កងទ័ពស៊ីរី និងពួកជីវពលស្និទ្ធរដ្ឋាភិបាលកាលពីថ្ងៃទី២៧ កញ្ញា បានបើកការវាយលុកតាមជើងគោកយ៉ាងធំមួយប្រឆាំងបណ្តាសង្កាត់ភាគខាងកើតក្រុងអាឡែបកាន់កា.ប់ដោយពួកឧទ្ទាម ៨ថ្ងៃ ក្រោយបរាជ័យនៃបទឈប់
កងទ័ពស៊ីរី និងពួកជីវពលស្និទ្ធរដ្ឋាភិបាលកាលពីថ្ងៃទី២៧ កញ្ញា បានបើកការវាយលុកតាមជើងគោកយ៉ាងធំមួយប្រឆាំងបណ្តាសង្កាត់ភាគខាងកើតក្រុងអាឡែបកាន់កាប់ដោយពួកឧទ្ទាម ៨ថ្ងៃ ក្រោយបរាជ័យនៃបទឈប់បាញ់គ្នាតាមរយៈការចរចារវាងសហរដ្ឋអាមេរិក និងរុស្ស៊ី ។
សម្រាប់ក្រុងវ៉ាស៊ីនតោនយល់ថា នេះជាភស្តុតាងបង្ហាញថា ក្រុងដាម៉ាស់ ក្រុងមូស្គូ និងបណ្តាសម្ព័ន្ធមិត្តតំបន់បានបោះបង់ចោលដំណើរការសន្តិភាព ដើម្បីងាកទៅកម្ទេចការបះបោរជិត៦ឆ្នាំមកហើយ ។ រដ្ឋការអាេមរិកដែលចោទប្រកាន់ថា ការវាយប្រហាររបស់កងទ័ពស៊ីរី និងរុស្ស៊ីនៅក្រុងអាឡែបសំដៅលើជនស៊ីវិល បុគ្គលិកពេទ្យ និងមនុស្សធម៌ជាអំពើព្រៃផ្សៃ និងជាឧក្រិដ្ឋកម្មសង្គ្រាម តែក្រុងមូស្គូនិយាយថា ការចោទប្រកាន់នេះមិនអាចទទួលយកបានពីគិតពីសភាពការណ៍យ៉ាងស្មុគស្មាញនៅស៊ីរី ។
បណ្តាសង្កាត់ក្រុងអាឡែបជាប់ការឡោមព័ទ្ធរបស់កងទ័ពរដ្ឋាភិបាលដែលមានប្រជាជន២៥០.០០០នាក់រងការទម្លាក់គ្រាប់បែក និងបាញ់ផ្លោងយ៉ាងខ្លាំងក្លាបំផុតតាំងពីការបញ្ចប់បទឈប់បាញ់គ្នាដែលប្រកាសកាលពីថ្ងៃទី១៩ កញ្ញា ដោយអគ្គសេនាធិការកងទ័ពស៊ីរីក្រោយចូលជាធរមានរយៈពេលមួយសប្តាហ៍មក ។
ប្រជាជនរាយការណ៍ថា ការវាយប្រហារតាមអាកាសមានច្រើនបំផុតនាពេលយប់មុនការវាយលុកតាមជើងគោក ។ យោងតាមក្រុមការពារស៊ីវិលស៊ីរីថា មនុស្សយ៉ាងតិច៣០នាក់ស្លាប់ ។
យោងតាមទូរទស្សន៍រដ្ឋស៊ីរីថា កងទ័ពវាយដណ្តើមយកបានសង្កាត់ AL FARAFRA ជាសង្កាត់មួយនៃទីក្រុងចាស់ ។ ចំណែកពួកបះបោរទទួលស្គាល់ថា កងទ័ពក្រុងដាម៉ាស់ពិតជាបានរុលទៅមុខក្នុងតំបន់នេះ ក៏ប៉ុន្តែអះអាងថា កងទ័ពស៊ីរីត្រូវវាយរុញច្រានលើរណសិរ្ស៤ទៀត ។
ចាកចេញដំណាលគ្នាពីទិសខាងជើង និងខាងត្បូងកងទ័ពស៊ីរី និងកងជីវពលអីុរ៉ង់ អីុរ៉ាក់ និងលីបង់ ដែលលើកគ្នាមកជួយបានវាយប្រហារតំបន់ទីក្រុងចាស់ ព្រមទាំងលើផ្លូវជាច្រកចូលសំខាន់ៗ រួចការប្រយុទ្ធគ្នាផ្ទុះឡើងយ៉ាងខ្លាំង ។
ដោយឡែក កងយន្តហោះរុស្ស៊ីបានបង្កើនសកម្មភាពយ៉ាងខ្លាំងជួយទ្រទ្រង់ដល់កងទ័ពរដ្ឋាភិបាលស៊ីរី ដែលចូលរួមក្នុងប្រតិបត្តិការតាមជើងគោក ប្រឆាំងពួកភេរវករ ។
យោងតាមទិន្នន័យនាពេលថ្មីៗនេះថា ក្នុងមួយថ្ងៃៗកងយន្តហោះរុស្ស៊ីចេញវាយប្រហារគិតជាមធ្យមដល់៥០លើក ។ បណ្តាយន្តហោះទម្លាក់គ្រាប់បែករុស្ស៊ីបានវាយប្រហារលើបណ្តាទីតាំងរបស់ក្រុមរដ្ឋអ៊ិស្លាមនាភាគខាងកើតក្រុងហូម ហើយក៏កម្ទេចគោលដៅជាច្រើននៅជិតផ្លូវថ្នល់ទៅកាន់ទីក្រុង DEIR EZZOR ។ មជ្ឈមណ្ឌលទីបញ្ជាការដ្ឋានមួយរបស់ក្រុមរដ្ឋអ៊ិស្លាមត្រូវកម្ទេចនៅកន្លែងមួយចម្ងាយប៉ុន្មានសិបគីឡូម៉ែត្រពីទីក្រុង PALMYRE ។ លើសពីនេះទៀត កងយន្តហោះរុស្ស៊ីកម្ទេចក្បួនរថពាសដែកមួយរបស់ក្រុមរដ្ឋអ៊ិស្លាមដែលកំពុងបើកបរសំដៅក្រុង DEIR EZZOR ៕
ចែករំលែកព័តមាននេះ