ការស្វែងរកទិញផ្ទះ និងខុនដូភាគច្រើន ទោះបីជាផ្ទះ និងខុនដូនោះមានគេរស់នៅហើយក្តី គឺត្រូវចំណាយប្រាក់មិនតិចនោះ ទេ ។ ការទិញបង់រំលស់ជាច្រើនឆ្នាំ បើអ្នកភ្លាត់ស្នៀត វាពិបាកនឹងដោះស្រាយណាស់ ។ រឿងដែលអ្នកគួរធ្វើ គឺការពារជាមុន និងមើលនូវបទពិសោធន៍របស់អ្នកដទៃដែលធ្លាប់ទិញខុសកន្លងមក ។ ថ្ងៃនេះ យើងបានប្រមូលផ្តុំ១០ចំណុចសំខាន់ៗដូចខាងក្រោមដើម្បីទុកជាចំណេះដឹងខ្លះៗជូនលោកអ្នក ៖
១-លង់នឹងភាពស្រស់ស្អាតច្រើនជាងទីតាំង៖
ជាទូទៅ មនុស្សភាគច្រើនតែគិតទៅលើភាពស្រស់ស្អាត តែការរស់នៅ ទីតាំងគឺជារឿងសំខាន់ជាងភាពស្រស់ស្អាតទៅទៀត ។ ពេលខ្លះ ផ្ទះដែលធ្លាប់មានអ្នករស់នៅហើយ វាមានម៉ូដចាស់ពណ៌ អាចមើលទៅចាស់តាមអាយុ តែផ្ទះទាំងនេះស្ថិតនៅទីតាំងល្អជាងផ្ទះថ្មី ។
ជាទូទៅ ផ្ទះចាស់នៅជិតកន្លែងដឹកជញ្ជូន និងកន្លែងសាធារណៈច្រើនជាងទីតាំងផ្ទះថ្មី ។ បើអ្នកចង់បានផ្ទះថ្មី គឺគ្រាន់តែលាបពណ៌ថ្មីប៉ុណ្ណោះ តែបើចង់បានទីតាំងថ្មី អ្នកអាចត្រូវទិញផ្ទះថ្មីទៀត ។
២-ជ្រើសរើសផ្ទះស្អាត តែសហគមន៍ និងបរិស្ថានជុំវិញមិនល្អ ៖
បន្ទាប់ពីទិញផ្ទះហើយ ការរស់នៅក្បែរអ្នក ជិតខាង គឺជារឿងដែលចៀសមិនរួចឡើយ ដូច្នេះ កុំភ្លេចសង្កេតមើលផ្ទះផ្សេងៗទៀតនៅជិត ខាង ឬបរិស្ថាននៅក្បែរនោះថា តើមានការរស់នៅបែបណា ។ នៅពេលអ្នកមានកូនចៅ គឺកាន់តែផ្តល់ភាពសំខាន់ក្នុងរឿងនេះ ជាពិសេស អ្នកមិនចង់ឱ្យពួកគេកើតមកជាមួយនឹងបរិស្ថានមិនល្អទេ ។ ក្រៅពីនេះ សហគមន៍នៅជិតខាងមិនល្អ ក៏អាចធ្វើឱ្យតម្លៃផ្ទះចុះថោកផងដែរ ។
ថ្ងៃក្រោយ ពេលដែលអ្នកផ្លាស់មករស់នៅទីនេះ គឺអាចជួបនឹងបញ្ហាគ្រប់បែបយ៉ាងផងដែរ មិនថាការធ្វើដំណើរចេញ-ចូល សុវត្ថិភាព និងផ្លូវចិត្តរបស់សមាជិកគ្រួសារ ដែលអ្នកគួរផ្តល់ភាពសំខាន់ទី១ ហើយកុំភ្លេចថា មិនចាំបាច់មានផ្ទះដែលមានតម្លៃថ្លៃនោះទេ អ្នកអាចប្រើពេលវេលារកផ្ទះ ឬខុនដូដែលមានបរិស្ថានល្អ តម្លៃសមរម្យ និងមានសហគមន៍ល្អប្រសើរជាង ។
៣-ទិញផ្ទះពីឈ្មួញកណ្តាល ៖
