រាជធានីភ្នំពេញ ៖ លោក ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិនបានអញ្ជើញមកដល់ប្រទេសកម្ពុជាហើយ តាមជើងយន្តហោះពិសេសក្នុងដំណើរបំពេញទស្សនកិច្ចផ្លូវការរបស់លោករយៈពេល២ថ្ងៃ
រាជធានីភ្នំពេញ ៖ លោក ស៊ី ជីនភីង ប្រធានាធិបតីនៃសាធារណរដ្ឋប្រជាមានិតចិនបានអញ្ជើញមកដល់ប្រទេសកម្ពុជាហើយ តាមជើងយន្តហោះពិសេសក្នុងដំណើរបំពេញទស្សនកិច្ចផ្លូវការរបស់លោករយៈពេល២ថ្ងៃ នៅកម្ពុជា ចាប់ពីថ្ងៃទី១៣ដល់ទី១៤ ខែតុលា ។ យន្តហោះពិសេស បានចុះចតនៅអាកាសយានដ្ឋានអន្តរជាតិភ្នំពេញ នាវេលាម៉ោងជាង១២ថ្ងៃត្រង់ ដោយមានការរង់ចាំទទួលស្វាគមន៍ដល់ជណ្តើរយន្តហោះពីសំណាក់សម្តេចចៅហ្វាវាំង គង់ សំអុល ឧបនាយករដ្ឋមន្ត្រី រដ្ឋមន្ត្រីក្រសួងព្រះបរមរាជវាំង លោក សាយ សំអាល់ រដ្ឋមន្ត្រីក្រសួងបរិស្ថាន ព្រមទាំងមន្ត្រីអ្នកមុខអ្នកការជាច្រើនរូបទៀត ។
ក្បួនគណៈប្រតិភូជាន់ខ្ពស់នៃសាធារណរដ្ឋប្រជាមានិតចិន ក៏ត្រូវបានស្វាគមន៍អបអរសាទរតាមដងផ្លូវទទួលដំណើរមកដល់ព្រះរាជាណាចក្រកម្ពុជា ពីសំណាក់ក្រុមសិស្សានុសិស្សរាប់ពាន់នាក់ ជាមួយនឹងការគ្រវីទង់ជាតិប្រទេសទាំង២ កម្ពុជា-ចិន ។
នៅពេលមកដល់ទឹកដីកម្ពុជា លោកប្រធានាធិបតី ស៊ី ជីនភីង (Xi JINPING) បន្តដំណើរទៅចូលក្រាបបង្គំគាល់ព្រះមហាក្សត្រកម្ពុជានៅឯព្រះបរមរាជវាំង ជាទីកន្លែងនៃការរៀបចំពិធីបដិសណ្ឋារកិច្ចទទួលស្វាគមន៍គណៈប្រតិភូ និងលោកប្រធានាធិបតីចិនជាផ្លូវការ ក្រោមព្រះរាជាធិបតីភាពដ៏ខ្ពង់ខ្ពស់នៃព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី ។
តាមគម្រោងនៃដំណើរទស្សនកិច្ចនេះ លោក ស៊ី ជីនភីង នឹងអញ្ជើញទៅដាក់កម្រងផ្កាគោរពវិញ្ញាណក្ខន្ធយុទ្ធជនកម្ពុជានៅវិមានឯករាជ្យ ដែលអមដំណើរដោយលោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជា ។ បន្ទាប់មក នៅវេលាម៉ោង៥និង៣០នាទីល្ងាច លោក ស៊ី ជីនភីង និងគណៈប្រតិភូ នឹងបន្តទៅជួបជាមួយសម្តេចតេជោនាយករដ្ឋមន្ត្រី ដែលត្រូវស្វាគមន៍នៅឯវិមានសន្តិភាព ។
ភាគីទាំងពីរនឹងធ្វើជាអធិបតីភាព ក្នុងពិធីចុះហត្ថលេខាលើឯកសារចំនួន២៨ ដែលបានឯកភាពគ្នាទាក់ទងនឹងវិស័យសេដ្ឋកិច្ច ការផ្លាស់ប្តូរពាណិជ្ជកម្ម កសិកម្ម និងទំនាក់ទំនងជាដើម។ នេះបើយោងតាមការជូនព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិ ។
នៅចុងក្រោយនៃដំណើរទស្សនកិច្ចដ៏មមាញឹកនេះ លោកប្រធានាធិបតីចិន និងគណៈប្រតិភូ នឹងត្រូវទទួលស្វាគមន៍ដោយពិធីលៀងសាយភោជន៍ដែលត្រូវរៀបចំឡើងនៅក្នុងព្រះបរមរាជវាំង ដោយមានការយាងចូលរួមដ៏ខ្ពង់ខ្ពស់ពីព្រះមហាក្សត្រ និងព្រះមហាក្សត្រីនរោត្តម មុនិនាថ សីហនុ ផង ។
លោក ស៊ី ជីនភីង បានផ្ញើសារមួយមកកាន់ប្រជាជនកម្ពុជា មុនពេលលោកអញ្ជើញមកដល់ថា នេះគឺជាដំណើរទស្សនកិច្ចជាលើកដំបូងរបស់លោកមកកាន់ប្រទេសកម្ពុជា ចាប់តាំងពីលោកបានឡើងកាន់តំណែងជាប្រធានាធិបតីចិនមក ។ ដូច្នេះ លោកពោរពេញទៅដោយការរំពឹងទុក ចំពោះដំណើរទស្សនកិច្ចលើកនេះ និងក៏បានលើកសរសើរកម្ពុជាថា ជាប្រទេសស្ថិតនៅក្នុងតំបន់ផ្លូវសូត្រសមុទ្រនាសម័យបុរាណ ហើយក៏ជាប្រទេសដែលប្រកបដោយវប្បធម៌ប្រវត្តិសាស្ត្រដ៏ត្រចះត្រចង់ និងយូរអង្វែងថែមទៀត ។
សូមជម្រាបជូនថា ដំណើរទស្សនកិច្ចរបស់លោកប្រធានាធិបតីចិន ស៊ី ជីនភីង នៅកម្ពុជានេះ គឺតបតាមការអញ្ជើញរបស់ព្រះមហាក្សត្រកម្ពុជា ។ បន្ទាប់ពីបញ្ចប់ដំណើរទស្សនកិច្ចនេះលោកប្រធានាធិបតីចិន នឹងបន្តធ្វើទស្សនកិច្ចនៅប្រទេសបង់ក្លាដែស និងឥណ្ឌាផងដែរ ៕
ចែករំលែកព័តមាននេះ