្សាហកម្មអណ្តូងរ៉ែគជ់ ជាឧស្សាហកម្មដ៏ធំរបស់មីយ៉ាន់ម៉ា ដោយមានតម្លៃច្រើនជាងពាក់កណ្តាលនៃផលិតផលសរុបក្នុងស្រុក (GDP) ។ លើសពីនេះមីយ៉ាន់ម៉ាជាប្រភពគជ់ដ៏ធំបំផុតនៅលើពិភពលោក ដោយតម្លៃទិញ-លក់គជ់ឡើងខ្ពស់ជាង ៥០.០០០លានដុល្លារក្នុងមួយឆ្នាំ ។ ទីផ្សារគជ់ធំបំផុតរបស់មីយ៉ាន់ម៉ា គឺប្រទេសចិន ខណៈពេលគជ់មានរហស្សនាមថា ជា «ថ្មនៃឋានសួគ៌» ។ ដុំគជ់ដែលចិនទិញ ត្រូវយកទៅឆ្លាក់ជាគ្រឿងអលង្ការ និងរូបចម្លាក់តម្លៃដ៏មហាសាល ៕
ចែករំលែកព័តមាននេះ