ខេត្តកំពង់ចាម ៖ ផ្សារស្ពឺដែលមានទីតាំងស្ថិតនៅភូមិស្ពឺកើត ឃុំស្ពឺ ស្រុកចម្ការលើ ដែលត្រូវបានវិនិយោគក្នុងរយៈពេល១៦ឆ្នាំ(ចាប់ពីថ្ងៃទី១ មករា ២០១១ ដល់ថ្ងៃទី៣១ ធ្នូ ២០២៦) ដែលមានម្ចាស់វិនិយោគឈ្មោះ គង់ សុផុន ត្រូវបានគេមើលឃើញថា មានតែការសាង់សង់តូបបន្ថែមជាច្រើនតូបក្នុងនោះតូបមួយលក់ក្នុងតម្លៃចាប់ពី៩.០០០ដុល្លារទៅ១៥.០០០ដុល្លារ។ ប៉ុន្តែលូនៅក្នុងផ្សារវិញពោរពេញទៅដោយសំរាមពេញណែន មិនព្រមស្តារនោះទេ ក្នុងពេលដែលភ្លៀងធ្លាក់ម្តងៗទឹកហូរច្រាលមកលើពិបាកនឹងដើរ ថែមទាំងជះក្លិនអសោចផងដែរ។
អាជីវករម្នាក់ប្រាប់ឲ្យដឹងនៅព្រឹកថ្ងៃទី៥ តុលា ២០១៦នេះថា នៅពេលដែលផ្សារស្ពឺបានកកើតដំបូងៗនៅត្រង់មុខផ្សារមានទីធ្លាស្រឡះ និងខ្យល់អាកាសចេញចូលបានល្អ ហើយការលក់ដូរដាច់ថែមទៀត។ ចាប់តាំងពីផ្សារនេះត្រូវបានវិនិយោគ មានការសាងសង់តូបបន្ថែមនៅជួរខាងមុខលយមកថ្នល់បាំងតូបអ្នកនៅខាងក្នុង ការលក់ដូរត្រូវបានថយចុះមិនសូវដាច់។ ហើយរាល់ថ្ងៃនៅពេលណាដែលមេឃភ្លៀងធ្លាក់មកនោះ ធ្វើឲ្យទឹកហូរព្រៀបតែម្តង ដោយសារតែនៅក្នុងលូនោះពោរពេញទៅដោយសំរាមឡើងណែនមិនត្រូវបានគេស្តារនោះទេ ដែលបង្កឲ្យប៉ះពាល់សុខភាពថែមទៀត។
អាជីវករសូមសំណូមពរដល់ម្ចាស់វិនិយោគមេត្តាស្តារលូ យកសំរាមចេញដើម្បីឲ្យចរន្តទឹកហូរបានស្រួលផង កុំខាងតែមើលឃើញតែលុយខ្លាំងពេក។ អាជីវករលក់ដូរម្នាក់ឈ្មោះ ស៊ាង ឡេង ភេទស្រី អាយុ៣៥ឆ្នាំ ប្រាប់ឲ្យដឹងថា កាលពីរឆ្នាំមុនក្នុង១ព្រឹកលក់បានលុយយ៉ាងតិច៥០ម៉ឺនរៀល ហើយស្បែកជើង១គូលក់បាន៥០០០រៀល លុះមកដល់ឥឡូវលក់៣គូ១ម៉ឺនរៀលលក់មិនដាច់ទៀត។ មនុស្សចេញចូលផ្សារស្ពឺធម្មតា តែមិនសូវមានអ្នកទិញមិនដឹងថាកត្តានេះមកពីអ្វីនោះទេ។
ហើយនៅព្រឹកថ្ងៃទី៥ តុលា ២០១៦លក់ពេញ១ព្រឹកបានលុយតែជាង២០ម៉ឺនរៀល ចំណូលចេះតែធ្លាក់ចុះ ទោះបីជាបែបណាក្តីគាត់នឹងនូវតែបន្តអាជីពនេះទៀត ដើម្បីទ្រទ្រង់ជីវភាពគ្រួសារ។ អាជីវករលក់ចំណីសត្វម្នាក់ប្រាប់ឲ្យដឹងថា តូបលក់ដូរត្រូវគាត់បានទិញពីម្ចាស់ផ្សារក្នុងតម្លៃ ១៤.៥០០ដុល្លារ ដើម្បីលក់ចំណីសត្វជាច្រើនខែមកហើយ ការលក់ដូរមិនដាច់ដូចឆ្នាំមុនៗទេ។ ព្រោះថានៅឆ្នាំនេះកសិករដែលទទួលបានផលដំណាំលក់បានថោក ទើបធ្វើឲ្យពួកគាត់មិនសូវសម្បូរលុយឡើងមកផ្សារទិញអ្វីៗនោះ។
ក្នុងពេលដែលភ្នាក់ងារយើងកំពុងតែសម្ភាសជាមួយនឹងអាជីវករលក់ដូរនោះ គេឃើញអ្នកទារភាស៊ីផ្សារស្ពឺ បានដើរមកមើលឈរស្តាប់ រួចក៏បានដើរទៅប្រាប់ថៅកែស្រី ដែលកំពុងតែឡើងជិះរថយន្តទំនើបឡិចស៊ីស៥៧០ ពណ៌ស១គ្រឿង ដោយមិនបានថ្លែងវាចាទេ ហើយរថយន្តនោះបានបើកចេញទៅបាត់ក្រោយពីបានមកឈប់មួយសន្ធុះធំ ៕
ចែករំលែកព័តមាននេះ