នៅពេលកូនរបស់អ្នកធំធាត់ និងលូតលាស់ ជំនាញភាសារបស់គេក៏ចាប់ផ្តើមមានការអភិវឌ្ឍដែរ ។ ក្មេងខ្លះរៀននិយាយ និងយល់ភាសាបានយ៉ាងលឿនខណៈដែលក្មេងមួយចំនួនទៀតគ្មានសមត្ថភាពនេះឡើយ ។ ស្ថានភាពមួយចំនួននៅក្នុងជីវិតកូនរបស់អ្នកអាចប៉ះពាល់ដល់សមត្ថភាពរបស់ពួកគេក្នុងការនិយាយ និងយល់ភាសា។ ឥទ្ធិពលពីខាងក្រៅ រាប់ចាប់ពីស្តង់ដានៃការថែទាំរហូតដល់ជំហរសេដ្ឋកិច្ចសង្គមរបស់អ្នកអាចរួមចំណែកដល់កត្តាផ្លូវចិត្តដែលអាចប៉ះពាល់ដល់ការអភិវឌ្ឍផ្នែកភាសានៃកូនរបស់អ្នក។
*ស្តង់ដានៃការថែទាំ នៅពេលដែលកុមារម្នាក់ត្រូវបានគេទុកចោល វាអាចប៉ះពាល់យ៉ាងខ្លាំងដល់សមត្ថភាពក្នុងការនិយាយ និងការយល់ដឹងភាសារបស់ពួកគេ នេះបើយោងតាមនាយកដ្ឋានសុខាភិបាលនិងសេវាកម្មរដ្ឋបាលរបស់កុមារ និងគ្រួសារនៃសហរដ្ឋអាមេរិក ។ កុមារដែលត្រូវបានគេមិនអើពើនៅផ្ទះ ឬដាក់ទុកចោលនៅឯកន្លែងថែទាំ ជាធម្មតាមានសមត្ថភាពយល់ដឹងផ្នែកភាសាទាបនៅពេលពួកគេធំឡើង ។ នៅពេលដែលអ្នកមិនអើពើនឹងកូនរបស់អ្នក ឬមិនផ្តល់ការថែទាំនិងការយកចិត្តទុកដាក់ដល់ពួកគេ នោះពួកគេមិនមានឱកាសក្នុងការស្ដាប់អ្នកនិយាយ និងមិនទទួលបានឱកាស ដើម្បីយល់ពីសំឡេង និងអត្ថន័យនៃសម្តីរបស់អ្នកទេ ។ វានឹងធ្វើឲ្យពួកគេមានបញ្ហាសង្គមនៅពេលអនាគត ។
*ជំហរសេដ្ឋកិច្ច ការសិក្សាមួយដែលបានធ្វើឡើងដោយក្រុមអ្នកស្រាវជ្រាវនៅសាកលវិទ្យាល័យ UC Berkley UCLA សាកលវិទ្យាល័យ British Columbia និង Stanford និងបានចេញផ្សាយនៅក្នុង «ទស្សនាវដ្តីនៃការយល់ដឹងវិទ្យាសាស្ត្រណឺរ៉ូន» បានធ្វើតេស្តលើកុមារដែលមានមជ្ឈដ្ឋានសង្គម ផ្សេងៗគ្នាលើភាពឆ្លាតវៃ និងសមិទ្ធផលនៃការសិក្សា ។ ការសិក្សានេះបានរកឃើញថា កុមារដែលមានស្ថានភាពសេដ្ឋកិច្ចសង្គមទាបមានលទ្ធផលមិនល្អដូចកុមារដែលមានស្ថានភាពសេដ្ឋកិច្ចសង្គមខ្ពស់ ។ ប្រាក់ចំណូលរបស់គ្រួសារ របៀបរស់នៅ និងជំហរសេដ្ឋកិច្ចសង្គមអាចបង្កឲ្យមានភាពតានតឹងនៅក្នុងផ្ទះ ការសិក្សានេះបានអះអាង ។ ភាពតានតឹងអាចបញ្ឈប់ការអភិវឌ្ឍរបស់កូនអ្នកលើផ្នែកភាសា និងសមិទ្ធផលនៃការសិក្សា ។
*ជំងឺផ្លូវចិត្ត បញ្ហាផ្លូវចិត្ត និងអាកប្បកិរិយាអាចកំណត់លទ្ធភាពកូនរបស់អ្នកក្នុងការនិយាយ និងការយល់ដឹងផ្នែកភាសា ។ កុមារដែលមានបញ្ហាលើការអភិវឌ្ឍ ឬបញ្ហាអាកប្បកិរិយាដូចជាជំងឺប្រឆាំងសង្គម ឬជំងឺអូទីស អាចនឹងមានបញ្ហានៅពេលប្រាស្រ័យទាក់ទងជាមួយអ្នកដទៃ និងការយល់ដឹងពីការបញ្ចេញទឹកមុខ នេះបើយោងតាមលោក Vicky R. Bowden និង Cindy S Greenberg ដែលបានសរសេរក្នុងសៀវភៅរបស់ពួកគេមានចំណងជើងថា «Children and Their Families: The Continuum of Care.» ។
ប្រសិនបើកូនរបស់អ្នកមានជំងឺផ្លូវចិត្ត អ្នកត្រូវធ្វើការពិភាក្សាជាមួយវេជ្ជបណ្ឌិតរបស់អ្នកពីផលប៉ះពាល់នៃជំងឺនេះចំពោះសមត្ថភាពក្នុងការរៀននិងយល់ពីភាសារបស់កូនអ្នក៕
ចែករំលែកព័តមាននេះ