សារព័ត៌មានបរទេសកាលពីពេល ថី្មៗកន្លងមកផ្សាយថា សហគមន៍អន្ដរជាតិ ដើម្បីអភិរក្សធម្មជាតិ និងធនធានធម្មជាតិ(IUCN)បានបង្ហាញរបាយការណ៍ចំនួនដំរីអ្រាហ្វិកក្នុងទសវត្សកន្លងមកអំឡុងពីឆ្នាំ២០០៦ ដល់២០១៦ បានធ្លាក់ចុះប្រហែល២០% ឬប្រហែល១១០.០០០ក្បាល ខណៈពេលតួលេខដំរីបច្ចុប្បន្នមានប្រហែលមាន៤១៥.០០០ក្បាល ។
វាជាស្ថានភាពដ៏អាក្រក់បំផុតនៃចំនួនសត្វដំរីក្នុងអំឡុង២៥ឆ្នាំកន្លងមកចាប់តាំងពីទសវត្សឆ្នាំ១៩៧០និង១៩៨០ ដោយហេតុផលចម្បងអាចបណ្ដាលមកពីការទាក់ចាប់ និងសម្លាប់យកភ្លុក។
លោកស្រីស៊ូ លីប៊ើមេន នាយិការងសហគមន៍អភិរក្សសត្វព្រៃ(WCS)បានអំពាវនាវឱ្យប្រទេសនានា ត្រូវអនុវត្តបទដ្ឋានដ៏ចាំបាច់ រួមទាំងលុបបំបាត់ទីផ្សារជួញដូរភ្លុកដំរីនៅក្នុងប្រទេស ដើម្បីបិទច្រកការយកភ្លុកដោយខុសច្បាប់ដាក់លក់ ។
តាមរបាការណ៍របស់(IUCN)បញ្ជាក់ថា នៅមានតំបន់ជាច្រើនទៀតមិនអាចស្រាវជ្រាវក្នុងលណ្ខណៈជាប្រព័ន្ធបាន ដូចនៅស៊ូដង់ខាងត្បូង លីប៊ី និងអ្រាហ្វិកកណ្ដាល ។ ចំណែកតំបន់ដែលបានទទួលការស្រាវជ្រាវឃើញថា អត្រាធ្លាក់ចុះចំនួនដំរីនៅតង់សានីដែលពឹងផ្អែកលើផ្នែកទេសចរណ៍ឃើញថា កំពុងឈានទៅជាវិបត្តិ ព្រោះមានការថយចុះប្រហែល៦០% ខណៈពេលចំនួនដំរីនៅប្រទេសណាមីប៊ី អ្រាហ្វិកខាងត្បូង និងស៊ីមបាវ៉េ ហាក់ដូចជានៅមានស្ថិរភាព ឬមានអត្រាកើនខ្ពស់ ។
របាយការណ៍នោះឱ្យដឹងក្នុងកិច្ចប្រជុំប្រទេសជាសមាជិកអនុសញ្ញាស្តីការជួញដូរ អន្តរជាតិ ប្រភេទសត្វព្រៃ និងធញ្ញជាតិដែលជិតផុតពូជ(CITES)លើកទី១៧ ដែលរៀបចំឡើងកាលពីថ្ងៃទី២៤ កញ្ញា ដល់ថ្ងៃទី៥ តុលា នៅទីក្រុង(ចូហានណេសប៊ើក) អ្រាហ្វិកខាងត្បូងដោយមានអ្នកអភិរក្ស និងអ្នកដែលពាក់ព័ន្ធពីរដ្ឋាភិបាលជាច្រើនពាន់នាក់ចូលរួមដើម្បីរិះរកវិធានការនានាក្នុងការគ្រប់គ្រងការជួញដូរសត្វព្រៃ ៕
ចែករំលែកព័តមាននេះ