តាមការសង្កេត បុគ្គលជោគជ័យមាន២០ចំណុចដែលពួកគេតែងតែបដិសេធមិនធ្វើ ។ យើងសាកល្បងមកមើលថា មានអ្វីខ្លះ ។
១-មិនចាប់ផ្តើមដោយខុសពីផែនការ ៖
ពួកគេបានផ្តោតលើអ្វីដែលខ្លួនចង់ធ្វើឱ្យសម្រេច ។ ពួកគេមានទាំងរបៀប វិន័យ និងភាពឈ្លាសវៃសម្រាប់បែងចែកពេលវេលារបស់ខ្លួនផងដែរ ដូចជាបញ្ជីត្រូវធ្វើ (To-Do-List) ដើម្បីមិនឱ្យបាត់បង់រឿងសំខាន់ៗ ។
២-មិនយកខ្លួនទៅក្បែរអ្នកមានគំនិតអវិជ្ជមាន ៖
អ្នកដែលមានឥរិយាបថអវិជ្ជមាន និងចូលចិត្តតវ៉ាគ្រប់រឿងទាំងអស់ ជាក្រុមមនុស្សដែលបុគ្គលជោគជ័យមិនចង់នៅក្បែរជាដាច់ខាត ព្រោះការនៅក្បែរមនុស្សប្រភេទនេះ គឺមានតែ យកភាពអវិជ្ជមានមកដាក់ក្នុងខ្លួន ។ បុគ្គលជោគជ័យរមែងតែនាំខ្លួនឯងទៅទីកន្លែងដែលគិតវិជ្ជមាន និងអ្នកដែលអាចបំផុសគំនិតដល់ពួកគេ ។
៣-មិនគិតថា ភាពលំបាកគឺជាបញ្ហា ៖
នៅពេលបុគ្គលជោគជ័យជួបនឹងឧបសគ្គ ពួកគេនឹងមើលឃើញថា នេះជាបញ្ហាប្រឈមដែលត្រូវដោះស្រាយឱ្យបាន ហើយពួកគេនឹងអាចទទួលបាននូវបទពិសោធន៍ដ៏ល្អ និងកាន់តែរឹងមាំឡើង ។
៤-មិនបណ្តោយឱ្យភាពបរាជ័យមករារាំង ៖
បុគ្គលជោគជ័យនឹងសម្លឹងឃើញថា ភាពបរាជ័យ គឺជាឱកាសដែលអាចរៀនសូត្រ និងចម្រើនលូតលាស់ ។ ពួកគេជឿថា មិនថានឹងបរាជ័យប៉ុន្មានដង គឺត្រូវក្រោកឡើងឱ្យបាន ទើបកាន់តែរឹងមាំលើសដើម ។
៥-មិនយកបញ្ហាមកទាញខ្លួនឱ្យធ្លាក់ចុះ ៖
នៅពេលជួបបញ្ហា ពួកគេចៀសវាងមិនផ្តោតតែលើបញ្ហាតែម្យ៉ាងនោះទេ គឺពួកគេមើលទៅលើសកម្មភាព និងធ្វើឱ្យស្ថានការណ៍ល្អប្រសើរឡើងវិញ ។
៦-មិនព្រមឱ្យការសម្រេចចិត្តរបស់អ្នកដទៃប៉ះពាល់ដល់ទំនុកចិត្តរបស់ខ្លួនឡើយ ៖
បុគ្គលជោគជ័យមិនបណ្តោយឱ្យការសម្រេចចិត្ត ឬពាក្យសម្តីរបស់អ្នកដទៃប៉ះពាល់មកលើខ្លួនឡើយ ព្រោះពួកគេដឹងយ៉ាងច្បាស់ថា រូបគេមានតម្លៃ និងជំហររឹងមាំ ។ ម្យ៉ាងទៀត ពួកគេដឹងថា ពួកគេមានជីវិតរស់នៅដើម្បីអ្វី និងកំពុងស្វែងរកអ្វី ដោយមានក្រិតក្រមនៅក្នុងចិត្ត ដើម្បីទៅដល់គោលដៅរបស់ខ្លួន ។
៧-មិនបន្ទោសអ្នកដទៃ ៖
បុគ្គលជោគជ័យទទួលខុសត្រូវជាមួយនឹងកំហុសរបស់ខ្លួន នៅពេលមានអ្វីខុសធម្មតាកើតឡើង ពួកគេនឹងទទួលខុសត្រូវ ព្រមទាំងដោះស្រាយវា ។
៨-មិនច្រណែនអ្នកដទៃដែលទទួលបានជោគជ័យ ៖
ពួកគេជឿថា នឹងទទួលបានជោគជ័យបែបនេះដូចគ្នា ហើយនៅពេលមានអ្នកទទួលជោគជ័យកាន់តែច្រើន ពិភពលោកនឹងកាន់តែគួរឱ្យចង់រស់នៅ ។ ការដែលឃើញភាពជោគជ័យរបស់អ្នកដទៃ មិនបានធ្វើឱ្យពួកគេច្រណែននោះទេ ប៉ុន្តែបែរមានអារម្មណ៍ថា ជាកម្លាំងជំរុញទឹកចិត្តច្រើនជាង ។
៩-មិនបដិសេធអ្វីដែលខ្លួនស្រឡាញ់ ៖
