រាជធានីភ្នំពេញ ៖ លោកប៉ិច បូឡែន នាយកប្រតិបត្តិ ក្រុមហ៊ុន Westline Education Group ដែលជាក្រុមហ៊ុនផ្តោតលើការសិក្សា ថ្លែងនៅក្នុងពិធីចែកវិញ្ញាបនបត្រដល់សិស្សបញ្ចប់ការសិក្សាថ្នាក់មធ្យមសិក្សាបឋមភូមិ
រាជធានីភ្នំពេញ ៖ លោកប៉ិច បូឡែន នាយកប្រតិបត្តិ ក្រុមហ៊ុន Westline Education Group ដែលជាក្រុមហ៊ុនផ្តោតលើការសិក្សា ថ្លែងនៅក្នុងពិធីចែកវិញ្ញាបនបត្រដល់សិស្សបញ្ចប់ការសិក្សាថ្នាក់មធ្យមសិក្សាបឋមភូមិ និងទុតិយភូមិកាលពីថ្ងៃទី២៦ ខែកញ្ញា ឆ្នាំ២០១៦ នៅមជ្ឈមណ្ឌលសហប្រតិបត្តិការកម្ពុជាកូរ៉េថា ក្នុងប្រទេសកម្ពុជាកំពុងអភិវឌ្ឍន៍ ដូចជាកម្ពុជាយើងនេះ សិស្សនិស្សិតដែលទើបប្រលងជាប់បាក់ឌុប និងត្រៀមចូលសាកលវិទ្យាល័យគួរគិត និងស្វែងរកមុខវិជ្ជាណាដែលអាចមានទីផ្សារទូលាយ ។
លោកបានអោយដឹងថា ជាទូទៅមាតាបិតា និងសិស្សានុសិស្សហាក់ដូចជាមិនសូវអើពើ និងយកចិត្តទុកដាក់ជ្រើសរើសមុខវិជ្ជា ឬសាលាសម្រាប់បន្តការសិក្សាបន្ទាប់ពីប្រលងចប់បាក់ឌុប ។ តាមពិតទៅការជ្រើសរើស មុខវិជ្ជាសម្រាប់បន្តការសិក្សានៅថ្នាក់ឧត្តមសិក្សា មិនមែនទាល់តែដល់ថ្នាក់ទី១២ហើយទើបជ្រើសរើសនោះទេ ឬក៏ចាំចប់បាក់ឌុបចាំជ្រើសរើសដែរ សិស្សានុសិស្ស ក៏ដូចជាមាតាបិតា គួរស្ទង់ចិត្តកូន ឬកូនៗត្រូវសម្រេចដោយខ្លួនឯងថា តើត្រូវរៀននៅថ្នាក់ឧត្តមសិក្សាតាំងពីថ្នាក់ទី១០ ឬ១១មកម្ល៉េះ ។ បើតាមកម្មវិធីសិក្សារបស់ក្រសួងអប់រំយុវជននិងកីឡា ក៏បានកំណត់មុខវិជ្ជាសម្រាប់សិស្សជ្រើសរើសផងដែរ នៅពេលដែលពួកគាត់ចូលថ្នាក់ទុតិយភូមិ ឬថ្នាក់ទី១០ ទី១១ និងទី១២ ។
លោកបន្តថា មាតាបិតាអាចសាកសួរកូនថា គាត់ចង់រៀនអីបន្ទាប់ពីចប់បាក់ឌុប ហើយឧទាហរណ៍ថា បើគាត់ចង់រៀនវិស្វករ ដូចនេះកូនត្រូវរៀនអីអោយត្រូវនឹងមុខជំនាញហ្នឹង ហើយមិនមែនចាំទាល់តែដល់ថ្នាក់ទី១២ ទើបខំរៀននោះ សិស្សអាចត្រូវពង្រឹងសមត្ថភាពខ្លួនឯងតាំងពីថ្នាក់ទី១០ ថ្នាក់ទី១១ មកអោយហើយ ដើម្បីអោយមានមូលដ្ឋានគ្រឹះកាន់តែខ្លាំង ។
លោកបន្ថែមថា សិស្សានុសិស្សទាំងអស់គួរតែសំលឹងមើលជំនាញណាដែលកំពុងត្រូវការជាមួយនឹងស្ថានភាពនៃប្រទេសកម្ពុជាយើង ដែលជាប្រទេសកម្ពុជាអភិវឌ្ឍន៍ តែបើតាមយោបល់របស់លោកក្នុងស្ថានភាពនេះមុខវិជ្ជាវិទ្យាសាស្ត្រពិតជាមានសារសំខាន់ និងជាមុខវិជ្ជាមួយដែលខ្លាំងសម្រាប់សិស្សានុសិស្សដែលត្រូវចាប់យក និងខិតខំប្រឹងប្រែងអោយបានខ្លាំងឡើង ។ លោកថា៖ «កាលពីមុនសាលាវេស្ទន៍ឡាញបានបែងចែកមុខវិជ្ជាជាវិទ្យាសាស្ត្រពិត និងវិទ្យាសាស្ត្រសង្គម តែក្រោយមកយើងក៏បានបិទចោលផ្នែកវិទ្យាសាស្ត្រសង្គម និងអោយសិស្សប្រឹងប្រែងទាំងអស់វិញ និងត្រូវផ្ដោតទៅលើមុខវិជ្ជាវិទ្យាសាស្ត្រ ហើយសិស្សត្រូវរៀនគណិត រូប គីមី ជីវៈ និងមុខវិទ្យាផ្សេងទៀតផងដែរ » ។
គួរបញ្ជាក់ថា នៅក្នុងពិធីចែកវិញ្ញាបនបត្ររបស់សាលាអន្តរជាតិវេស្ទន៍ឡាញ មានសិស្សសរុបទាំងអស់ទាំង ថ្នាក់មធ្យមសិក្សាបឋមភូមិ ( ឌីប្លូម ) និងថ្នាក់មធ្យមសិក្សាទុតិយភូមិ (បាក់ឌុប ) មានចំនួនប្រមាណ៤០០នាក់ទូទាំងសាខាទាំងអស់ក្នុងរាជធានីភ្នំពេញ ៕
ចែករំលែកព័តមាននេះ