រាជធានីភ្នំពេញ ៖ លោកស្រីវេជ្ជបណ្ឌិតថាវ សុថាវី គ្រូពេទ្យឯកទេសជំងឺសើស្បែក និងកាមរោគនៃមន្ទីរពេទ្យកាល់មែ៉ត បានមានប្រសាសន៍ថា រហូតមកដល់ដើមទសវត្សទី៨០ ជំងឺសិរមាន់នៅលើប្រដាប់បន្តពូជ
រាជធានីភ្នំពេញ ៖ លោកស្រីវេជ្ជបណ្ឌិតថាវ សុថាវី គ្រូពេទ្យឯកទេសជំងឺសើស្បែក និងកាមរោគនៃមន្ទីរពេទ្យកាល់ម៉ែត បានមានប្រសាសន៍ថា រហូតមកដល់ដើមទសវត្សទី៨០ ជំងឺសិរមាន់នៅលើប្រដាប់បន្តពូជ ត្រូវបានគេចាត់ទុកថា មិនបណ្តាលឲ្យគ្រោះថ្នាក់មហារីកទេ តែវាមានលក្ខណៈស្មុគស្មាញជាងជំងឺកាមរោគដទៃទៀត ។ នៅពេលបច្ចុប្បន្ននេះ គេបានរកឃើញថា ជំងឺសិរមាន់អាចវិវឌ្ឍទៅជាមហារីកបាន ដែលនាំមកនូវភាពខ្វល់ខ្វាយមួយចំនួន ។ ជំងឺនេះវាជាប់ពាក់ព័ន្ធទៅនឹងមហារីកស្បូន និងមហារីកប្រដាប់ភេទ ។ ខាងក្រោមនេះជាសញ្ញាមួយចំនួននៃរោគសិរមាន់ ៖
ក-រូបរាងរបស់ជំងឺសិរមាន់ដែលមាននៅលើប្រដាប់បន្តពូជ ៖ ជំងឺសិរមាន់នៅតាមផ្លូវបន្តពូជ អាចមានរូបរាងដូចជាជំងឺសិរមាន់នៅលើកន្លែងផ្សេងទៀតនៃខ្លួនប្រាណមនុស្សដែរ ។ វាគឺជាដុំសាច់មួយដែលមានទំហំតូចប៉ុនម្រាមដៃ និងមានការលយចេញជាបន្លាៗ ។ វាអាចមានរាងតូចមូល ផ្ទៃខាងលើសំប៉ែត ហើយគគ្រាត ។ នៅពេលខ្លះ វាអាចរូមបញ្ចូលជាក្រុមតូចៗ ដែលមានផ្ទៃរលីង ។ ជំងឺសិរមាន់ អាចរីកដុះដាល និងមើលទៅហាក់ដូចជាតូច ហើយមានទម្រង់ផ្កាស្ពៃតូចៗ ដែលមានពណ៌ដូចជាពណ៌ស្បែករបស់មនុស្សយើង ។ នៅពេលដែលគេរកឃើញនៅលើ ឬក៏ជិតភ្នាសមុយគីស (Mucous membranes) ដូចជានៅក្នុងទ្វារមាស វាអាចទន់ហើយឡើងស ប៉ុន្តែវាអាចរីកធំធាត់ដូចជាសាច់របស់មនុស្សដែរ ។ វាអាចលេចឡើងនៅគ្រប់ទីកន្លែងនៃផ្លូវបន្តពូជ និងតំបន់ជុំវិញគូថរួមមាន លិង្គ ពងស្វាស ទ្វារមាស កស្បូន ក្រលៀន ។ល។
ខ-មូលហេតុដែលបង្កឲ្យមានជំងឺនៅលើប្រដាប់បន្តពូជ ៖ វីរុសពកអញ្ច្រាញរបស់មនុស្ស (The Human Papilloma Virus) ឬHPVនេះ អាចបង្កឲ្យមានជំងឺសិរមាន់នៅផ្នែកផ្សេងៗទៀតនៃខ្លួនមនុស្សយើងដែរ រួមមាននៅប្រអប់ដៃ ម្រាមដៃ និងបាតជើង ។ ការចម្លង HPV តាមផ្លូវបន្តពូជ ត្រូវបានគេឲ្យឈ្មោះថា “Condyloma Acuminate” ដែលត្រូវបានគេជឿជាទូទៅ និងជារួមថា វានឹងឆ្លងតាមការរួមសង្វាស ។