មិនថាត្រូវធ្វើការងារលំបាកប៉ុនណា បុគ្គលជោគជ័យមិនភ្លេចផ្តល់ភាពសំខាន់ដល់មនុស្សដែលខ្លួនស្រឡាញ់ឡើយ ដូចជា ក្រុមគ្រួសារ របស់ខ្លួន ព្រោះភាពជោគជ័យពិតប្រាកដ គឺចាប់ផ្តើមពីខាងក្នុងទៅ ។
១០-មិនភ្លេចរីករាយជាមួយនឹងជីវិត ៖
បុគ្គលជោគជ័យដឹងយ៉ាងច្បាស់ថា ការធ្វើការដោយប្រាសចាកពីភាពរីករាយ គឺជារឿងដែលគ្មានតម្លៃ ។ ភាពជោគជ័យ គួរតែកើតឡើងពីការធ្វើការដែលបង្កើតក្តីរីករាយបានក្នុងពេលដូចគ្នា និងដឹងថា ពេលណាដែលគួរសម្រាក ឬការលេងក៏មានសារសំខាន់ផងដែរ ។
១១-មិនមើលរំលងរឿងសុខភាព ៖
ភាពជោគជ័យពិតប្រាកដរបស់ក្រុមមនុស្សទាំងនេះកើតចេញពីមានសុខភាពល្អ ដែលធ្វើឱ្យខួរក្បាលស្រឡះល្អ និងមានកម្លាំងពេញខ្លួន ។
១២-មិនកំណត់គោលដៅស្រពេចស្រពិល ៖
បុគ្គលទាំងនេះដឹងយ៉ាងច្បាស់ថា ត្រូវការអ្វីក្នុងជីវិត និងនៅពេលដឹងច្បាស់លាស់ហើយ ក៏ធ្វើតាមក្តីសុបិនដោយមិនបញ្ឈប់ ។ ក្តីសុបិន ប្រៀបដូចជាអ្នកដើរតាមផ្លូវទៅរកចំណុចនោះនៅពេលណាមួយ ។
១៣-មិនគ្រាន់តែនិយាយ តែអនុវត្តផ្ទាល់ ៖
ជំនួសឱ្យគ្រាន់តែនិយាយ ឬរិះគន់អ្នកដទៃ ពួកគេបានធ្វើវាឱ្យកើតឡើងតែម្តង ។
១៤-មិនបណ្តោយឱ្យខ្លួនក្លាយជាជនរងគ្រោះ ៖
បុគ្គលទាំងនេះមិនព្រមឱ្យខ្លួនឯងក្លាយជាជនរងគ្រោះពីអំពើរបស់អ្នកដទៃឡើយ ។ ពួកគេឈ្លាសវៃក្នុងការចៀសវាងពីមនុស្សមិនល្អ ឬស្ថានការណ៍អាក្រក់ ។
១៥-មិននៅជាមួយអតីតកាល ៖
ពួកគេនឹងមិនព្រមឱ្យអតីតកាលមកធ្វើជាឧបសគ្គក្នុងជីវិតឡើយ ព្រោះប្រសិនជាប្រើជីវិតជាមួយអតីតកាល ក៏នឹងគ្មានក្តីសុខក្នុងពេលបច្ចុប្បន្នដែរ ។
១៦-មិនទប់ទល់នឹងការផ្លាស់ប្តូរ ៖
ផែនការ យុទ្ធសាស្ត្រ ឬយុទ្ធវិធីផ្សេងៗអាចផ្លាស់ប្តូរបានជានិច្ច បុគ្គលជោគជ័យអាចសម្របតាមកាលៈទេសៈបានរហូត ព្រោះពួកគេជឿថា នៅមានផ្លូវជាច្រើនដើម្បីទទួលបានជោគជ័យ ។
១៧-មិនបញ្ឈប់ការរៀនសូត្រ ៖
មិនថាអាយុប៉ុន្មានក៏ដោយ ពួកគេមិនបញ្ឈប់ការរៀនសូត្រឡើយ ព្រោះជឿជាក់ថា គ្មានអ្នកណាម្នាក់ដឹងគ្រប់យ៉ាង អាចការបំផុសគំនិតឡើងគ្រប់ទីកន្លែង និងគ្រប់ពេលវេលាឡើយ ។ ដូច្នេះ កុំធ្វើខ្លួនជាកែវដែលមានទឹកពេញ តែចូរធ្វើខ្លួនជាកែវដែលមានទឹកកន្លះ ដែលនៅសល់កន្លះទៀតជាកន្លែងទំនេរដើម្បីរៀនសូត្រជានិច្ច ។
១៨-មិនបញ្ចប់ដោយគ្មានការអរគុណ ៖
មិនថាជារឿងតូចឬធំ បុគ្គលជោគជ័យនឹងមានអារម្មណ៍អរគុណនឹងអ្វីគ្រប់យ៉ាងនៅក្បែរខ្លួន ដែលធ្វើឱ្យពួកគេមានជីវិតដល់សព្វថ្ងៃនេះ។ ពួកគេចូលចិត្តអ្នកគាំទ្រជានិច្ច ហើយនឹងអាចចាប់ផ្តើមថ្ងៃថ្មីដោយភាពវិជ្ជមាន និងគំនិតល្អ ៕
ចែករំលែកព័តមាននេះ