ឥទ្ធិពលព្យុះ AERE សប្តាហ៍នេះ ២១ខេត្ត-ក្រុងប្រឈមនឹងជំនន់ទឹកភ្លៀងខ្ពស់ជាងមុន
រាជធានីភ្នំពេញ ៖ ស្ថានភាពអាកាសធាតុសម្រាប់ថ្ងៃទី១០ តុលា បានបង្ហាញថា ប្រព័ន្ធសម្ពាធទាប (ITCZ) នៅតែបន្តលាតសន្ធឹងលើព្រះរាជាណាចក្រកម្ពុជា
រាជធានីភ្នំពេញ ៖ ស្ថានភាពអាកាសធាតុសម្រាប់ថ្ងៃទី១០ តុលា បានបង្ហាញថា ប្រព័ន្ធសម្ពាធទាប (ITCZ) នៅតែបន្តលាតសន្ធឹងលើព្រះរាជាណាចក្រកម្ពុជា ដែលលក្ខណៈបែបនេះធ្វើឱ្យតំបន់វាលទំនាបមានសីតុណ្ហភាពអប្បបរមាពី២៣-២៥oC និងអតិបរមាពី ៣០-៣២oC ចំណែកផ្ទៃមេឃមានពពកពីមធ្យមទៅច្រើន និងមានខ្យល់បក់មកពីទិសនិរតីមានល្បឿនពី៣ទៅ៥m/s ហើយអាចមានភ្លៀង ផ្គរ នៅផ្នែកខ្លះនៃរាជធានីភ្នំពេញ ខេត្តកណ្តាល តាកែវ កំពង់ស្ពឺ កំពង់ធំ កំពង់ឆ្នាំង ព្រៃវែង ស្វាយរៀង ពោធិ៍សាត់ បាត់ដំបង ប៉ៃលិន សៀមរាប បន្ទាយមានជ័យ និងខេត្តឧត្តរមានជ័យ ។
ចំណែកខ្ពង់រាប សីតុណ្ហភាពអប្បបរមាពី២៣-២៥oC និងអតិបរមាពី៣១-៣៣oC ផ្ទៃមេឃមានពពកពីមធ្យមទៅច្រើន ខ្យល់បក់មកពីទិសនិរតី មានល្បឿនពី៣-៥m/s នឹងអាចមានភ្លៀង ផ្គរ នៅផ្នែកខ្លះនៃខេត្តត្បូងឃ្មុំ កំពង់ចាម ស្ទឹងត្រែង ក្រចេះ ព្រះវិហារ រតនគិរី និងខេត្តមណ្ឌលគិរី ។
តំបន់មាត់សមុទ្រ សីតុណ្ហភាពអប្បបរមាពី២៣-២៥oC និងអតិបរមាពី៣០-៣២oC ផ្ទៃមេឃមានពពកពីមធ្យមទៅច្រើន ខ្យល់បក់មកពីទិសនិរតីមានល្បឿនពី៤-៥m/s នឹងអាចមានភ្លៀង ផ្គរ រន្ទះ នៅផ្នែកខ្លះនៃខេត្តកែប កំពត ព្រះសីហនុ និងខេត្តកោះកុង រលកសមុទ្រអាចមានកម្ពស់ពី០,៥០-១,២៥m ។
យោងតាមសេចក្ដីជូនដំណឹងបន្ថែមស្ដីពីស្ថានភាពអាកាសធាតុនៅថ្ងៃដដែលរបស់ក្រសួងធនធានទឹកនិងឧតុនិយម បានប្រកាសថា បន្ទាប់ពីបានតាមដានលើស្ថានភាពអាកាសធាតុរួចមក ឃើញថា ៖
-ព្យុះទី១៩ ឈ្មោះ AERE នឹងចុះខ្សោយមកជាសម្ពាធទាប និងស្ថិតនៅក្នុងសមុទ្រចិនខាងត្បូង ភាគខាងកើតកោះហៃណាំ ។ សម្ពាធទាបនេះមានឥទ្ធិពលខ្លាំងលើសមុទ្រចិនខាងត្បូង និងព្រះរាជាណាចក្រកម្ពុជា (ពេញមួយសប្ដាហ៍ទី២ នៃខែតុលា នេះ) ។
-ប្រព័ន្ធសម្ពាធទាបបានរំកិលចុះមកភាគខាងត្បូងប្រទេសកម្ពុជា និងកំពុងបង្កើនឥទ្ធិពលលើប្រទេសកម្ពុជា និងតំបន់ដីសណ្ដទន្លេមេគង្គ ។
បាតុភូតធម្មជាតិទាំង២ ខាងលើនេះនឹងបង្កឱ្យមានភ្លៀងបន្ដធា្លក់រាយប៉ាយកាន់តែច្រើនក្នុងក្របខណ្ឌទូទាំងប្រទេស ពិសេសតំបន់ខ្ពង់រាប និងតំបន់ទំនាបកណ្ដាល (ចាប់ពីថ្ងៃទី១២-១៦ ខែតុលា ឆ្នាំ២០១៦) ។
ប្រការដែលត្រូវប្រុងប្រយ័ត្នខ្ពស់ គឺក្នុងសប្ដាហ៍នេះរាជធានី និងខេត្ដដែលស្ថិតនៅក្នុងតំបន់ទំនាបកណ្ដាល និងតំបន់ខ្ពង់រាប ប្រឈមនឹងជំនន់ទឹកភ្លៀងខ្ពស់ជាងពេលកន្លងមក ៕
ចែករំលែកព័តមាននេះ