ក្រុមគ្រូពេទ្យបានទទួលស្គាល់កាន់តែខ្លាំងឡើងថា ការលែងលះគឺជាមូលហេតុនៃជំងឺទាំងផ្លូវកាយ និងផ្លូវចិត្ត រួមទាំងជំងឺស្បែក និងការឈឺសាច់ដុំ ។
លោកស្រី Charlotte Friedman គ្រូពេទ្យប្រចាំគ្រួសារ ដែលជាអ្នកដំណើរការក្រុមទ្រទ្រង់ការលែងលះក្នុងប្រទេសអង់គ្លេសបាននិយាយថា «ខ្ញុំឃើញថាមនុស្សដែលលែងលះស្ទើរតែទាំងអស់មានរោគសញ្ញាដូចជាភាពតានតឹង អារម្មណ៍មិនល្អ ការធ្លាក់ទឹកចិត្ត និងគេងមិនលក់ ។ មនុស្សប្រហែល៦០ភាគរយ រងផលប៉ះពាល់ដល់សុខភាពផ្លូវកាយ ដែលរួមមានការឈឺប្រកាំងមួយចំហៀងក្បាល ជំងឺស្បែក ឬឈឺចង្កេះ ដែលបណ្តាលមកពីការរមួលសាច់ដុំ» ។
ជាការពិតណាស់ ការសិក្សាថ្មីមួយដោយសាកលវិទ្យាល័យរដ្ឋ M Chi gan បានបង្ហាញថា អ្នកដែលធ្លាប់លែងលះមានការធ្លាក់ចុះសុខភាពរបស់ពួកគេជាជាងអ្នកដែលមិនបានលែងលះ រីឯស្ត្រីរងផលប៉ះពាល់ធ្ងន់នៅក្នុងរយៈពេលខ្លី ។
នៅសហរដ្ឋអាមេរិក ការលែងលះរបស់គូភរិយាដែលមានជម្លោះខ្លាំងត្រូវបានគេដឹងថា មានភាពតានតឹងខ្លាំង ដូច្នេះហើយពួកគេបានកំណត់វាជាមូលហេតុនៃជំងឺស្ត្រេសក្រោយប៉ះទង្គិចផ្លូវចិត្ត (PTSD) ដែលជាស្ថានភាពមួយមានការទាក់ទងជាមួយនឹងការរងគ្រោះថ្នាក់ ឬនៅពេលទាហានធ្វើសង្គ្រាម ។
ការសិក្សាបានបង្ហាញថា ការតានតឹងផ្លូវចិត្តបង្កើតឱ្យមានការខូចខាតដែលបង្កឡើងដោយរា៉ឌីកាល់សេរី ដែលជាម៉ូលេគុលគ្មានស្ថិរភាព បំផ្លាញកោសិកាល្អ និងធ្វើឱ្យមានជំងឺបេះដូង មហារីក និងជំងឺធ្ងន់ផ្សេងទៀត ។ នៅពេលអំពើហិង្សាកើតឡើង រាងកាយនឹងផលិតអ៊័រម៉ូន Cortisol កាន់តែច្រើន ដែលធ្វើឱ្យប្រព័ន្ធភាពសាំុរបស់រាងកាយគ្មានលំនឹង និងធ្វើឱ្យវាមិនអាចប្រយុទ្ធប្រឆាំងនឹងជំងឺបាន ។
ការសិក្សាជាច្រើនបានរកឃើញពីការទាក់ទងរវាងកម្រិតស្ត្រេស និងជំងឺមហារីក ។ ក្រុមអ្នកស្រាវជ្រាវនៅសាកលវិទ្យាល័យ lllinois បានសិក្សាលើស្ត្រី ៩៨៩នាក់ ដែលបានធ្វើរោគវិនិច្ឆ័យឃើញថា មានជំងឺមហារីកសុដន់អស់រយៈពេលបីខែ និងបានរកឃើញពីការទាក់ទងរវាងស្ត្រេស និងជំងឺនេះ ។
យោងតាមការស្រាវជ្រាវនេះដែលបានធ្វើបទបង្ហាញនៅឯសមាគមស្រាវជ្រាវជំងឺមហារីកស្ត្រីរបស់សហរដ្ឋអាមេរិកបានបង្ហាញថា ស្ត្រីដែលមានភាពតានតឹងអាចនឹងកើតជំងឺមហារីកសុដន់ដែលមានលក្ខណៈធ្ងន់ ៕
ចែករំលែកព័តមាននេះ