«រ៉យទ័រ» ផ្សាយកាលពីពេល ថ្មីៗកន្លងមកថា មន្ត្រីអភិរក្សសត្វព្រៃក្នុងរដ្ឋធើនធើរីឈ័ររី ប្រទេសអូស្ត្រាលី បានដាក់អន្ទាក់ចាប់ក្រពើយក្សប្រវែង៤,៣ម៉ែត្រ នៅទន្លេមួយបន្ទាប់ពីវាស៊ីគោរបស់អ្នកស្រុកជាច្រើនក្បាល ។ វីដេអូឃ្លីបបានបង្ហាញក្រពើមួយក្បាលនោះព្យាយាមត្របាក់ខាំមន្ត្រីអភិរក្សមួយរូបទៀតផងដោយសារខឹងដាក់អន្ទាក់ចាប់វា ។
នៅក្នុងវីដេអូឃ្លីបដែលបង្ហាញដោយប៉ូលិសរដ្ឋធើនធើរីឈ័ររី បង្ហាញឱ្យឃើញក្រពើនោះប្រឹងរើបម្រះក្រោយពីជាប់អន្ទាក់ ។ មន្ត្រីអភិរក្សសត្វព្រៃបានយកខ្សែចងមាត់ និងអូសវាឡើងគោក ។ មន្ត្រីជំនាញអាចចាត់ការលើវាបានដោយជោគជ័យ ប៉ុន្តែក្នុងពេលកំពុងយកដាក់លើរថយន្តស្រាប់តែវាបង្ហាញកំហឹងដោយស្ទុះទៅរកត្របាក់មន្ត្រីម្នាក់ ។ មន្ត្រីនោះគេចខ្លួនទាន់ទាំងភ័យ ។
ប៉ូលិសឱ្យដឹងថា «ក្រពើបានស្ទុះទៅក្បែរយើង ប៉ុន្តែយើងអាចគ្រប់គ្រងវាបានដោយជោគជ័យ» ។
សត្វល្មូនមួយក្បាលនោះត្រូវយកទៅកសិដ្ឋានចិញ្ចឹមក្រពើ « Darwin» ។ ចំណែកមន្ត្រីអភិរក្សជាច្រើននាក់ទៀតនៅដាក់អន្ទាក់បន្ត ព្រោះជឿថាមានក្រពើធំមួយក្បាលទៀតលាក់ខ្លួនរង់ចាំស៊ីសត្វចតុប្បាទដែលចុះទៅផឹកទឹក ។
មន្ត្រីជំនាញនិយាយថា «យើងដាក់អន្ទាក់បន្ត ព្រោះនៅសេសសល់ក្រពើយក្សមួយក្បាលទៀតនៅក្នុងទឹក ហើយវាក៏បង្កការភ័យខ្លាចដល់អ្នកស្រុកដែរ» ៕
ចែករំលែកព័តមាននេះ