ខេត្ដកំពង់ស្ពឺ ៖ នាឱកាសបុណ្យភ្ជុំបិណ្ឌឆ្នាំនេះ ភ្លៀងបានចាប់ផ្ដើមធ្លាក់ខ្លាំងជាបន្តបន្ទាប់ ជាប់ៗគ្នានៅតំបន់ជួរភ្នំឱរ៉ាល់ ស្រុកឧដុង្គ ស្រុកថ្ពង ស្រុកសំរោងទង និងក្រុងច្បារមន ធ្វើឲ្យមានជំនន់ទឹកភ្លៀងលិចភូមិឋាន ហេដ្ឋារចនាសម្ព័ន្ធ និងស្រែរបស់ប្រជាកសិករ
ខេត្ដកំពង់ស្ពឺ ៖ នាឱកាសបុណ្យភ្ជុំបិណ្ឌឆ្នាំនេះ ភ្លៀងបានចាប់ផ្ដើមធ្លាក់ខ្លាំងជាបន្តបន្ទាប់ ជាប់ៗគ្នានៅតំបន់ជួរភ្នំឱរ៉ាល់ ស្រុកឧដុង្គ ស្រុកថ្ពង ស្រុកសំរោងទង និងក្រុងច្បារមន ធ្វើឲ្យមានជំនន់ទឹកភ្លៀងលិចភូមិឋាន ហេដ្ឋារចនាសម្ព័ន្ធ និងស្រែរបស់ប្រជាកសិករមួយចំនួននៅក្នុងភូមិសាស្ត្រស្រុកឧដុង្គ និងស្រុកថ្ពង ។ ក្នុងនោះផងដែរ ទឹកបាននិងបន្តហូរចុះមកតំបន់ទំនាប និងបង្កឲ្យមានការជន់លិចនៅតំបន់មួយចំនួនទៀតក្នុងខេត្ត ។
ប្រឈមមុខនឹងបញ្ហានេះ មជ្ឈដ្ឋានប្រជាកសិករបានលើកឡើងថា បើសិនជាខាងមន្ទីរធនធានទឹកនិងឧតុនិយម ជួយរំដោះជំនន់ទឹកភ្លៀងនេះមិនទាន់ទេនោះ តំបន់ដែលជន់លិចប្រាកដជាត្រូវរលួយស្រូវជាក់ជាមិនខានឡើយ។មានការលើកឡើងថា ស្រូវទាំងអស់បើមិនត្រាំទឹកយូរទេនឹងល្អ តែបើយូរថ្ងៃទឹកមិនហូរ ឬរំដោះទឹកចេញមិនទាន់នោះស្រូវនឹងរលួយអស់ជាមិនខាន ។
ពាក់ព័ន្ធនឹងជំនន់ទឹកភ្លៀងនេះដែរ លោក ញ៉ាញ់ ជៀបហ៊ង ប្រធានមន្ទីរធនធានទឹកនិងឧតុនិយមខេត្ត បានប្រាប់តាមទូរស័ព្ទនៅព្រឹកថ្ងៃទី០៤ ខែតុលា ថា ក្រុមការងាររបស់មន្ទីរ និងក្រសួងធនធានទឹកនិងឧតុនិយម កំពុងធ្វើការរំដោះទឹកជំនន់នេះទម្លាក់ទៅតាមប្រឡាយមេរលាំងជ្រៃខាងជើងមកកាន់អូរក្រាំងអំបិល រួចបន្តបង្ហូរតាមប្រឡាយមេតាហោទម្លាក់ចូលទៅស្ទឹងព្រែកត្នោត ក្នុងភូមិសាស្ត្រខេត្តកណ្តាលជាបន្ត ដើម្បីឱ្យទឹកស្រកពីតំបន់ខាងលើកុំឱ្យមានការខូចខាតស្រូវរបស់ប្រជាពលរដ្ឋ ។
ទោះជាយ៉ាងណា រហូតមកដល់ពេលនេះទឹកនៅទំនប់តាសាល ស្រុកឱរ៉ាល់ បានហក់ឡើង៨តឹកបន្ថែមទៀតលើកម្ពស់ទឹក១៩,៩២ម៉ែត្រក្នុងទំនប់ ។ លោកប្រធានមន្ទីរបន្តថា ពេលនេះទឹកបាននិងកំពុងហូរលើទំនប់បង្ហៀរកម្ពស់៨តឹកធ្លាក់ទៅក្រោម ។
ទាក់ទងនឹងការលើកឡើងរបស់ប្រជាកសិករដែលថា បើមិនមានការបង្ហូរចុះទៅក្រោមទាន់ពេលទេស្រូវរបស់ពួកគាត់នឹងរលួយនោះ លោកប្រធានមន្ទីរលើកឡើងថា នេះជាកត្តាធម្មជាតិ ខាងជំនាញបាននិងកំពុងស្វះស្វែងដើម្បីបង្ហូរទម្លាក់ចុះមកក្រោម ចៀស វាងការជន់លិច ដូច្នេះយើងអាចត្រូវការពេលវេលាយូរបន្តិចទម្រាំទឹកហូរធ្លាក់ទៅអស់ ។
លោកប្រធានមន្ទីរបានបញ្ជាក់ដែរថា បើសិនករណីចាំបាច់នោះនឹងយកគ្រឿងចក្រកាយដីបើកមុខទឹកឱ្យហូរកាន់តែខ្លាំងថែមទៀត ។ នៅព្រឹកថ្ងៃនោះ លោករដ្ឋមន្ត្រីក្រសួងធនធានទឹកក៏បានចុះមកពិនិត្យស្ថានភាពទឹកជំនន់នេះផងដែរ ។
បើទោះជាយ៉ាងនេះក្តី ប្រជាកសិករបានសម្ដែងនូវការត្រេកអរចំពោះក្រុមការងារធនធានទឹក ដែលបានធ្វើការរំដោះជំនន់ទឹកភ្លៀងនេះទាន់ពេលវេលា បើទោះជាមិនបានរហ័សដូចចិត្តក្តីក៏អាចកាត់បន្ថយការជន់លិចបានមួយកម្រិតដែរ ។ បើមិនដូច្នោះទេ ស្រូវរបស់ពួកគាត់ប្រាកដជារលួយអស់ជាមិនខានព្រោះតែត្រាំទឹកយូរពេក ៕
ចែករំលែកព័តមាននេះ