ខេត្តព្រះវិហារ ៖ ទឹកស្ទឹងសែន ក្រុងព្រះវិហារកំពុងហក់ឡើងជាបន្តបន្ទាប់ ខណៈដែលភ្លៀងបានធ្លាក់ទូទាំងខេត្តព្រះវិហារ អស់រយៈពេល១ថ្ងៃ១យប់ហើយ បង្កការព្រួយបារម្ភដល់ពលរដ្
ខេត្តព្រះវិហារ ៖ ទឹកស្ទឹងសែន ក្រុងព្រះវិហារកំពុងហក់ឡើងជាបន្តបន្ទាប់ ខណៈដែលភ្លៀងបានធ្លាក់ទូទាំងខេត្តព្រះវិហារ អស់រយៈពេល១ថ្ងៃ១យប់ហើយ បង្កការព្រួយបារម្ភដល់ពលរដ្ឋ ដែលរស់នៅតាមដងស្ទឹងសែននៅពេលខាងមុខនេះ។
លោក អ៊ុន ចាន់ដា អភិបាលខេត្តព្រះវិហារ និងជាប្រធានគណៈកម្មាការគ្រប់គ្រងគ្រោះមហន្តរាយខេត្តព្រះវិហារ នៅព្រឹកថ្ងៃទី១៣ ខែកញ្ញា ឆ្នាំ២០១៦នេះ បានមានប្រសាសន៍ថា អាជ្ញាធរខេត្តព្រះវិហារ បានត្រៀមខ្លួនរួចរាល់ នឹងការជួយសង្គ្រោះពលរដ្ឋ ដែលងាយនឹងរងគ្រោះដោយមហន្តរាយទឹកជំនន់នេះ។
អភិបាលខេត្តព្រះវិហារបញ្ជាក់ថា ការត្រៀមជួយសង្គ្រោះពលរដ្ឋដែលងាយរងគ្រោះដោយមហន្តរាយទឹកជំនន់ ដែលវាអាចកើតឡើងជាយថាហេតុនៅពេលខាងមុខនេះ អាជ្ញាធរខេត្តបានត្រៀមក្រុមការងារកាកបាទក្រហម នឹងក្រុមការងារគ្រោះមហន្តរាយ នឹងស្វែងរកទីទួលសុវត្ថិភាពដល់ពលរដ្ឋរួចជាស្រេចហើយ បើទោះបីជាបច្ចុប្បន្ននេះ ទឹកជំនន់មិនទាន់យាយីដល់ការរស់នៅរបស់ពួកគាត់ក៏ដោយ។ លោក ចាប កុយ ប្រធានមន្ទីរធនធានទឹក និងឧតុនិយមខេត្តព្រះវិហារ បានបញ្ជាក់ថា ជំនន់ទឹកភ្លៀងស្ទឹងសែន នឹងបន្តឡើងទៀតនៅថ្ងៃបន្ទាប់នេះ។
ខណៈដែលភ្លៀងកំពុងតែធ្លាក់ទូទាំងខេត្តព្រះវិហារ ភាគច្រើនទឹកបានធ្លាក់ពីលើភ្នំត្បែង និងភ្នំដងរែក ហូរចូលក្នុងស្ទឹងសែនតែម្តង។ ប្រជាពលរដ្ឋ រស់នៅតាមបណ្តោយដងស្ទឹងសែន បានប្រាប់ថា ប្រសិនបើភ្លៀងធ្លាក់មិនរាំងនោះទេ ទឹកស្ទឹងសែននឹងកាន់តែហក់ឡើងខ្លាំង បង្ករការជន់លិចផ្ទះសម្បែងពួកគាត់ នៅពេលឆាប់ៗខាងមុខនេះជាមិនខានឡើយ។ សូមបញ្ជាក់ថា ខណៈនេះភ្លៀងកំពុងតែរលឹមជាប់ៗគ្នា នៅតាមបណ្តាស្រុកខ្លះក្នុងខេត្តព្រះវិហារកំពុងធ្លាក់ភ្លៀងជាប់ ហើយ គិតមកដល់ថ្ងៃនេះទឹកស្ទឹងសែន ក្រុងព្រះវិហារមានកម្ពស់ ៧.៣៨ម៉ែត្រ ក្រោមកម្ពស់ទឹកប្រកាសអាសន្នដែលមានកម្ពស់ចាប់ពី ១១.៥០ម៉ែត្រឡើងទៅ៕
ចែករំលែកព័តមាននេះ