ប្រទេសវៀតណាម ៖ មូលហេតុពីក្រោយការងាប់ត្រីជាច្រើនក្នុងប្រទេសវៀតណាម ត្រូវបានរកឃើញថា មានក្រុមហ៊ុនផលិតដែកថែប Formosa Ha Tinh Steel (FHS) ជាដើមហេតុក្នុងការចាក់ធាតុពុលចូលទៅក្នុងសមុទ្រ ។ ប៉ុន្តែទោះជាយ៉ាងណាក្តី ធាតុពុលនៅតែបន្តសម្លាប់ត្រីតទៅទៀត ។
ប្រហែលជាមនុស្សមួយចំនួនគិតថា លទ្ធផលនៃរឿងមួយនេះអាចនាំឲ្យមានការសហការគ្នាផ្នែកបរិស្ថានរវាងសហគ្រាស និងសមត្ថកិច្ច។ ប៉ុន្តែផ្ទុយទៅវិញ មិនដល់២សប្តាហ៍បន្ទាប់ពីក្រុមហ៊ុន FHS សងប្រាក់ជាច្រើនរឿងកំហុសឆ្គងនេះ អាជីវកម្មតូចមួយរបស់ក្រុមហ៊ុននេះ ត្រូវបានជាប់សង្ស័យពីការកប់កាកសំណល់ក្នុងចម្ការមួយនៅខេត្ត Ha Tinh ។
អ្វីដែលកាន់តែគួរឲ្យភ្ញាក់ផ្អើលជាងនេះទៀតនោះ គឺកាកសំណល់ប្រមាណ១០០តោន ត្រូវបានកប់ក្នុងចម្ការដែលជាកម្មសិទ្ធិរបស់នាយកនៃក្រសួងបរិស្ថានរបស់ខេត្តនោះ ។ ការពិសោធបានបញ្ជាក់ហើយថា កាកសំណល់ទាំងនោះពិតជាមានជាតិពុលមែន ។
នាយករដ្ឋមន្ត្រីរបស់ប្រទេសនេះបានប្រាប់ទៅកាន់មន្ត្រីគ្រប់រូប គ្រប់ជាន់ថ្នាក់ថា មិនឲ្យប្តូរការការពារបរិស្ថាន យកការអភិវឌ្ឍទេ ។ ប៉ុន្តែមើលទៅសារមួយនេះ គឺមិនទាន់បានផ្ញើទៅដល់នៅឡើយ ។
ក្នុងពេលជាមួយគ្នានេះ សេចក្តីរាយការណ៍កាលពីថ្ងៃចន្ទមុនពីក្រសួងបរិស្ថាន និងធនធានធម្មជាតិបានបង្ហាញថា តំបន់ឆ្នេរក្នុងខេត្តជាច្រើនកំពុងតែល្អប្រសើរឡើងវិញហើយ ដោយមានគំរូបង្ហាញថា មានការអន់ថយជាតិពុលប្រមាណ៩០% ។
ការសិក្សាខាងលើក៏បានបង្ហាញទៀតថា ការប៉ះពាល់ទៅលើតំបន់មួយចំនួន គឺមានសុវត្ថិភាពក្នុងការហែលទឹក និងនេសាទ ។ ប៉ុន្តែពួកគេកត់សម្គាល់ថា ក្នុងតំបន់ជាច្រើនទៀតដែលនៅជិតកន្លែងធ្លាយជាតិពុល គឺត្រូវការការត្រួតពិនិត្យបន្តទៀត ។
រោងចក្រផលិតដែកថែបបានបង្ហូរកាកសំណល់ជាតិពុលរួមមានសារធាតុដូចជា phenol, cyanide និង iron hydroxides ។ អ្នកជំនាញជាច្រើនបានព្យាករណ៍ថា បរិស្ថាន និងជីវិតក្នុងសមុទ្រត្រូវការពេលជាច្រើនទសវត្សរ៍ក្នុងការល្អប្រសើរឡើងវិញ ព្រោះតែមានវត្តមានដែកធ្ងន់ ។ បើទោះជាជាតិពុលខ្លះត្រូវបានកាត់បន្ថយដោយរលកពិតមែន ក៏ដែកធ្ងន់នៅក្នុងបាតសមុទ្រ តម្រូវឲ្យមានការបារចេញផងដែរ ។
ក្រុមហ៊ុន FHS ពេលនេះបានបង់ប្រាក់ពាក់កណ្តាលនៃប្រាក់ពិន័យសរុបហើយ (ប្រាក់សរុប៥០០លានដុល្លារ) ។ បន្ទាប់ពីបានប្រកាសពីការពិន័យ លោកនាយករដ្ឋមន្ត្រី Nguyen Xuan Phuc បានថ្លែងថា រដ្ឋាភិបាលនឹងប្រើប្រាស់ប្រាក់ទាំងនោះជាសាធារណៈដោយមានតម្លាភាព និងហ្មត់ចត់ ក្នុងគោលបំណងជួយដល់សហគមន៍នេសាទដែលរងគ្រោះដោយសារការបំពុលនេះ និងបន្ថែមទៅលើការការពារបរិស្ថាន ៕
ចែករំលែកព័តមាននេះ