អង្គការសុខភាពពិភពលោកធ្លាប់បានឲ្យដឹងហើយថា ទូរស័ព្ទដៃគឺជាភ្នាក់ងារបង្កជំងឺមហារីកមួយក្នុងចំណោមភ្នាក់ងារបង្កដទៃទៀត ។ មានវិធីសាមញ្ញ ខ្លះៗ ធ្វើឱ្យអ្នកមានសុវត្ថិភាពក្នុងការប្រើប្រាស់ទូរស័ព្ទដៃ ។
១-ប្រើកាសនៅពេលនិយាយទូរស័ព្ទ
ការប្រើកាសមិនត្រឹមតែមានសំឡេងច្បាស់ទេ ប៉ុន្តែវាបញ្ចេញវិទ្យុសកម្មតិចជាងទូរស័ព្ទដៃ នេះបើយោងតាមក្រុមការងារបរិស្ថាន (EWG)។ អ្នកគួរតែទុកទូរស័ព្ទដៃរបស់អ្នកឲ្យនៅឆ្ងាយពីក្បាលរបស់អ្នក។ នៅពេលអ្នកនៅកាន់តែឆ្ងាយពីប្រភពវិទ្យុសកម្ម នោះអ្នកនឹងទទួលរងផលប៉ះពាល់កាន់តែតិចតួច ។
២-ផ្ញើសារពេលដែលអ្នកអាចផ្ញើបាន
ទូរស័ព្ទដៃប្រើប្រាស់ថាមពលតិច និងបញ្ចេញវិទ្យុសកម្មតិចដូចគ្នា នៅពេលដែលអ្នកផ្ញើសារជាងពេលដែលអ្នកនិយាយ នេះបើយោងតាម EWG បាននិយាយ ។ ការផ្ញើសារក៏បានធ្វើឲ្យប្រភពវិទ្យុសកម្មនៅឆ្ងាយពីខួរក្បាលរបស់អ្នកដែរ ។
៣-ទុកទូរស័ព្ទនៅឲ្យឆ្ងាយពីត្រចៀករបស់អ្នក
គេហទំព័រ Health.com បានណែនាំថា នៅពេលអ្នកហៅចេញតាមទូរស័ព្ទ អ្នកគួរតែរង់ចាំរហូតដល់ការហៅចេញរបស់អ្នកត្រូវបានតភ្ជាប់មុនពេលដែលអ្នកយកទូរស័ព្ទទៅដាក់ក្បែរត្រចៀក ធ្វើបែបនេះអាចកាត់បន្ថយការប៉ះនឹងវិទ្យុសកម្ម ។ នៅពេលដែលអ្នកនិយាយ ដាក់ទូរស័ព្ទនៅឲ្យឆ្ងាយពីត្រចៀករបស់អ្នក និងយកវាមកជិតពេលអ្នកកំពុងស្ដាប់។ ដោយសារតែកម្រិតវិទ្យុសកម្មមានភាពខ្លាំងនៅពេលដែលទូរស័ព្ទដៃបញ្ជូនសញ្ញាជាងពេលដែលវាទទួលសញ្ញាពីភាគីម្ខាងទៀត នេះបើយោងតាមលោក Lin Zhong ជំនួយការសាស្ត្រាចារ្យផ្នែកវិស្វកម្មអគ្គិសនី និងកុំព្យូទ័រនៅសាកលវិទ្យាល័យ Rice University ទីក្រុងហ៊ូស្តុន បានប្រាប់កាសែត New York Times ។
៤-ហៅទូរស័ព្ទចេញក្នុងជណ្តើរយន្តប្រអប់ឬរថយន្ត
អ្នកបានដឹងរួចទៅហើយថា វាមានគ្រោះថ្នាក់ណាស់ពេលអ្នកកំពុងបើកបរហើយនិយាយទូរស័ព្ទ ។ លើសពីនេះទៅទៀត គេហទំព័រ Health.com បានឲ្យដឹងថា ទូរស័ព្ទដៃប្រើថាមពលកាន់តែច្រើនទៀតដើម្បីបង្កើតការតភ្ជាប់នៅកន្លែងដែលមានលោហៈព័ទ្ធជុំវិញដូចជារថយន្ត និងជណ្តើរយន្តប្រអប់ ។
៥-ត្រូវប្រាកដថាកូនរបស់អ្នកប្រើទូរស័ព្ទលើតុ
សព្វថ្ងៃនេះ វាហាក់ដូចជាសូម្បីតែក្មេងតូចក៏មានទូរស័ព្ទដៃដែរ ប៉ុន្តែអ្នកជំនាញបាននិយាយថា កុមារងាយរងគ្រោះបំផុតចំពោះគ្រោះថ្នាក់ដែលបណ្តាលមកពីវិទ្យុសកម្ម ។ EWG បាននិយាយថា ខួរក្បាលរបស់កុមារស្រូបយកកាំរស្មីវិទ្យុសកម្មទូរស័ព្ទដៃចំនួនពីរដងច្រើនជាងមនុស្សពេញវ័យ ។
យោងតាមកាសែត New York Times អាជ្ញាធរសុខភាពក្នុងប្រទេសអង់គ្លេស បារាំង អាល្លឺម៉ង់ និងរុស្ស៊ី មានការព្រមានប្រឆាំងនឹងការអនុញ្ញាតឱ្យកុមារប្រើទូរស័ព្ទដៃ ។ ដូច្នេះអ្នកគួរតែឲ្យពួកគេប្រើទូរស័ព្ទដៃលើតុជំនួសវិញ ៕
ចែករំលែកព័តមាននេះ