ការធ្លាក់ចុះលើសពី១%នៃតម្លៃប្រេងកាលពីថ្ងៃអង្គារ ធនាគារ Goldman Sachs បានព្រមានថា ការឡើងថ្លៃក្នុងខែសីហា គឺបំផ្លើសពេកហើយ ។ ម្យ៉ាងទៀត ការស្នើឲ្យមានការផ្អាកផលិតកម្មប្រេងក្នុងពេលតម្លៃចុះថោកបែបនេះ មិនអាចជួយកាត់បន្ថយទីផ្សារដែលផ្គត់ផ្គង់លើសលប់បានទេ ។
ប្រេងឆៅរបស់ក្រុមហ៊ុនប្រេង International Brent មានតម្លៃ៤៨,៥៤ដុល្លារក្នុង១ធុង ដែលថោកជាងការលក់លើកមុនចំនួន៦២សេន ឬ១,២៦% ។ ចំណែកប្រេងឆៅរបស់ក្រុមហ៊ុនប្រេងអាមេរិក West Texas Intermediate (WTI) បានធ្លាក់ចុះ៧៦សេន ឬ១,៦% ក្នុងតម្លៃ៤៦,៦៥ដុល្លារក្នុង១ធុង ។
អ្នកវិភាគបាននិយាយថា ការធ្លាក់ចុះនេះ គឺជាលទ្ធផលនៃការឡើងថ្លៃក្នុងខែនេះ ដែលបានធ្វើឲ្យតម្លៃប្រេងកើនលើស២០% រវាងដើមខែនិងចុងសប្តាហ៍មុន ។ តាំងពីពេលនោះមក តម្លៃបានធ្លាក់ចុះច្រើនជាង៣,៥% ។
ធនាគារ Goldman Sachs បានឱ្យដឹងថា ក្នុងពេលដែលតម្លៃប្រេងលោតឡើងវិញយ៉ាងខ្លាំងតាំងពីថ្ងៃទី១ សីហា ពួកយើងជឿជាក់ថា វាមិនមែនកើតឡើងដោយសារមូលដ្ឋានប្រេងល្អនោះទេ ប៉ុន្តែគឺដោយសារព័ត៌មានក្តៅគគុកពីសក្តានុពលនៃការផ្អាកផលិតកម្មប្រេង រួមទាំងប្រាក់ដុល្លារចុះខ្សោយ ។ ម្យ៉ាងទៀត សំណើរបស់សមាជិកអង្គការប្រទេសនាំចេញប្រេង (OPEC) និងអ្នកផលិតផ្សេងទៀតដូចជា ប្រទេសរុស្ស៊ី ក្នុងការផ្អាកផលិតកម្មនាពេលនេះ នឹងធ្វើឲ្យផលិតកម្មកើនឡើងទៅវិញ ហើយធ្វើឲ្យការផ្គត់ផ្គង់ និងតម្រូវការកាន់តែគ្មានលំនឹង ។
ធនាគារនេះក៏បាននិយាយថា មូលហេតុដែលនាំឲ្យបែបនេះ គឺមកពីជម្លោះរវាងសមាជិក OPEC គឺប្រទេសអារ៉ាប៊ីសាអូឌីត និងអុីរ៉ង់ ព្រមទាំងការសង្ស័យទៅលើប្រទេសផលិតប្រេងដែលមិនមែនជាសមាជិក OPEC គឺរុស្ស៊ី ថា នឹងមានបំណងចង់សហការឬអត់ ។
ធនាគារ Goldman Sachs បន្តថា ពួកគេគិតថា តម្លៃប្រេងឆៅអាចស្មើនឹង៤៥ដុល្លារ ទៅ៥០ដុល្លារក្នុង១ធុងនារដូវក្តៅខាងមុខ ប៉ុន្តែក៏បានព្រមានថា ការឡើងថ្លៃនឹងធ្វើឲ្យក្រុមហ៊ុនប្រេងរបស់សហរដ្ឋអាមេរិក បន្ទាបតម្លៃប្រេងខ្លួននៅត្រឹម៤៥ដុល្លារក្នុង១ធុង ។
ធនាគារបារាំង BNP Paribas បាននិយាយថា ការអធិប្បាយទៅលើការធ្វើឲ្យមានលំនឹងឡើងវិញក្នុងទីផ្សារប្រេងនេះ បានជួបប្រទះនឹងឧបសគ្គមួយចំនួនដូចជា ការត្រឡប់មកវិញនៃការផ្គត់ផ្គង់លើសលប់ដូចក្នុងឆមាសទី២ និងផលិតកម្មរួមរបស់ OPEC បានកើនឡើងជាដើម ៕
ចែករំលែកព័តមាននេះ