កាសែតបាងកកប៉ុស្តិ៍នៅថ្ងៃទី២៨ តុលា ឱ្យដឹងថា នាយករដ្ឋមន្ត្រីថៃ លោកអាប់ភីស៊ីត វ៉េចាជីវ៉ា បានអះអាងបញ្ជាក់ថា រូបលោកមានផែនការរៀបចំការបោះឆ្នោតទូទៅមុនកាលកំណត់គឺមុនពេលការបញ្ចប់អាណត្តិនៃរដ្ឋាភិបាលរបស់លោកនៅចុងឆ្នាំក្រោយនេះ ។ កាសែតថៃដដែលនេះបានដកស្រង់សំដីលោកអាប់ភីស៊ីត ដែលបានថ្លែងកាលពីថ្ងៃទី២៧ តុលា ថា រូបលោកសន្យាថា នឹងរៀបចំការបោះឆ្នោតទូទៅនៅឆ្នាំក្រោយនេះ គឺមុនការចប់អាណត្តិរបស់លោក ហើយលោកអះអាងថា រូបលោកនឹងសុខចិត្តចាញ់ក្នុងការបោះឆ្នោតនោះប្រសិនបើលោកទទួលបានជ័យជំនះហើយ នៅតែមានអំពើហិង្សា ។
លោកនាយករដ្ឋមន្ត្រីអាប់ភីស៊ីត ថ្លែងថា រូបលោកជ្រើសរើសយកការចាញ់ឆ្នោត ប្រសិនបើការចាញ់ឆ្នោតរបស់លោកអាចស្តារសុខសន្តិភាព សំរាប់ប្រទេសជាជាងទទួលបានជ័យជំនះដែលមានអំពើហិង្សា ។ លោកអាប់ភីស៊ីត ថ្លែងទៀតថា រូបលោកសង្ឃឹមថា ការបោះឆ្នោតនៅឆ្នាំក្រោយនឹងប្រព្រឹត្តទៅយ៉ាងរលូន ។
ទោះបីជាបែបណាក៏ដោយ លោកអាប់ភីស៊ីត មិនបានបញ្ជាក់អំពីបញ្ហាថា តើលោកនឹងរំលាយសភានៅពេលណា ប៉ុន្តែលោកបញ្ជាក់ថា រូបលោកមិនមានបំណងនៅបន្តតំណែងរហូតដល់ចប់អាណត្តិនៅដើមឆ្នាំ២០១២ នោះទេ ។
លោកនាយករដ្ឋមន្ត្រីអាប់ភីស៊ីត ថ្លែងដូច្នេះក្នុងសុន្ទរកថាមួយស្តីអំពីគ្រោះហានិភ័យសេដ្ឋកិច្ច និងកិច្ចសហប្រតិបត្តិការរបស់រដ្ឋាភិបាលថៃ នៅក្នុងសិក្ខាសាលាមួយដែលរៀបចំឡើងដោយសមាគមអ្នកកាសែតសេដ្ឋកិច្ចនៅសណ្ឋាគារ Sofifel Centara Grand ។
លោកអាប់ភីស៊ីត ថ្លែងថា ការប្រឈមមុខនិងគ្រោះថ្នាក់ផ្នែកនយោបាយនៅតែមាន ពីព្រោះក្រុមមនុស្សមួយចំនួនមិនចង់ឱ្យមានសុខសន្តិភាពនៅក្នុងប្រទេស ដែលកំពុងជួយប្រទះនឹងអំពើហិង្សាមានដូចជាការដាក់បំផ្ទុះគ្រាប់បែក ប៉ុន្តែទោះបីជាបែបណាក៏ដោយ ថៃនឹងនៅតែអាចរៀបចំការបោះឆ្នោតមុនកាលកំណត់ប្រកបដោយសន្តិវិធី ៕
ចែករំលែកព័តមាននេះ