រាជធានីភ្នំពេញ ៖ នៅយប់ថ្ងៃអាទិត្យទី២៥ កញ្ញា ខានស្អែកនេះ ប្រដាល់ «កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និង
រាជធានីភ្នំពេញ ៖ នៅយប់ថ្ងៃអាទិត្យទី២៥ កញ្ញា ខានស្អែកនេះ ប្រដាល់ «កំពូលជើងឯកស្រាបៀរប្លេកខេត» នឹងដល់កំណត់ត្រូវប្រកួតអន្តរជាតិទៀតហើយ ដោយប្រកាសបើករេញឲ្យកីឡាករកម្ពុជា២រូប និងថៃ២រូបប៉ះគ្នា ។ ការប្រកួតនៅចុងសប្ដាហ៍នេះ កីឡាករ ឃីម ឌីម៉ា និងមាស ច័ន្ទមាន ដែលសុទ្ធតែជើងខ្លាំងត្រូវបានគេបើកផ្លូវឱ្យជួបកីឡាករថៃ ដោយរំពឹងថា នឹងធ្វើឱ្យសង្វៀនមួយនេះកក្រើកមិនខាន ។
ការប្រកួតដែលនឹងចាប់ផ្ដើមឡើងពីម៉ោង៨យប់ក្រោមការរៀបចំរបស់ក្រុមហ៊ុនស្រាបៀរ Black Cat និងស្ថិតនៅលើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែង គឺព្រឹត្តិការណ៍ដំណើរការចំពេលរាត្រីថ្ងៃអាទិត្យដែលមានអ្នកទស្សនាយ៉ាងកកកុញស្រាប់ ។ កីឡាករកម្ពុជា២រូប គឺ ឃីម ឌីម៉ា និងមាស ច័ន្ទមាន នឹងក្លាយជាគូប្រកួតស៊ីសាច់ហុតឈាមជាមួយកីឡាករថៃនៅយប់ថ្ងៃអាទិត្យដែលនឹងមកដល់នៅថ្ងៃខានស្អែក ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយមុនពេលមានការសម្រេចរៀបចំព្រឹត្តិការណ៍អន្តរជាតិរបស់ស្រាបៀរប្លេកខេត ឲ្យពួកគេប្រកួតគ្នានេះ។ ក្នុងនោះភាគីកីឡាករកម្ពុជាបានទាំងសុំសាកកណ្ដាប់ដៃជាមួយកីឡាករថៃតាំងពីមុនមានការផ្គូផ្គងនោះផង។
លោក ញាណ សុធី អ្នករៀបចំការប្រកួតប្រចាំស្ថានីយទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ ឃីម ឌីម៉ា មកពីក្លិបរស្មីភូមីគាបខេត្តបន្ទាយមានជ័យ ឡើងប្រកួតជាមួយកីឡាកថៃឈ្មោះ ខ្វាន់ អេក ក្នុងនាមជាគូបើកឆាកអន្តរជាតិសម្រាប់ប្រដាល់អន្តរជាតិនៅយប់ថ្ងៃអាទិត្យនោះ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកមានបំណងចង់ឱ្យគេប៉ះគ្នាជាមួយកីឡាករបរទេសនៅក្នុងព្រឹត្តិការណ៍នេះតែម្ដង ។ កីឡាករ ឃីម ឌីម៉ា អាចចាត់ទុកថាជាជើងខ្លាំងម្នាក់នៅលើសង្វៀនប្រដាល់អន្តរជាតិ Black Cat ដែលជាព្រឹត្តិការណ៍ចម្រុះដោយវត្តមានកីឡាករខ្លាំងៗនៅក្នុងពិភពប្រដាល់ ។ លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃ បើទោះជាកីឡាករថៃវ័យក្មេង ហើយមានសមត្ថភាពមិនអាចមើលស្រាលក្ដី ។ លោកនិយាយថា សម្រាប់គូនេះ កីឡាករថៃខ្លាំង ប៉ុន្តែមកពីលោកទុកចិត្តលើ ឃីម ឌីម៉ា បើទោះជាមួយរយៈចុងក្រោយគេធ្លាក់ដៃបន្តិចមែន ។ លោកថា កីឡាករថៃ ខ្វាន់អេក ធ្លាប់ប្រកួត៨៥លើក ឈ្នះ៦៣លើក ចាញ់២០លើក និងស្មើ២លើក ក្នុងពេលកីឡាករកម្ពុជា ធ្លាប់ប្រកួត៨២លើក ឈ្នះ៦៨លើក ចាញ់១២លើក និងស្មើ២លើក។
សម្រាប់កីឡាករ មាស ច័ន្ទមាន លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះ យ៉ត ឌីឆា ។ លោកថា ការប្រកួតរបស់គូនេះនៅមិនទាន់ដឹងថា អ្នកណាល្អជាងអ្នកណានោះទេ បើទោះជាមាស ច័ន្ទមាន ជាអតីតម្ចាស់ខ្សែក្រវាត់ ហើយមានប្រវត្តិប្រកួតច្រើនជាងដាច់ឆ្ងាយបើធៀបជាមួយកីឡាករថៃ ។ លោកថា កីឡាករថៃធ្លាប់ប្រកួត៦១លើក ឈ្នះ៤៩លើក ចាញ់១១លើក និងស្មើ១លើក រីឯកីឡាករកម្ពុជាធ្លាប់ប្រកួត១១២លើក ឈ្នះ៨៥លើក និងចាញ់២៧លើក។ នៅក្នុងព្រឹត្តិការណ៍ប្រដាល់ពេលព្រឹកនៅលើសង្វៀនទូរទស្សន៍អាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិផងដែរ។
ចែករំលែកព័តមាននេះ