គ្រប់គ្នាតែងមិនចូលចិត្តឈ្មួញកណ្តាល ហើយគិតថា ការទិញផ្ទះដែលធ្លាប់មានអ្នករស់នៅហើយ នឹងធ្វើឱ្យវាមានតម្លៃថ្លៃជាងផ្ទះធម្មតា ព្រោះតម្លៃផ្ទះនឹងត្រូវបូកបញ្ចូលជាមួយឈ្មួញកណ្តាលទៀត ។ ប៉ុន្តែឈ្មួញកណ្តាលមានអាជីពជាអ្នកណែនាំអ្នកលក់ផ្ទះថា តម្លៃលក់បែបណាសមរម្យ មិនខ្ពស់ពេក ឬទាបពេក ។
ចំណុចល្អនៃការទិញផ្ទះតាមរយៈឈ្មួញកណ្តាល គឺពួកគេនឹងជួយផ្តល់ភាពងាយស្រួលក្នុងការទិញ-លក់ឱ្យយើងទាំងអស់ ដោយជួយរៀបចំរបៀបរៀបរយ និងអ្វីដែលសំខាន់ ការទិញតាមឈ្មួញកណ្តាល ក៏អាចតថ្លៃបានដែរ ។
៤-កុំប្រញាប់ខ្លាំងពេក ចិត្តត្រជាក់ជាទីបំផុត ៖
ចូរកុំសម្រេចចិត្តទិញផ្ទះដែលអ្នកពេញចិត្តភ្លាមៗ ។ អ្នកអាចប្រើតិចនិកទិញផ្ទះតែមួយកន្លែង តែធ្វើការចរចាផ្ទះឱ្យបានច្រើនកន្លែង សម្រាប់ជ្រើសរើសផ្ទះណាដែលមានតម្លៃសមរម្យបំផុត ។ ជាធម្មតា មនុស្សគ្រប់រូបពេលទិញផ្ទះមួយកន្លែង ដោយជ្រើសរើសគ្រាន់តែពិចារណាលើផ្ទះតែមួយឬពីបីកន្លែងប៉ុណ្ណោះ ដែលធ្វើឱ្យបាត់បង់ឱកាសក្នុងការទិញផ្ទះមានតម្លៃថោកជាង។
តិចនិកល្អបំផុត ទោះបីជាអ្នកទិញផ្ទះតែមួយក្តី តែគួរជ្រើសរើសផ្ទះដែលល្អបំផុតក្នុងចំណោមផ្ទះជាច្រើនតាមដែលអាចធ្វើទៅបាន ។
៥-ទិញផ្ទះមិនដឹងពីប្រវត្តិ ៖
ស្តាប់មើលទៅពិបាកបន្តិច វិធីដ៏ល្អមុននឹងទិញ អ្នកគួរតែរកឱកាសទៅជជែកជាមួយអ្នកជិតខាងមើលថា តើម្ចាស់ផ្ទះដើមជាអ្នកណា ធ្លាប់មានហេតុការណ៍ភ័យរន្ធត់ក្នុងផ្ទះឬអត់ ចៀសវាងដឹងប្រវត្តិក្រោយការទិញ ។
៦-មិនបានសាកសួរការចំណាយផ្សេងៗ ៖
ចំណុចនេះអ្នកអាចជជែកឱ្យច្បាស់លាស់មុននឹងទិញ ព្រោះមានហេតុការណ៍ដែលម្ចាស់ខុនដូទិញមកយូរហើយ តែមិនធ្លាប់ទៅរស់នៅ ចំណែករួមក៏មិនធ្លាប់ចំណាយអស់រយៈពេលជាច្រើនឆ្នាំ ក៏សម្រេចចិត្តលក់ ។
៧-មិនបានសាកសួរអ្នកជំនាញ និងជឿលើខ្លួនឯង ៖
ការទិញផ្ទះ ប្រសិនបើមានចំណុចណាសង្ស័យ កុំទាន់សម្រេចចិត្តភ្លាមៗជាដាច់ខាត ចូរសួរ ឬទៅរកសេវាកម្មពីអ្នកជំនាញ ដែលពួកគេនៅក្បែរខ្លួនអ្នក ដូចជា អ្នកវាយតម្លៃ ជាងសំណង់ មន្ត្រីប្រាក់កម្ចី ឬអ្នកច្បាប់ ។ល។ អ្នកត្រូវធ្វើបែបនេះ ព្រោះជាធម្មតា ការចំណាយលើសេវាកម្មអ្នកជំនាញទាំងនេះ បើធៀបនឹងការខូចខាតដែលអាចកើតឡើងពីការខុសឆ្គងនោះ គឺវាតិចជាងឆ្ងាយណាស់ ។
