ខេត្តកំពង់ធំ ៖ ចាប់តាំងពីរាជរដ្ឋាភិបាលសម្រេចដាក់តំបន់ព្រៃឡង់ទៅជាតំបន់ជម្រកសត្វព្រៃ និងប្រគល់ ទៅឲ្យក្រសួងបរិស្ថានជាអ្នកគ្រប់គ្រងបានមួយរយៈពេលខ្លីតែប៉ុណ្ណោះ គេសង្កេតឃើញថា បទល្មើសនៃការកាប់បំផ្លាញព្រៃឈើដែលធ្លាប់តែកើតមានយ៉ាងអនាធិបតេយ្យនៅក្នុងតំបន់ព្រៃឡង់ ស្ថិតនៅក្នុងភូមិសាស្ត្រទឹកដីស្រុកសណ្តាន់ ខេត្តកំពង់ធំ មានការថយចុះគួរឲ្យកត់សម្គាល់។
លោក តុប កក្កដា ប្រធានមន្ទីរបរិស្ថានខេត្តកំពង់ធំ បានប្រាប់ កោះសន្តភាពនៅថ្ងៃទី១៤ ខែកញ្ញា ឆ្នាំ២០១៦នេះថា ដោយអនុវត្តតាមគោលការណ៍របស់រាជរដ្ឋាភិបាល និងក្រសួងបរិស្ថាន ដោយមានការជួយគាំទ្រពី សំណាក់ឯកឧត្តមអភិបាលខេត្តកំពង់ធំផងនោះ រូបលោកបានដាក់កម្លាំងមន្ត្រីឧទ្យានុរក្ស របស់លោក ចំនួន២៥នាក់ សហការជាមួយនឹងកម្លាំងតំបន់ប្រតិបត្តិការសឹករងកំពង់ធំ១០នាក់ សរុបចំនួន ៣៥នាក់ បោះទីតាំងប្រចាំការនៅច្រកសំខាន់ៗចំនួន៤កន្លែងរួមមានទី១.ច្រកអូរងាវ ទី២.ច្រកតោ ទី៣.ច្រកព្រះអាទិត្យ និងទី៤.ច្រកស្រែព្រីង។
ដែលជាចំណុចសំខាន់នៅក្នុងការដឹកជញ្ជូន បទល្មើសព្រៃឈើ ចេញពីព្រៃឡង់ បន្ទាប់ពីការបង្ក្រាបការដឹកឈើចេញ លោកបានដឹកនាំកម្លាំងចុះរុករក និងបង្ក្រាបបទល្មើសនៅក្នុង តំបន់ព្រៃឡង់ ដោយគិតចាប់ពីថ្ងៃទី១០ ខែឧសភា ឆ្នាំ២០១៦ មកដល់ថ្ងៃទី១០ ខែកញ្ញា ឆ្នាំ២០១៦រយៈពេល៤ខែ រហូតមកដល់នៅថ្ងៃទី១៤ ខែកញ្ញា ឆ្នាំ២០១៦ នេះជាលទ្ធផលមានម៉ាស៊ីនង៉ោង(ត្រង់ស៊ីន័រ)ចំនួន១០៥គ្រឿង ឈើប្រភេទលេខ២ចំនួន១០៧ ម៉ែត្រគូប និងអាវុធកែច្នៃដែលហៅថាប៉ក់ឈឹប និងអាវុធកែឆ្នៃដែលបាញ់ដោយរំសេវដាក់គ្រាប់កង់សរុប ចំនួន១០ដើម ដឹកយកមករក្សាទុកនូវមន្ទីរបរិស្ថានខេត្ត។
ក្នុងនោះលោកប្រធានមន្ទីរបរិស្ថាន ក៏បាន សំណូមពរដល់អង្គការក្នុងនិងក្រៅរដ្ឋាភិបាល អាជ្ញាធរគ្រប់លំដាប់ថ្នាក់ជាពិសេសគឺបងប្អូន ប្រជាពលរដ្ឋដែលរស់នៅជិតព្រៃឡង់ ត្រូវតែរួមគ្នាការពារ ដែនជម្រកសត្វព្រៃៗ ឡង់ដែលនៅ សេសសល់នេះ។ ជាមួយខាងមន្ត្រីជំនាញរបស់លោកៗរងចាំសហការជានិច្ចដើម្បីថែរក្សាឲ្យបានគង់វង់ សង្ឃឹមថារយៈពេលយ៉ាងយូរ១០ឆ្នាំទៀតព្រៃឡង់នេះនឹងក្លាយជាតំបន់ព្រៃក្រាស់ៗវិញ ជាក់ជាមិនខានឡើយ៕
ចែករំលែកព័តមាននេះ