គ-ការព្យាបាលជំងឺសិរមាន់លើប្រដាប់បន្តពូជ ៖ នៅលើស្បែក និងលើកន្លែងដែលយើងអាចប៉ះពាល់បាន យើងមានមធ្យោបាយសាមញ្ញពីរយ៉ាងដើម្បីព្យាបាលជំងឺនេះដោយ៖
– លាបថ្នាំតាមវេជ្ជបញ្ជា
– ការព្យាបាលដោយចរន្តអគ្គិសនី (Electro-cautery) ឬកាំរស្មីឡាស៊ែរ
– ធ្វើការវះកាត់ដើម្បីយកដុំសាច់នេះចេញ គឺគេកម្រធ្វើណាស់
– ចំពោះស្ត្រីមានផ្ទៃពោះ ត្រូវមានការប្រុងប្រយ័ត្នខ្ពស់ ហើយត្រូវមកជួបគ្រូពេទ្យឯកទេស។
ឃ-មូលហេតុដែលគេចាំបាច់ត្រូវព្យាបាលជំងឺសិរមាន់ឲ្យបានឆាប់រហ័ស ៖ សារៈសំខាន់ គឺផ្អែកទៅលើវត្តមានជំងឺមហារីកនៅលើអ្នកជំងឺដែលមានជំងឺសិរមាន់ពីមុនមក ជាពិសេសមហារីកមាត់ស្បូន ។
លោកស្រីវេជ្ជបណ្ឌិត ថាវ សុថាវី បានបញ្ជាក់ថា ដើម្បីទប់ស្កាត់ការរាលដាលជំងឺសិរមាន់នេះត្រូវព្យាបាលឲ្យបានឆាប់រហ័ស និងទាន់ពេល ហើយការពន្យារពេលក្នុងការព្យាបាល អាចបង្កឲ្យមានការរាលដាល និងការរីកដុះដាលថែមទៀតនៃដុំសាច់ ដែលធ្វើឲ្យការព្យាបាលមានលក្ខណៈខ្លាំងក្លា និងស្មុគស្មាញថែមទៀត ។ ការចម្លងដោយការរួមសង្វាស គឺជាសញ្ញាបារម្ភមួយ ដែលជំរុញឲ្យអ្នកពាក់ព័ន្ធធ្វើការព្យាបាលជំងឺសិរមាន់ឲ្យបានឆាប់រហ័ស ។
ង-វិធីបង្ការ និងតាមដានជំងឺសិរមាន់ ៖ ការបង្ការ និងតាមដានជំងឺសិរមាន់នៅផ្លូវបន្តពូជរួមមាន៖
-វិធានការអនាម័យ ៖ លាងនឹងសាប៊ូ ហើយនិងទឹក ។ ការពិនិត្យដោយផ្ចិតផ្ចង់នូវតំបន់ដំបៅលើប្រដាប់បន្តពូជ ដោយធានាព្យាបាលឲ្យបានឆាប់រហ័សបំផុត ។
-ចំពោះដៃគូរួមភេទរបស់អ្នកជំងឺ ក៏ត្រូវធ្វើការពិនិត្យ និងព្យាបាលផងដែរ ។ ស្រោមអនាម័យដែលផ្តល់ឲ្យ គឺវាកំណត់ក្នុងការការពារដូចជា HPV អាចប៉ះពាល់ដល់ស្បែក ឬផ្ទៃនៃភ្នាសមុយគីសក៏ដោយ ក៏ស្ត្រីមានផ្ទៃពោះត្រូវប្រុងប្រយ័ត្នក្នុងការការពារជំងឺនេះដែរ ។
-ចំពោះនារីពេញវ័យ ឬស្ត្រីដែលធ្លាប់ឆ្លងកាត់ការរួមភេទ ត្រូវចាក់ថ្នាំបង្ការ ៕
ចែករំលែកព័តមាននេះ