៨-គិតរឿងជួសជុលផ្ទះ បន្ទាប់ពីទិញរួច (ចូរគិតរឿងជួសជុល មុននឹងសម្រេចចិត្តទិញ) ៖
កំហុសមួយទៀតក្នុងការទិញផ្ទះ គឺមនុស្សភាគច្រើនគិតរឿងជួសជុលផ្ទះបន្ទាប់ពីទិញរួច ដែលរឿងត្រឹមត្រូវ ការជួសជុលផ្ទះ គួរជាប្រធានបទត្រូវយកមកពិចារណាមុននឹងទិញផ្ទះ ព្រោះវាសំខាន់ដែលជួយឱ្យការវិនិយោគរួចផុតពីហានិភ័យ និងជួយរឿងថវិកាក្នុងការវិនិយោគទុនផងដែរ ។ បន្ទាប់ពីប៉ាន់ស្មានលើការចាយវាយក្នុងការជួសជុលហើយ អ្នកអាចយកព័ត៌មានទាំងនេះមកប្រើក្នុងការតថ្លៃដើម្បីបញ្ចុះតម្លៃផងដែរ ។
៩-ផ្តល់ភាពសំខាន់ជាមួយសម្ភារ ច្រើនជាងជាងជួសជុលផ្ទះ ៖
ពេលទិញផ្ទះរួច ជាពេលដែលអ្នកត្រូវជួសជុល និងតុបតែងផ្ទះ បញ្ហាមួយដែលរំខានចិត្ត គឺការជ្រើសរើសជាងជួសជុល និងការប្រើសម្ភារសម្រាប់ជួសជុល ។ បើសិនជាជ្រើសរើសទាំងពីរយ៉ាងនេះបានល្អ ចាំបាច់ត្រូវចំណាយលុយច្រើនលើការជួសជុល បញ្ហានៅត្រង់ថា បើចាំបាច់ត្រូវជ្រើសយកតែមួយរវាងសម្ភារសម្រាប់ជួសជុល និងជាងជួសជុល ខណៈលុយមានកំណត់នោះ តើគួរតែជ្រើសរើសមួយណាសំខាន់ជាង ។
ករណីបែបនេះ ចម្លើយងាយៗ គឺត្រូវផ្តោតសំខាន់លើជាងជួសជុលដែលមានថ្វីដៃជារឿងសំខាន់ ហើយសម្ភារប្រើប្រាស់ គឺជារឿងបន្ទាប់។ អ្នកត្រូវធ្វើបែបនេះ ព្រោះជាងដែលមានស្នាដៃអាចជួយដោះស្រាយបញ្ហា ឬភាពមិនស្រស់ស្អាតដែលកើតពីសម្ភារសាងសង់បាន។ ប៉ុន្តែបើអ្នកជួលជាងដែលគ្មានថ្វីដៃ ហើយខ្វះជំនាញនោះ ទោះជាអ្នកប្រើប្រាស់សម្ភារសាងសង់ល្អយ៉ាងណាក្តី ក៏ចៀសមិនរួចពីបញ្ហាចាយវាយដែរ ហើយធ្វើឱ្យផ្ទះនោះបាត់បង់នូវភាពស្រស់ស្អាត ។
១០-មិនបានមើលកិច្ចសន្យា មុននឹងសម្រេចចិត្តទិញ ៖
កិច្ចសន្យាទិញ-លក់ផ្ទះ គឺជារឿងសំខាន់រវាងអ្នកទិញ និងអ្នកលក់ ។ កិច្ចសន្យានេះ ត្រូវតែពិនិត្យឱ្យលម្អិតទៅលើសាច់ប្រាក់ ឬក្នុងករណីខុសកិច្ចសន្យារបស់ភាគីទាំងពីរ ព្រោះបើសិនជាអ្នកមិនប្រុងប្រយ័ត្នទេ នៅពេលអ្នកលក់ទទួលបានអ្នកទិញថ្មីដែលឱ្យតម្លៃល្អជាង គេអាចនឹងបញ្ឈប់កិច្ចសន្យាជាមួយអ្នកក៏បាន ហើយរឿងសំខាន់ ការចំណាយផ្សេងៗក្នុងដំណើរការទិញ-លក់ អ្នកណាជាអ្នកចេញ ៕
ចែករំលែកព័តមាននេះ