ប្រទេសជាច្រើននៅតំបន់អឺរ៉ុបបង្ហាញថា ការលក់កាំភ្លើងបានកើនខ្ពស់ ព្រោះមនុស្សជាច្រើនបារម្ភពីសុវត្ថិភាពចំពោះជីវិត និងទ្រព្យសម្បត្តិរបស់ខ្លួន ដោយសារភេរវកម្ម និងឧក្រិដ្ឋកម្មគ្រប់រូបភាពបង្កដោយជនភៀសខ្លួនមូស្ល៊ីមដែលហូរចូលតំបន់អឺរ៉ុប ។
«Reuter» ផ្សាយកាលពីពេល ថ្មីៗកន្លងមកថា មានចំនួនអ្នកចុះឈ្មោះប្រើកាំភ្លើងកើនខ្ពស់ជាបន្តបន្ទាប់ ទាំងនៅប្រទេសស្វ៊ីស អូទ្រីស និងប្រទេសឆែក ដែលមានច្បាប់បើកទូលាយឱ្យពលរដ្ឋអាចកាន់កាំភ្លើងបាន ។
បច្ចុប្បន្ននៅប្រទេសអាល្លឺម៉ង់ដែលមានច្បាប់គ្រប់គ្រងអាវុធដ៏តឹងរឹុង និងស្ទើរតែគ្មានឱកាសឱ្យពលរដ្ឋកាន់កាំភ្លើងបាននោះឧស្ម័នបង្ហៀរទឹកភ្នែក និងឧបករណ៍ឆក់ប្រភេទបំពាក់តាមខ្លួន ជាប់ក្នុងលំដាប់ថ្នាក់ទំនិញដែលលក់ដាច់បំផុតនៅតាមបណ្តាក្រុងជាច្រើន រួមទាំងនៅក្រុងបែ៊រឡាំងជារដ្ឋធានីរបស់ប្រទេសផងដែរ ។
ចំណែកលោក Hanspeter Kriesi អ្នកនាំពាក្យប្រចាំនៅស្នាក់ការត្រួតពិនិត្យនៅតំបន់ St.Gallen ប្រទេសស្វ៊ីស ឱ្យដឹងថា បាតុភូតដែលកើតឡើងពាក់ព័ន្ធដោយផ្ទាល់នឹងហេតុការណ៍វាយប្រហារពីក្រុមភេរវករ រួមទាំងបញ្ហាឧក្រិដ្ឋកម្មរបស់ជនភៀសខ្លួនដែលកើតឡើងជាបន្តបន្ទាប់នៅក្នុងតំបន់ជាច្រើនក្នុងអឺរ៉ុបកាលពីពេលមុននេះ ។
ដោយឡែកនៅប្រទេសឆែក របាយការណ៍បញ្ជាក់ថា លោកប្រធានាធិបតី Milos Zeman ដែលពីដើមបានឈរលើជំហរគ្រប់គ្រងអាវុធយ៉ាងតឹងរឹុង បានបន្ធូរបន្ថយបទដ្ឋានហាមគ្រប់គ្រងអាវុធកាលពីខែកក្កដា ២០១៦ និងបើកឱកាសឱ្យពលរដ្ឋអាចទិញអាវុធដើម្បីការពារខ្លួនកាន់តែងាយស្រួល ។
ចាប់តាំងពីមានការវាយប្រហារ ដោយក្រុមភេរវករនៅក្រុង Nice ភាគខាងត្បូងប្រទេសបារាំងមក ការសុំចុះឈ្មោះប្រើអាវុធនៅប្រទេសឆែក បានកើនខ្ពស់ចំនួន៦០០០ដើម ជាពិសេសនៅក្នុងពាក់កណ្តាលឆ្នាំ២០១៦ ។
របាយការណ៍បញ្ជាក់ថា ការអនុញ្ញាតឱ្យកាន់អាវុធធ្វើជាឧបករណ៍ការពារខ្លួននៅអាល្លឺម៉ង់ កើនខ្ពស់ដល់៤៩% ក្នុងរយៈពេល៧ខែដំបូងនៃឆ្នាំ២០១៦ បើប្រៀបធៀបទៅនឹងអំឡុងពេលដូចគ្នានៃឆ្នាំ២០១៥ ៕
ចែករំលែកព័តមាននេះ